ਵਾਸ਼ਿੰਗਟਨ: ਰੂਸ ਅਤੇ ਯੂਕਰੇਨ ਵਿਚਾਲੇ ਜੰਗ ਜਾਰੀ ਹੈ। ਹਾਲ ਹੀ ’ਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਵਿਚਕਾਰ ਅਲਾਸਕਾ ’ਚ ਇੱਕ ਅਹਿਮ ਮੀਟਿੰਗ ਹੋਈ ਸੀ। ਪੁਤਿਨ ਨਾਲ ਮੁਲਾਕਾਤ ਤੋਂ ਬਾਅਦ ਟਰੰਪ ਨੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਅਤੇ ਕਈ ਯੂਰਪੀ ਨੇਤਾਵਾਂ ਨਾਲ ਵੀ ਮਹੱਤਵਪੂਰਨ ਬੈਠਕ ਕੀਤੀ। ਹੁਣ ਟਰੰਪ ਨੇ ਯੂਕਰੇਨ ਸਬੰਧੀ ਵੱਡਾ ਬਿਆਨ ਦਿੱਤਾ ਹੈ।
ਟਰੰਪ ਨੇ ਕੀ ਕਿਹਾ?
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਕਿ ਰੂਸ ਦੇ ਖਿਲਾਫ ਯੂਕਰੇਨ ਦੀ ਰੱਖਿਆ ਲਈ ਅਮਰੀਕੀ ਫੌਜੀਆਂ ਨੂੰ ਨਹੀਂ ਭੇਜਿਆ ਜਾਵੇਗਾ। ਇੱਕ ਟੀਵੀ ਇੰਟਰਵਿਊ ’ਚ ਟਰੰਪ ਨੇ ਇਹ ਵੀ ਕਿਹਾ ਕਿ ਯੂਕਰੇਨ ਦੀਆਂ ਨਾਟੋ ’ਚ ਸ਼ਾਮਲ ਹੋਣ ਅਤੇ ਰੂਸ ਤੋਂ ਕ੍ਰੀਮੀਆ ਪ੍ਰਾਇਦੀਪ ਵਾਪਸ ਲੈਣ ਦੀਆਂ ਉਮੀਦਾਂ ਪੂਰੀਆਂ ਹੋਣਾ ‘ਅਸੰਭਵ’ ਹੈ।
ਪਹਿਲਾਂ ਟਰੰਪ ਨੇ ਕੀ ਕਿਹਾ ਸੀ?
ਵ੍ਹਾਈਟ ਹਾਊਸ ’ਚ ਟਰੰਪ, ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੇਂਸਕੀ ਅਤੇ ਹੋਰ ਯੂਰਪੀ ਨੇਤਾਵਾਂ ਵਿਚਕਾਰ ਹੋਈ ਅਹਿਮ ਬੈਠਕ ’ਚ ਟਰੰਪ ਨੇ ਪੱਤਰਕਾਰਾਂ ਦੇ ਸਵਾਲਾਂ ਦੇ ਜਵਾਬ ’ਚ ਜ਼ੇਲੇਂਸਕੀ ਵੱਲੋਂ ਮੰਗੀਆਂ ਸੁਰੱਖਿਆ ਗਾਰੰਟੀਆਂ ਅਧੀਨ ਯੂਕਰੇਨ ਦੀ ਰੱਖਿਆ ਲਈ ਯੂਰਪੀ ਅਗਵਾਈ ਵਾਲੇ ਯਤਨਾਂ ’ਚ ਅਮਰੀਕੀ ਫੌਜੀਆਂ ਨੂੰ ਭੇਜਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਸੀ।
ਟਰੰਪ ਦੇ ਸੁਰ ਬਦਲੇ
ਗੌਰਤਲਬ ਹੈ ਕਿ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨਾਲ ਮੁਲਾਕਾਤ ਤੋਂ ਬਾਅਦ ਟਰੰਪ ਨੇ ਵੱਡਾ ਬਿਆਨ ਦਿੱਤਾ ਸੀ। ਉਨ੍ਹਾਂ ਕਿਹਾ ਸੀ ਕਿ ਯੂਕਰੇਨ ਅਤੇ ਰੂਸ ਵਿਚਕਾਰ ਚੱਲ ਰਹੀ ਜੰਗ ਨੂੰ ਖਤਮ ਕਰਨ ਦਾ ਸਭ ਤੋਂ ਵਧੀਆ ਤਰੀਕਾ ਸਿੱਧਾ ਸ਼ਾਂਤੀ ਸਮਝੌਤਾ ਕਰਨਾ ਹੈ, ਨਾ ਕਿ ਸੀਜਫਾਇਰ ਸਮਝੌਤੇ ’ਤੇ ਰੁਕਣਾ। ਮੁਲਾਕਾਤ ਤੋਂ ਪਹਿਲਾਂ ਟਰੰਪ ਲਗਾਤਾਰ ਪਹਿਲਾਂ ਸੀਜਫਾਇਰ ਅਤੇ ਫਿਰ ਸ਼ਾਂਤੀ ਸਮਝੌਤੇ ਦੀ ਗੱਲ ਕਰ ਰਹੇ ਸਨ, ਪਰ ਹੁਣ ਉਹ ਸਿੱਧੇ ਸ਼ਾਂਤੀ ਸਮਝੌਤੇ ਦੀ ਗੱਲ ਕਰ ਰਹੇ ਹਨ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
