ਕੈਨੇਡਾ:- ਦੂਰ ਦਰਾਜ ਦੇ ਪਹਾੜੀ ਇਲਾਕਿਆਂ, ਟਾਪੂਆਂ ਤੇ ਲਾਕਡ-ਡਾਊਨ ਦੇਸ਼ਾਂ ਵਿੱਚ ਫਸ ਚੁੱਕੇ ਹਜ਼ਾਰਾਂ ਕੈਨੇਡੀਅਨਾਂ ਨੂੰ ਦੇਸ਼ ਵਾਪਿਸ ਲਿਆਉਣ ਲਈ ਕੈਨੇਡਾ ਲੱਗਭੱਗ ਦਰਜਨਾਂ ਵਿਦੇਸ਼ੀ ਏਅਰਲਾਈਨਜ਼ ਦੀ ਮਦਦ ਲਵੇਗਾ। ਇਹ ਅਜਿਹੀਆਂ ਥਾਂਵਾਂ ਹਨ ਜਿਨਾਂ ਉੱਤੇ ਦੁਨੀਆ ਭਰ ਵਿੱਚ ਜਾਰੀ ਲਾਕਡਾਊਨ ਕਾਰਨ ਕੈਨੇਡੀਅਨ ਕੈਰੀਅਰਜ਼ ਪਹੁੰਚ ਨਹੀਂ ਸਕਦੇ। ਫੈਡਰਲ ਸਰਕਾਰ ਵੱਲੋਂ ਇਹ ਸਪਸ਼ਟ ਕੀਤਾ ਗਿਆ ਹੈ ਕਿ 25000 ਲੋਕਾਂ ਨੂੰ ਘਰ ਲਿਆਉਣ ਦੇ ਪ੍ਰਬੰਧ ਕੀਤੇ ਜਾ ਚੁੱਕੇ ਹਨ ਤੇ ਹੁਣ ਬਾਕੀ ਫਸੇ ਹੋਏ 20 ਫੀਸਦੀ ਯਾਤਰੀਆਂ ਨੂੰ ਲਿਆਉਣ ਦੀਆਂ ਕੋਸਿ਼ਸ਼ਾਂ ਚੱਲ ਰਹੀਆਂ ਹਨ। ਪਰ ਸਰਕਾਰ ਇਹ ਵੀ ਆਖ ਰਹੀ ਹੈ ਕਿ ਉਹ ਮਹਾਂਮਾਰੀ ਦੇ ਖੁਦ ਖਤਮ ਹੋਣ ਤੋਂ ਪਹਿਲਾਂ ਸਾਰਿਆਂ ਨੂੰ ਅਜੇ ਵੀ ਘਰ ਵਾਪਿਸ ਨਹੀਂ ਲਿਆ ਸਕੇਗੀ। ਲਿਬਰਲ ਐਮਪੀ ਰੌਬ ਓਲੀਫੈਂਟ, ਵਿਦੇਸ਼ ਮੰਤਰੀ ਦੇ ਪਾਰਲੀਮਾਨੀ ਸਕੱਤਰ, ਨੇ ਆਖਿਆ ਕਿ ਇਨ੍ਹਾਂ ਆਖਰੀ ਫਸੇ ਹੋਏ ਕੈਨੇਡੀਅਨਾਂ ਨੂੰ ਵਾਪਿਸ ਲੈ ਕੇ ਆਉਣਾ ਕਾਫੀ ਮੁਸ਼ਕਲ ਹੋਵੇਗਾ। ਉਹਨਾਂ ਆਖਿਆ ਕਿ ਕੌਮਾਂਤਰੀ ਏਅਰਲਾਈਨਜ਼ ਨੂੰ ਇਸ ਲਈ ਨਾਲ ਜੋੜਿਆ ਜਾ ਰਿਹਾ ਹੈ ਕਿਉਂਕਿ ਕੈਨੇਡੀਅਨ ਏਅਰਲਾਈਨਜ਼ ਉਹਨਾਂ ਦੇਸ਼ਾਂ ਜਿਵੇਂ ਕਿ ਫਿਲੀਪੀਨਜ਼, ਭਾਰਤ ਤੇ ਕੁੱਝ ਅਫਰੀਕੀ ਮੁਲਕਾਂ ਵਿੱਚ ਨਹੀਂ ਜਾ ਸਕਦੀਆਂ। ਕੁਝ ਦੇਸ਼ਾਂ ਨੇ ਆਪਣੀਆਂ ਏਅਰਸਪੇਸ ਬੰਦ ਕਰ ਦਿੱਤੀਆਂ ਹਨ ਤੇ ਹੋਰਨਾਂ ਵੱਲੋਂ ਸਰਕਾਰੀ ਦਸਤਾਵੇਜ਼ਾਂ ਤੋਂ ਬਿਨਾ ਲੋਕਾਂ ਨੂੰ ਏਅਰਪੋਰਟਸ ਤੱਕ ਵੀ ਨਹੀਂ ਜਾਣ ਦਿੱਤਾ ਜਾ ਰਿਹਾ।
ਵੱਖ-ਵੱਖ ਥਾਵਾਂ ਤੇ ਫਸ ਚੁੱਕੇ ਨਾਗਰਿਕਾਂ ਨੂੰ ਵਾਪਸ ਲਿਆਉਣ ਲਈ ਕੈਨੇਡਾ ਸਰਕਾਰ ਚੁੱਕ ਰਹੀ ਹੈ ਯੋਗ ਕਦਮ
