ਨਿਊਜ਼ ਡੈਸਕ: ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਇੱਕ ਆਡੀਓ ’ਚ ਗੋਲਡੀ ਬਰਾੜ ਨੇ ਲਾਰੈਂਸ ਬਿਸ਼ਨੋਈ ਗੈਂਗ ਤੋਂ ਵੱਖ ਹੋਣ ਦੀ ਗੱਲ ਕੀਤੀ ਹੈ। ਇਹ ਆਡੀਓ ਗੋਲਡੀ ਬਰਾੜ ਦੀ ਹੈ ਫਿਲਹਾਲ ਇਸ ਦੀ ਪੁਸ਼ਟੀ ਨਹੀਂ ਹੋ ਸਕੀ। ਆਡੀਓ ’ਚ ਵਿਅਕਤੀ ਖੁਦ ਨੂੰ ਗੋਲਡੀ ਬਰਾੜ ਦੱਸਦਾ ਹੈ ਅਤੇ ਕਹਿੰਦਾ ਹੈ ਕਿ ਗੰਗਾ ਨਗਰ ’ਚ ਆਸ਼ੀਸ਼ ਗੁਪਤਾ ’ਤੇ ਹਮਲਾ ਉਸ ਅਤੇ ਰੋਹਿਤ ਗੋਦਾਰਾ ਨੇ ਕੀਤਾ ਸੀ। ਉਸ ਦਾ ਮਕਸਦ ਮਾਰਨਾ ਨਹੀਂ, ਸਗੋਂ ਸਬਕ ਸਿਖਾਉਣਾ ਸੀ, ਇਸ ਲਈ ਗੁਪਤਾ ਦੀ ਲੱਤ ’ਚ ਗੋਲੀ ਮਾਰੀ ਗਈ। ਉਸ ਨੇ ਕਿਹਾ, “ਜੇ ਮਾਰਨਾ ਹੁੰਦਾ ਤਾਂ ਸਿਰ ’ਚ ਗੋਲੀ ਮਾਰਦੇ।”
ਅਨਮੋਲ ਬਿਸ਼ਨੋਈ ਨਾਲ ਸਬੰਧ ਤੋੜਨ ਦਾ ਦਾਅਵਾ
ਆਡੀਓ ’ਚ ਗੋਲਡੀ ਬਰਾੜ ਨੇ ਸਪੱਸ਼ਟ ਕੀਤਾ ਕਿ ਉਸ ਦਾ ਹੁਣ ਅਨਮੋਲ ਬਿਸ਼ਨੋਈ, ਜੋ ਲਾਰੈਂਸ ਬਿਸ਼ਨੋਈ ਦਾ ਭਰਾ ਹੈ, ਨਾਲ ਕੋਈ ਸਬੰਧ ਨਹੀਂ। ਉਸ ਨੇ ਅਨਮੋਲ ਦੇ ਨਾਂ ’ਤੇ ਝੂਠੀ ਪੋਸਟ ਸਾਂਝੀ ਹੋਣ ਦਾ ਵੀ ਜ਼ਿਕਰ ਕੀਤਾ, ਜਿਸ ਦਾ ਉਸ ਨੂੰ ਅਤੇ ਰੋਹਿਤ ਗੋਦਾਰਾ ਨੂੰ ਵਿਰੋਧ ਹੈ।
‘ਪੰਜਾਬ ਭਾਰਤ ਦਾ ਹਿੱਸਾ’
ਆਡੀਓ ’ਚ ਗੋਲਡੀ ਬਰਾੜ ਨੇ ਆਪਣੇ ’ਤੇ ਲੱਗੇ ISI ਅਤੇ ਪਾਕਿਸਤਾਨ ਤੋਂ ਫਿਰੌਤੀ ਮੰਗਣ ਦੇ ਇਲਜ਼ਾਮਾਂ ਨੂੰ ਖਾਰਜ ਕੀਤਾ। ਉਸ ਨੇ ਕਿਹਾ, “ਪੰਜਾਬ ਵੀ ਭਾਰਤ ਦਾ ਹਿੱਸਾ ਹੈ, ਅਸੀਂ ਦੇਸ਼ ਵਿਰੁੱਧ ਨਹੀਂ ਜਾਵਾਂਗੇ।” ਉਸ ਨੇ ਮੀਡੀਆ ਨੂੰ ਅਜਿਹੀਆਂ ਖ਼ਬਰਾਂ ਨੂੰ ਬਿਨਾਂ ਜਾਂਚ ਦੇ ਨਾ ਚਲਾਉਣ ਦੀ ਅਪੀਲ ਕੀਤੀ।
ਅਨਮੋਲ ਬਿਸ਼ਨੋਈ ਦੀ ਗ੍ਰਿਫਤਾਰੀ
ਅਨਮੋਲ ਬਿਸ਼ਨੋਈ, ਲਾਰੈਂਸ ਬਿਸ਼ਨੋਈ ਦਾ ਭਰਾ, ਅਮਰੀਕਾ ’ਚ ਜਾਅਲੀ ਇਮੀਗ੍ਰੇਸ਼ਨ ਕਾਗਜ਼ਾਤ ਦੇ ਮਾਮਲੇ ’ਚ ਗ੍ਰਿਫਤਾਰ ਹੋਇਆ ਸੀ। ਮੰਨਿਆ ਜਾ ਰਿਹਾ ਹੈ ਕਿ ਗੋਲਡੀ ਬਰਾੜ ਅਤੇ ਰੋਹਿਤ ਗੋਦਾਰਾ ਨੇ ਅਨਮੋਲ ਦੀ ਮਦਦ ਨਾ ਕਰਨ ਕਾਰਨ ਲਾਰੈਂਸ ਅਤੇ ਅਨਮੋਲ ਤੋਂ ਦੂਰੀ ਬਣਾਈ ਅਤੇ ਆਪਣਾ ਵੱਖਰਾ ਗੈਂਗ ਚਲਾਉਣਾ ਸ਼ੁਰੂ ਕੀਤਾ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
