ਲੰਦਨ: ਬਰਤਾਨੀਆਂ ਦੇ ਨਵੇਂ ਪ੍ਰਧਾਨ ਮੰਤਰੀ ਦੇ ਨਾਮ ਦਾ ਅੱਜ ਐਲਾਨ ਕੀਤਾ ਜਾਵੇਗਾ। ਚੋਣਾਂ ਦੌਰਾਨ ਭਾਰਤੀ ਮੂਲ ਦੇ ਰਿਸ਼ੀ ਸੁਨਕ ਅਤੇ ਕੰਜ਼ਰਵੇਟਿਵ ਪਾਰਟੀ ਦੀ ਲਿਜ਼ ਟ੍ਰਸ ਵਿਚਾਲੇ ਸਖ਼ਤ ਮੁਕਾਬਲਾ ਦੇਖਣ ਨੂੰ ਮਿਲਿਆ, ਹਾਲਾਂਕਿ ਬਾਅਦ ‘ਚ ਰਿਸ਼ੀ ਸੁਨਕ ਸਰਵੇ ‘ਚ ਪਿੱਛੇ ਨਜ਼ਰ ਆਏ। ਫਿਲਹਾਲ ਹੁਣ ਇਹ ਜਲਦ ਹੀ ਸਾਫ ਹੋ ਜਾਵੇਗਾ ਕਿ ਬੋਰਿਸ ਜੌਹਨਸਨ ਦੀ ਥਾਂ ਕੌਣ ਲੈਣ ਜਾ ਰਿਹਾ ਹੈ।
ਅਸਲ ‘ਚ ਬ੍ਰਿਟੇਨ ਦੀ ਕੰਜ਼ਰਵੇਟਿਵ ਪਾਰਟੀ ਦੇ ਮੈਂਬਰਾਂ ਵਿਚਾਲੇ ਵੋਟਿੰਗ ਪੂਰੀ ਹੋ ਗਈ ਹੈ। ਸਰਵੇ ਮੁਤਾਬਕ ਲਿਜ਼ ਟ੍ਰਸ ਬੇਸ਼ੱਕ ਅੱਗੇ ਹੈ ਪਰ ਰਿਸ਼ੀ ਸੁਨਕ ਦੇ ਸਮਰਥਕਾਂ ਨੇ ਹਾਲੇ ਤੱਕ ਹਾਰ ਨਹੀਂ ਮੰਨੀ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਸੋਮਵਾਰ ਨੂੰ ਆਏ ਨਤੀਜੇ ਹੈਰਾਨ ਕਰਨ ਵਾਲੇ ਹੋ ਸਕਦੇ ਹਨ ਅਤੇ ਰਿਸ਼ੀ ਸੁਨਕ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬਣ ਕੇ ਇਤਿਹਾਸ ਰਚ ਸਕਦੇ ਹਨ।
ਕਿੰਝ ਐਲਾਨੇ ਜਾਂਦੇ ਹਨ ਯੂਕੇ ‘ਚ ਪ੍ਰਧਾਨ ਮੰਤਰੀ ਚੋਣ ਨਤੀਜੇ?
ਬ੍ਰਿਟੇਨ ‘ਚ ਪ੍ਰਧਾਨ ਮੰਤਰੀ ਚੋਣਾਂ ਲਈ ਕੰਜ਼ਰਵੇਟਿਵ ਪਾਰਟੀ ਲਈ 357 ਯੋਗ ਸੰਸਦ ਮੈਂਬਰਾਂ ਨੇ ਵੋਟ ਕੀਤੀ। ਹਰ ਗੇੜ ਵਿੱਚ ਸਭ ਤੋਂ ਘੱਟ ਵੋਟਾਂ ਵਾਲੇ ਦਾਅਵੇਦਾਰ ਨੂੰ ਬਾਹਰ ਕਰ ਦਿੱਤਾ ਗਿਆ, ਅਤੇ ਬਾਕੀ ਅੱਗੇ ਵੱਧਦੇ ਗਏ। ਅਖੀਰ ‘ਚ ਦੋ ਫਾਈਨਲਿਸਟ ਰਿਸ਼ੀ ਸੁਨਕ ਅਤੇ ਲਿਜ਼ ਟ੍ਰਸ ਬਚੇ ਸਨ। ਬਰਤਾਨੀਆ ਵਿੱਚ ਕੰਜ਼ਰਵੇਟਿਵ ਪਾਰਟੀ ਸੱਤਾ ਵਿੱਚ ਹੈ ਅਤੇ ਹਾਊਸ ਆਫ ਕਾਮਨਜ਼ ਵਿੱਚ ਵੀ ਪਾਰਟੀ ਦਾ ਬਹੁਮਤ ਹੈ। ਇਸ ਲਈ ਬ੍ਰਿਟੇਨ ਦੇ ਅਗਲੇ ਪ੍ਰਧਾਨ ਮੰਤਰੀ ਲਈ ਪਾਰਟੀ ਦੇ ਸੰਸਦ ਮੈਂਬਰ ਵੋਟਿੰਗ ਕਰਕੇ ਫੈਸਲਾ ਕਰਨਗੇ।
ਇਸ ਤੋਂ ਇਲਾਵਾ ਪਾਰਟੀ ਦੇ ਲਗਭਗ 1.60 ਲੱਖ ਮੈਂਬਰਾਂ ਨੇ ਵੋਟ ਪਾਈ ਹੈ। ਖਬਰਾਂ ਮੁਤਾਬਕ ਲਿਜ਼ ਟ੍ਰਸ ਭਾਵੇਂ ਸੰਸਦ ਮੈਂਬਰਾਂ ਦੀਆਂ ਵੋਟਾਂ ਹਾਸਲ ਕਰਨ ‘ਚ ਪਿੱਛੇ ਰਹੀ ਹੋਵੇ ਪਰ ਆਖਰੀ ਫੈਸਲਾ ਪਾਰਟੀ ਮੈਂਬਰਾਂ ਦੀਆਂ ਵੋਟਾਂ ਨਾਲ ਹੋਣਾ ਹੈ ਅਤੇ ਲਿਜ਼ ਇੱਥੇ ਰਿਸ਼ੀ ਤੋਂ ਅੱਗੇ ਮੰਨੀ ਜਾ ਰਹੀ ਹੈ। ਇੱਕ ਸਰਵੇਖਣ ਮੁਤਾਬਕ ਹਰ 10 ਵਿੱਚੋਂ 6 ਪਾਰਟੀ ਮੈਂਬਰ ਲਿਜ਼ ਦੇ ਨਾਲ ਹਨ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
