ਬਰੈਂਪਟਨ: ਕੈਨੇਡਾ ਦੇ ਬਰੈਂਪਟਨ ਸ਼ਹਿਰ ਨਾਲ ਸਬੰਧਤ ਹਰਪ੍ਰੀਤ ਸੈਣੀ ਸਣੇ ਦੋ ਜਣਿਆਂ ਵਿਰੁੱਧ 10 ਲੱਖ ਡਾਲਰ ਦੀ ਠੱਗੀ ਅਤੇ ਇਨਸਾਈਡਰ ਟ੍ਰੇਡਿੰਗ ਦੇ ਦੋਸ਼ ਆਇਦ ਕੀਤੇ ਗਏ ਹਨ। ਓਨਟਾਰੀਓ ਸਕਿਓਰਟੀਜ਼ ਕਮਿਸ਼ਨ ਨੇ ਦੱਸਿਆ ਕਿ ਹਰਪ੍ਰੀਤ ਸੈਣੀ ਦੇ ਸ਼ੇਅਰ ਬਾਜ਼ਾਰ ਨਾਲ ਸਬੰਧਤ ਖਾਤੇ ਵਿੱਚ ਜਮ੍ਹਾਂ 6,74,000 ਡਾਲਰ ਫ਼ਰੀਜ਼ ਕਰ ਦਿੱਤੇ ਗਏ ਹਨ ਅਤੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਮਈ 2018 ਤੋਂ ਜੁਲਾਈ 2021 ਵਿਚਾਲੇ ਹਰਪ੍ਰੀਤ ਸੈਣੀ ਅਤੇ ਜੌਹਨ ਨੋਟੀਵੀਡੈਡ ਨੇ ਆਪਣੇ ਇਪਲੋਇਰ ਰਾਹੀਂ ਗੈਰ ਜਨਤਕ ਜਾਣਕਾਰੀ ਇਕੱਠੀ ਕੀਤੀ, ਜਿਸ ਦੀ ਇਨ੍ਹਾਂ ਕੋਲ ਕੋਈ ਅਥਾਰਟੀ ਨਹੀਂ ਸੀ। ਉੱਥੇ ਹੀ ਕਈ ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਦੋਵੇਂ ਗਲੋਬ ਨਿਊਜ਼ ਵਾਇਰ ਵਿੱਚ ਸਿਸਟਮ ਡਿਵੈਲਪਰ ਵਜੋਂ ਵੀ ਕੰਮ ਕਰਦੇ ਸਨ, ਜਿਸ ਨਾਲ ਇਨ੍ਹਾਂ ਨੂੰ ਰਿਲੀਜ਼ ਹੋਣ ਤੋਂ ਪਹਿਲਾਂ ਹੀ ਕਈ ਕਾਰਪੋਰੇਟ ਪ੍ਰੈਸ ਨੋਟ ਮਿਲ ਜਾਂਦੇ।
ਓਨਟਾਰੀਓ ਸਕਿਓਰਿਟੀਜ਼ ਕਮਿਸ਼ਨ ਦੇ ਡਾਇਰੈਕਟਰ ਇਨਫ਼ੋਰਸਮੈਂਟ ਜੈਫ ਕੇਹੋ ਨੇ ਦੱਸਿਆ ਕਿ ਮੁਲਾਜ਼ਮਾਂ ਦੀ ਜ਼ਿੰਮੇਵਾਰੀ ਬਣਦੀ ਹੈ ਕਿ ਕੰਮ ਦੌਰਾਨ ਮਿਲਣ ਵਾਲੀ ਜਾਣਕਾਰੀ ਨੂੰ ਗੁਪਤ ਰੱਖਿਆ ਜਾਵੇ ਅਤੇ ਨਿਜੀ ਫ਼ਾਇਦੇ ਲਈ ਇਸ ਦੀ ਦੁਰਵਰਤੋਂ ਕਰਨ ਦੀ ਕੋਸ਼ਿਸ਼ ਨਾਂ ਕੀਤੀ ਜਾਵੇ। ਸ਼ੇਅਰ ਬਾਜ਼ਾਰ ਦੇ ਰੁਝਾਨ ਬਾਰੇ ਪਹਿਲਾਂ ਹੀ ਪਤਾ ਲੱਗਣ ‘ਤੇ ਇਕ ਕੰਪਨੀ ਵਿਸ਼ੇਸ਼ ਦੇ ਸ਼ੇਅਰ ਖਰੀਦਣ ਨਾਲ ਨਿਵੇਸ਼ਕਾਂ ਦੇ ਭਰੋਸੇ ਨੂੰ ਖੋਰਾ ਲਗਦਾ ਹੈ। ਹਰਪ੍ਰੀਤ ਸੈਣੀ ਅਤੇ ਜੌਹਨ 21 ਨਵੰਬਰ ਨੂੰ ਬਰੈਂਪਟਨ ਦੀ ਅਦਾਲਤ ‘ਚ ਪੇਸ਼ ਹੋਣਗੇ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
