ਰਿਚਮੰਡ ਹਿੱਲ: ਅਮਰੀਕਾ ਦੇ ਕੁਈਨਜ਼ ਸਟਰੀਟ ਵਿੱਚ ਪੰਜਾਬ ਦੇ ਇੱਕ ਉੱਘੇ ਸਾਹਿਤਕਾਰ ‘ਤੇ ਦੋ ਅਣਪਛਾਤੇ ਵਿਅਕਤੀਆਂ ਨੇ ਲੁੱਟ-ਖੋਹ ਦੌਰਾਨ ਹਮਲਾ ਕੀਤਾ, ਜਿਸ ‘ਚ ਉਹ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਏ। ਹਮਲੇ ਦੀ ਇਹ ਘਟਨਾ ਰਾਤ ਦੇ ਲਗਭਗ 9 ਵਜੇ ਵਾਪਰੀ। ਜਾਣਕਾਰੀ ਮੁਤਾਬਕ 82 ਸਾਲਾ ਓਂਕਾਰ ਸਿੰਘ ਰਿਚਮੰਡ ਹਿੱਲ ਦੀ 112 ਸਟਰੀਟ ਅਤੇ ਲਿਬਰਟੀ ਐਵਿਨਿਊ ਨੇੜ੍ਹੇ ਪੈਦਲ ਜਾ ਰਹੇ ਸਨ ਕਿ ਅਚਾਨਕ ਪਿੱਛੋਂ ਦੋ ਵਿਅਕਤੀਆਂ ਨੇ ਉਨ੍ਹਾਂ ਤੇ ਹਮਲਾ ਕਰ ਦਿੱਤਾ।
ਹਮਲਾਵਰਾਂ ਨੇ ਬਜ਼ੁਰਗ ‘ਤੇ ਮੁੱਕਿਆਂ ਨਾਲ ਕਈ ਵਾਰ ਕੀਤੇ, ਇਸ ਦੌਰਾਨ ਬਜ਼ੁਰਗ ਉਨ੍ਹਾਂ ਨੂੰ ਕਹਿੰਦਾ ਰਿਹਾ ਕਿ ਮੈਨੂੰ ਨਾਂ ਮਾਰੋ ਤੇ ਤੁਹਾਨੂੰ ਜੋ ਚਾਹੀਦਾ ਲੈ ਲਵੋ, ਮੇਰੇ ਕੋਲ ਜਿੰਨੇ ਪੈਸ ਨੇ ਸਾਰੇ ਲੈ ਲਵੋ ਪਰ ਉਨ੍ਹਾਂ ਨੇ ਬਜ਼ੁਰਗ ਨੂੰ ਨਹੀਂ ਛੱਡਿਆ। ਇਸ ਕੁੱਟਮਾਰ ਦੌਰਾਨ ਬਜ਼ੁਰਗ ਓਂਕਾਰ ਸਿੰਘ ਫੁੱਟਪਾਥ ‘ਤੇ ਡਿਗ ਗਏ। ਉਨ੍ਹਾਂ ਦੇ ਚਿਹਰੇ ਅਤੇ ਛਾਤੀ ‘ਤੇ ਸੱਟਾਂ ਲੱਗੀਆਂ ਹਨ।
ਪੁਲਿਸ ਦਾ ਕਹਿਣਾ ਹੈ ਕਿ ਸ਼ੱਕੀ ਪੀੜਤ ਦਾ ਮੋਬਾਈਲ ਫ਼ੋਨ ਲੈ ਕੇ ਅਣਪਛਾਤੀ ਦਿਸ਼ਾ ਵੱਲ ਫ਼ਰਾਰ ਹੋਏ ਸੀ। ਪੁਲਿਸ ਨੇ ਇਸ ਮਾਮਲੇ ਵਿੱਚ ਫਿਲਹਾਲ ਇੱਕ 18 ਸਾਲਾ ਨੌਜਵਾਨ ਨੂੰ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਦੇ ਅਨੁਸਾਰ, ਇਸ ਹਮਲੇ ਦੀ ਫ਼ਿਲਹਾਲ ਨਫ਼ਰਤੀ ਅਪਰਾਧ ਵਜੋਂ ਜਾਂਚ ਨਹੀਂ ਕੀਤੀ ਜਾ ਰਹੀ ਹੈ, ਪਹਿਲੀ ਨਜ਼ਰੇ ਦੇਖਣ ਨੂੰ ਇਹ ਮਾਮਲਾ ਲੁੱਟ ਖੋਹ ਦਾ ਲੱਗ ਰਿਹਾ ਹੈ।
ਓਂਕਾਰ ਸਿੰਘ ਨੇ ਆਪਣੇ ‘ਤੇ ਹੋਏ ਹਮਲੇ ਬਾਰੇ ਦੱਸਦਿਆਂ ਕਿਹਾ ‘ਉਨ੍ਹਾਂ ਨੇ ਮੇਰੀ ਛਾਤੀ ‘ਤੇ ਮਾਰਿਆ ਤੇ ਮੈਂ ਹੇਠਾਂ ਡਿਗ ਗਿਆ ਤੇ ਮੇਰੇ ਕੋਲ ਮੇਰਾ ਫ਼ੋਨ ਸੀ, ਉਹ ਇਸ ਨੂੰ ਲੈ ਕੇ ਭੱਜ ਗਏ।’
ਇਸ ਘਟਨਾ ਤੋਂ ਬਾਅਦ ਉਨ੍ਹਾਂ ਨੂੰ ਇਲਾਜ ਲਈ ਜਮਾਇਕਾ ਦੇ ਹਸਪਤਾਲ ਲਿਜਾਇਆ ਗਿਆ ਸੀ ਤੇ ਡਿਸਚਾਰਜ ਤੋਂ ਬਾਅਦ ਹੁਣ ਉਹ ਘਰ ਵਿੱਚ ਹੀ ਹਨ। ਉਨ੍ਹਾਂ ਦੇ ਜਬਾੜੇ ਵਿੱਚ ਹਾਲੇ ਵੀ ਸੋਜ ਹੈ। ਇਸ ਮਾਮਲੇ ਨੂੰ ਲੈ ਕੇ NYPD ਹੇਟ ਕ੍ਰਾਈਮਜ਼ ਯੂਨਿਟ ਨੇ ਹਾਲ ਹੀ ਵਿੱਚ ਸਿੱਖ ਭਾਈਚਾਰੇ ਨਾਲ ਮੁਲਾਕਾਤ ਕੀਤੀ ਹੈ ਅਤੇ ਉਨ੍ਹਾਂ ਨੂੰ ਭਰੋਸਾ ਦਵਾਇਆ ਹੈ ਕਿ ਜਾਂਚ ‘ਚ ਕੋਈ ਵੀ ਕਸਰ ਬਾਕੀ ਨਹੀਂ ਛੱਡੀ ਜਾਵੇਗੀ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
