ਪੀ.ਏ.ਯੂ. ਦੀ ਵਿਦਿਆਰਥਣ ਨੂੰ ਮਿਲਿਆ ਸਰਵੋਤਮ ਪੋਸਟਰ ਲਈ ਐਵਾਰਡ

ਲੁਧਿਆਣਾ : ਬੀਤੇ ਦਿਨੀਂ ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ ਲੁਧਿਆਣਾ ਦੇ ਰਸਾਇਣਿਕ ਵਿਗਿਆਨ ਵਿਭਾਗ ਵਿੱਚ ਐਮ ਐਸਸੀ ਦੀ ਵਿਦਿਆਰਥਣ ਕੁਮਾਰੀ ਕੋਮਲ ਪਾਂਡੇ ਨੂੰ ਸਰਵੋਤਮ ਪੋਸਟਰ ਬਨਾਉਣ ਲਈ ਐਵਾਰਡ ਮਿਲਿਆ ਹੈ। ਇਹ ਐਵਾਰਡ ਉਸਨੂੰ 23ਵੀਂ ਪੰਜਾਬ ਵਿਗਿਆਨ ਕਾਂਗਰਸ ਦੌਰਾਨ ਮਿਲਿਆ।
ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਵਿਭਾਗ ਦੇ ਮੁਖੀ ਡਾ. ਸੁਚੇਤਾ ਸ਼ਰਮਾ ਨੇ ਦੱਸਿਆ ਕਿ ਕੁਮਾਰੀ ਕੋਮਲ ਪਾਂਡੇ ਨੇ ਸੰਤ ਲੋਂਗੋਵਾਲ ਇੰਸਟੀਚਿਊਟ ਆਫ਼ ਇੰਜਨੀਅਰਿੰਗ ਐਂਡ ਤਕਨਾਲੋਜੀ ਲੋਂਗੋਵਾਲ ਵਿਖੇ ਹੋਏ ਇਸ ਸਮਾਗਮ ਵਿੱਚ ਆਪਣੇ ਖੋਜ ਕਾਰਜ ਨੂੰ ਆਧਾਰ ਬਣਾ ਕੇ ਪੋਸਟਰ ਬਣਾਇਆ ਅਤੇ ਮੁਕਾਬਲੇ ਲਈ ਪੇਸ਼ ਕੀਤਾ। ਜੱਜਾਂ ਨੇ ਇਸ ਪੋਸਟਰ ਨੂੰ ਸਰਵੋਤਮ ਪੋਸਟਰ ਐਲਾਨਿਆ। ਜ਼ਿਕਰਯੋਗ ਹੈ ਕਿ ਕੁਮਾਰੀ ਕੋਮਲ ਪਾਂਡੇ ਸਹਾਇਕ ਪ੍ਰੋਫੈਸਰ ਮਨਪ੍ਰੀਤ ਕੌਰ ਦੀ ਨਿਗਰਾਨੀ ਹੇਠ ਆਪਣਾ ਐਮ ਐਸ ਸੀ ਦਾ ਸ਼ੋਧ ਕਾਰਜ ਕਰ ਰਹੀ ਹੈ।
ਇਸ ਮੌਕੇ ਪੀ.ਏ.ਯੂ. ਦੇ ਡੀਨ ਪੋਸਟ ਗ੍ਰੈਜੂਏਟ ਸਟੱਡੀਜ਼ ਡਾ. ਗੁਰਿੰਦਰ ਕੌਰ ਸਾਂਘਾ ਅਤੇ ਡੀਨ ਬੇਸਿਕ ਸਾਇੰਸਜ਼ ਡਾ. ਸ਼ੰਮੀ ਕਪੂਰ ਨੇ ਕੁਮਾਰੀ ਕੋਮਲ ਪਾਂਡੇ ਅਤੇ ਉਸਦੀ ਨਿਗਰਾਨ ਅਧਿਆਪਕਾਂ ਨੂੰ ਵਧਾਈ ਦਿੰਦਿਆਂ ਰਸਾਇਣ ਵਿਗਿਆਨ ਵਿਭਾਗ ਦੇ ਵਿਦਿਆਰਥੀਆਂ ਨੂੰ ਕੋਮਲ ਪਾਂਡੇ ਤੋਂ ਪ੍ਰੇਰਨਾ ਲੈਣ ਲਈ ਕਿਹਾ ।