ਓਟਵਾ: ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਵਿਰੋਧੀ ਧਿਰ ਦੇ ਆਗੂ ਪਿਅਰੇ ਪੌਇਲੀਐਵਰਾ ਵਿਚਾਲੇ ਬੀਤੇ ਦਿਨੀਂ ਹਾਊਸ ਆਫ਼ ਕਾਮਨਜ਼ ‘ਚ ਤਿੱਖੀ ਬਹਿਸ ਹੋ ਗਈ। ਜਿੱਥੇ ਇੱਕ ਪਾਸੇ ਫੈਡਰਲ ਸਰਕਾਰ ’ਤੇ ਮਹਿੰਗਾਈ ਕੰਟਰੋਲ ਕਰਨ ‘ਚ ਨਾਕਾਮ ਰਹਿਣ ਦੇ ਦੋਸ਼ ਲੱਗੇ, ਉੱਥੇ ਹੀ ਦੂਜੇ ਪਾਸੇ ਪ੍ਰਧਾਨ ਮੰਤਰੀ ਨੇ ਕੰਜ਼ਰਵੇਟਿਵ ਪਾਰਟੀ ਦੇ ਆਗੂ ‘ਤੇ ਕਿਰਾਏ ਭੱਤੇ ਅਤੇ ਦੰਦਾਂ ਦੇ ਸਸਤੇ ਇਲਾਜ ਵਾਲੇ ਬਿੱਲ ਦੇ ਰਾਹ ਵਿਚ ਅੜਿੱਕਾ ਬਣਨ ਦੇ ਦੋਸ਼ ਲਾਏ।
ਜਿਸ ਤੋਂ ਬਾਅਦ ਪੌਇਲੀਐਵਰਾਂ ਨੇ ਟਰੂਡ ਦੇ ਦੋਸ਼ਾਂ ਦਾ ਜਵਾਬ ਦਿੰਦਿਆਂ ਕਿ ਤੁਸੀਂ ਕਿਰਾਏ ਭੱਤੇ ਵਜੋਂ ਘੱਟ ਆਮਦਨ ਵਾਲਿਆਂ ਨੂੰ 500 ਡਾਲਰ ਦੇਣ ਦਾ ਰੌਲਾ ਪਾ ਰਹੇ ਹੋ ਜਦਕਿ ਅਸਲੀਅਤ ਇਹ ਹੈ ਕਿ ਅੱਜ ਕੱਲ ਕੁੱਤੇ ਦਾ ਘਰ ਵੀ 500 ਡਾਲਰ ‘ਚ ਕਿਰਾਏ ‘ਤੇ ਨਹੀਂ ਮਿਲਦਾ। ਇਸ ਤੋਂ ਇਲਾਵਾ ਵਿਰੋਧੀ ਧਿਰ ਨੇ ਕਾਰਬਨ ਟੈਕਸ ਤਿੰਨ ਗੁਣਾਂ ਕਰਨ ਦਾ ਮਸਲਾ ਵੀ ਚੁੱਕ ਲਿਆ।
ਪੌਇਲੀਐਵਰਾ ਨੇ ਕਿਹਾ ਕਿ ਸਰਦ ਰੁੱਤ ‘ਚ ਘਰਾਂ ਨੂੰ ਗਰਮ ਰੱਖਣਾ ਕੋਈ ਐਸ਼ਪ੍ਰਸਤੀ ਨਹੀਂ ਹੁੰਦੀ ਜਿਸ ‘ਤੇ ਟੈਕਸ ਵਧਾਇਆ ਜਾਵੇ ਪਰ ਪ੍ਰਧਾਨ ਮੰਤਰੀ ਲੋਕਾਂ ਨੂੰ ਸਜ਼ਾ ਦੇਣਾਂ ਚਾਹੁੰਦੇ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਜੋ ਪ੍ਰਧਾਨ ਮੰਤਰੀ ਕਾਰਬਨ ਟੈਕਸ ਤਿੰਨ ਗੁਣਾ ਕਰਨਾ ਹੀ ਚਾਹੁੰਦੇ ਹਨ ਤਾਂ ਘੱਟੋਂ-ਘੱਟ ਘਰਾਂ ਦੀ ਹੀਟਿੰਗ ਨੂੰ ਇਸ ਤੋਂ ਛੋਟ ਦਿੱਤੀ ਜਾਵੇ।
ਵਿਰੋਧੀ ਧਿਰ ਦੇ ਹਮਲਿਆਂ ਤੋਂ ਬਾਅਦ ਜਸਟਿਨ ਟਰੂਡੋ ਨੇ ਕਿਹਾ ਕਿ ਜੇ ਟੋਰੀਆਂ ਨੂੰ ਕੈਨੇਡਾ ਵਾਸੀਆਂ ਦਾ ਐਨਾ ਖਿਆਲ ਹੈ ਤਾਂ ਬਿਲ ਸੀ-31 ਦੇ ਰਾਹ ਵਿਚ ਅੜਿੱਕਾ ਨਾ ਪਾਉਣ ਅਤੇ ਇਸ ਨੂੰ ਸਰਬਸੰਮਤੀ ਨਾਲ ਪਾਸ ਕਰ ਦਿੱਤਾ ਜਾਵੇ। ਪ੍ਰਧਾਨ ਮੰਤਰੀ ਨੇ ਦਾਅਵਾ ਕੀਤਾ ਕਿ ਸਰਕਾਰ ਦੀ ਯੋਜਨਾ ਨਾਲ ਘੱਟ ਆਮਦਨ ਵਾਲੇ ਪਰਿਵਾਰਾਂ ਨੂੰ ਆਪਣੇ ਬੱਚਿਆਂ ਦੇ ਦੰਦਾਂ ਦਾ ਸਸਤਾ ਇਲਾਜ ਮਿਲਗਾ ਅਤੇ ਕਿਰਾਏ ਭੱਤੇ ਨਾਲ 18 ਲੱਖ ਲੋਕਾਂ ਦੀ ਜੇਬ ‘ਚ 500-500 ਡਾਲਰ ਜਾਣਗੇ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
