ਨਾਗਰਿਕ ਹਵਾਬਾਜ਼ੀ ਮਹਾਨਿਦੇਸ਼ਕ (DGCA) ਨੇ 12 ਜੂਨ 2025 ਨੂੰ ਅਹਿਮਦਾਬਾਦ ’ਚ ਵਾਪਰੇ ਏਅਰ ਇੰਡੀਆ ਦੀ ਫਲਾਈਟ AI-171 ਦੇ ਹਾਦਸੇ ਤੋਂ ਬਾਅਦ ਸਖ਼ਤ ਕਾਰਵਾਈ ਕੀਤੀ ਹੈ। DGCA ਨੇ 20 ਜੂਨ 2025 ਨੂੰ ਜਾਰੀ ਹੁਕਮ ’ਚ ਏਅਰ ਇੰਡੀਆ ਨੂੰ ਤਿੰਨ ਸੀਨੀਅਰ ਅਧਿਕਾਰੀਆਂ ਡਿਵੀਜ਼ਨਲ ਵਾਈਸ ਪ੍ਰੈਜ਼ੀਡੈਂਟ ਚੂਰਾ ਸਿੰਘ, ਚੀਫ ਮੈਨੇਜਰ (ਕਰਿਊ ਸ਼ਡਿਊਲਿੰਗ) ਪਿੰਕੀ ਮਿੱਤਲ, ਅਤੇ ਕਰਿਊ ਸ਼ਡਿਊਲਿੰਗ ਪਲਾਨਿੰਗ ਨਾਲ ਜੁੜੀ ਪਾਇਲ ਅਰੋੜਾ ਨੂੰ ਕਰਿਊ ਸ਼ਡਿਊਲਿੰਗ ਅਤੇ ਰੋਸਟਰਿੰਗ ਨਾਲ ਜੁੜੀਆਂ ਸਾਰੀਆਂ ਜ਼ਿੰਮੇਵਾਰੀਆਂ ਤੋਂ ਤੁਰੰਤ ਹਟਾਉਣ ਦਾ ਨਿਰਦੇਸ਼ ਦਿੱਤਾ। ਇਹ ਕਾਰਵਾਈ ਹਵਾਬਾਜ਼ੀ ਸੁਰੱਖਿਆ ਪ੍ਰੋਟੋਕੋਲ ਦੀ ਗੰਭੀਰ ਉਲੰਘਣਾ ਕਾਰਨ ਕੀਤੀ ਗਈ, ਜਿਸ ’ਚ ਨਿਯਮਾਂ ਦੇ ਖਿਲਾਫ ਕਰਿਊ ਪੇਅਰਿੰਗ, ਲਾਇਸੈਂਸਿੰਗ ਅਤੇ ਲਾਜ਼ਮੀ ਉਡਾਣ ਅਨੁਭਵ ਨਿਯਮਾਂ ਦੀ ਉਲੰਘਣਾ, ਅਤੇ ਸ਼ਡਿਊਲਿੰਗ ਪ੍ਰੋਟੋਕੋਲ ਦੀ ਪਾਲਣਾ ਨਾ ਕਰਨਾ ਸ਼ਾਮਲ ਹੈ।
DGCA ਨੇ ਹੇਠ ਲਿਖੇ ਹੁਕਮ ਜਾਰੀ ਕੀਤੇ:
ਅਧਿਕਾਰੀਆਂ ਨੂੰ ਹਟਾਉਣਾ: ਤਿੰਨੋਂ ਅਧਿਕਾਰੀਆਂ ਨੂੰ ਤੁਰੰਤ ਪ੍ਰਭਾਵ ਨਾਲ ਕਰਿਊ ਸ਼ਡਿਊਲਿੰਗ ਅਤੇ ਰੋਸਟਰਿੰਗ ਤੋਂ ਹਟਾਇਆ ਜਾਵੇ।
ਅਨੁਸ਼ਾਸਨਾਤਮਕ ਕਾਰਵਾਈ: ਇਨ੍ਹਾਂ ਦੇ ਖਿਲਾਫ ਅੰਦਰੂਨੀ ਅਨੁਸ਼ਾਸਨਾਤਮਕ ਜਾਂਚ ਸ਼ੁਰੂ ਕੀਤੀ ਜਾਵੇ ਅਤੇ 10 ਦਿਨਾਂ ’ਚ DGCA ਨੂੰ ਰਿਪੋਰਟ ਸੌਂਪੀ ਜਾਵੇ।
ਗੈਰ-ਪਰਿਚਾਲਨੀ ਭੂਮਿਕਾ: ਸੁਧਾਰਕ ਪ੍ਰਕਿਰਿਆਵਾਂ ਪੂਰੀਆਂ ਹੋਣ ਤੱਕ ਇਨ੍ਹਾਂ ਅਧਿਕਾਰੀਆਂ ਨੂੰ ਗੈਰ-ਪਰਿਚਾਲਨੀ (ਨਾਨ-ਆਪਰੇਸ਼ਨਲ) ਅਹੁਦਿਆਂ ’ਤੇ ਤਬਦੀਲ ਕੀਤਾ ਜਾਵੇ ਅਤੇ ਇਨ੍ਹਾਂ ਨੂੰ ਉਡਾਣ ਸੁਰੱਖਿਆ ਜਾਂ ਕਰਿਊ ਪਾਲਣਾ ਨਾਲ ਜੁੜੀ ਕੋਈ ਜ਼ਿੰਮੇਵਾਰੀ ਨਾ ਦਿੱਤੀ ਜਾਵੇ।
ਭਵਿੱਖ ’ਚ ਉਲੰਘਣ ’ਤੇ ਸਜ਼ਾ: ਕਰਿਊ ਸ਼ਡਿਊਲਿੰਗ, ਲਾਇਸੈਂਸਿੰਗ, ਜਾਂ ਫਲਾਈਟ ਸਮੇਂ ਨਾਲ ਜੁੜੇ ਕਿਸੇ ਵੀ ਨਿਯਮ ਦੀ ਉਲੰਘਣਾ ’ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ, ਜਿਸ ’ਚ ਜੁਰਮਾਨਾ, ਲਾਇਸੈਂਸ ਮੁਅੱਤਲੀ, ਜਾਂ ਆਪਰੇਟਰ ਦੀ ਇਜਾਜ਼ਤ ਰੱਦ ਕਰਨਾ ਸ਼ਾਮਲ ਹੋ ਸਕਦਾ ਹੈ।
ਏਅਰ ਇੰਡੀਆ ਨੇ DGCA ਦੇ ਹੁਕਮ ਨੂੰ ਲਾਗੂ ਕਰਨ ਦੀ ਪੁਸ਼ਟੀ ਕੀਤੀ ਹੈ। ਕੰਪਨੀ ਦੇ ਚੀਫ ਆਪਰੇਸ਼ਨਜ਼ ਅਫਸਰ ਹੁਣ ਇੰਟੀਗ੍ਰੇਟਡ ਆਪਰੇਸ਼ਨਜ਼ ਕੰਟਰੋਲ ਸੈਂਟਰ (IOCC) ਦੀ ਸਿੱਧੀ ਨਿਗਰਾਨੀ ਕਰਨਗੇ।
ਅਹਿਮਦਾਬਾਦ ਹਾਦਸੇ ਦਾ ਵੇਰਵਾ
12 ਜੂਨ 2025 ਨੂੰ ਲੰਡਨ-ਗੈਟਵਿਕ ਲਈ ਉਡਾਣ ਭਰਨ ਵਾਲੀ ਏਅਰ ਇੰਡੀਆ ਦੀ ਫਲਾਈਟ AI-171, ਇੱਕ ਬੋਇੰਗ 787-8 ਡ੍ਰੀਮਲਾਈਨਰ, ਅਹਿਮਦਾਬਾਦ ਦੇ ਸਰਦਾਰ ਵੱਲਭਭਾਈ ਪਟੇਲ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਟੇਕਆਫ ਦੇ ਤੁਰੰਤ ਬਾਅਦ ਮੇਘਾਨੀਨਗਰ ਖੇਤਰ ’ਚ ਬੀਜੇ ਮੈਡੀਕਲ ਕਾਲਜ ਦੇ ਹੋਸਟਲ ਪਰਿਸਰ ਨਾਲ ਟਕਰਾ ਗਈ। ਇਸ ਹਾਦਸੇ ’ਚ 241 ਯਾਤਰੀਆਂ ਅਤੇ ਚਾਲਕ ਦਲ ਦੇ ਮੈਂਬਰਾਂ ਸਮੇਤ ਕੁੱਲ 270 ਲੋਕਾਂ ਦੀ ਮੌਤ ਹੋ ਗਈ। ਸਿਰਫ਼ ਇੱਕ ਯਾਤਰੀ, ਵਿਸ਼ਵਾਸਕੁਮਾਰ ਰਮੇਸ਼, ਚਮਤਕਾਰੀ ਤੌਰ ’ਤੇ ਬਚ ਗਿਆ। ਵਿਮਾਨ ਨੇ ਟੇਕਆਫ ਦੇ 60 ਸਕਿੰਟਾਂ ਦੇ ਅੰਦਰ ਮੇਅ ਡੇਅ ਕਾਲ ਜਾਰੀ ਕੀਤੀ ਸੀ, ਪਰ ਇਸ ਤੋਂ ਬਾਅਦ ਏਅਰ ਟ੍ਰੈਫਿਕ ਕੰਟਰੋਲ (ATC) ਨਾਲ ਕੋਈ ਸੰਪਰਕ ਨਹੀਂ ਹੋ ਸਕਿਆ।
