ਨਿਊਜ਼ ਡੈਸਕ: ਅਮਰੀਕੀ ਪੱਤਰਕਾਰ ਅੰਗਦ ਸਿੰਘ ਨੂੰ ਬੁੱਧਵਾਰ ਰਾਤ ਦਿੱਲੀ ਪਹੁੰਚਣ ਤੋਂ ਤੁਰੰਤ ਬਾਅਦ ਵਾਪਸ ਨਿਊਯਾਰਕ ਭੇਜ ਦਿੱਤਾ ਗਿਆ। ਸਿੰਘ ਦੀ ਮਾਤਾ ਗੁਰਮੀਤ ਕੌਰ ਨੇ ਇੱਕ ਫੇਸਬੁੱਕ ਪੋਸਟ ਵਿੱਚ ਇਹ ਦਾਅਵਾ ਕੀਤਾ ਹੈ। ਸਿੰਘ ਦੀ ਮਾਤਾ ਕੌਰ ਮੁਤਾਬਕ ਉਹ ਨਿੱਜੀ ਦੌਰੇ ‘ਤੇ ਭਾਰਤ ਆਏ ਸਨ। ਅੰਗਦ ਸਿੰਘ ਨੇ ‘ਵਾਈਸ’ ਨਿਊਜ਼ ਲਈ ਏਸ਼ੀਆ ਕੇਂਦਰਿਤ ‘ਡਾਕੂਮੈਂਟਰੀ’ ਬਣਾਈ ਸੀ।
ਅੰਗਦ ਸਿੰਘ ਦੀ ਮਾਂ ਨੇ ਕਿਹਾ ਕਿ ‘ਮੇਰਾ ਬੇਟਾ ਅਮਰੀਕੀ ਨਾਗਰਿਕ ਹੈ। ਉਹ 18 ਘੰਟੇ ਦਾ ਸਫਰ ਕਰਕੇ ਦਿੱਲੀ ਪਹੁੰਚਿਆ, ਜਿੱਥੋਂ ਉਸ ਨੇ ਪੰਜਾਬ ਜਾਣਾ ਸੀ। ਪਰ ਉਸ ਨੂੰ ਅਗਲੀ ਫਲਾਈਟ ‘ਤੇ ਵਾਪਸ ਨਿਊਯਾਰਕ ਭੇਜ ਦਿੱਤਾ ਗਿਆ। ਮਾਂ ਨੇ ਦਾਅਵਾ ਕੀਤਾ, “ਉਸਨੇ ਕੋਈ ਕਾਰਨ ਨਹੀਂ ਦੱਸਿਆ। ਪਰ ਅਸੀਂ ਜਾਣਦੇ ਹਾਂ ਕਿ ਇਹ ਉਸਦੀ ਪੁਰਸਕਾਰ ਜੇਤੂ ਪੱਤਰਕਾਰੀ ਦੇ ਡਰੋਂ ਕੀਤਾ ਗਿਆ ਹੈ।
ਸਿੰਘ ਨੇ ਭਾਰਤ ਵਿੱਚ ਕੋਵਿਡ -19 ਮਹਾਂਮਾਰੀ ਅਤੇ ਰੱਦ ਕੀਤੇ ਗਏ ਤਿੰਨ ਖੇਤੀਬਾੜੀ ਕਾਨੂੰਨਾਂ ਵਿਰੁੱਧ ਰਾਸ਼ਟਰੀ ਰਾਜਧਾਨੀ ਦੀਆਂ ਸਰਹੱਦਾਂ ‘ਤੇ ਕਿਸਾਨਾਂ ਦੇ ਵਿਰੋਧ ਪ੍ਰਦਰਸ਼ਨਾਂ ‘ਤੇ ‘ਡਾਕੂਮੈਂਟਰੀ’ ਦੀ ਇੱਕ ਲੜੀ ਬਣਾਈ ਸੀ। ਸਿੰਘ ਦੇ ਦੇਸ਼ ਨਿਕਾਲੇ ‘ਤੇ ਅਜੇ ਤੱਕ ਕੋਈ ਅਧਿਕਾਰਤ ਟਿੱਪਣੀ ਨਹੀਂ ਹੈ।
ਸਿੰਘ ਦੇ ਪਰਿਵਾਰ ਮੁਤਾਬਕ ਪੱਤਰਕਾਰ ਬੁੱਧਵਾਰ ਰਾਤ 8.30 ਵਜੇ ਦਿੱਲੀ ਹਵਾਈ ਅੱਡੇ ‘ਤੇ ਉਤਰਿਆ ਅਤੇ ਤਿੰਨ ਘੰਟਿਆਂ ਦੇ ਅੰਦਰ ਉਸ ਨੂੰ ਡਿਪੋਰਟ ਕਰ ਦਿੱਤਾ ਗਿਆ। ਸਿੰਘ ਦੀ ਮਾਂ ਨੇ ਕਿਹਾ,ਸਿੱਖ ਹੋਣਾ ਆਸਾਨ ਨਹੀਂ ਹੈ। ਸੱਚ ਬੋਲਣ ਦੀ ਕੀਮਤ ਹੁੰਦੀ ਹੈ।
ਅੰਗਦ ਸਿੰਘ ਨੇ ਸੀਏਏ ਅਤੇ ਸ਼ਾਹੀਨ ਬਾਗ ਵਿਰੋਧ ‘ਤੇ ਡਾਕੂਮੈਂਟਰੀ ਵੀ ਬਣਾਈ ਹੈ। ਉਨ੍ਹਾਂ ਦੇ ਪਰਿਵਾਰ ਦੇ ਇਕ ਮੈਂਬਰ ਨੇ ਕਿਹਾ, ‘ਸਰਕਾਰ ਯਕੀਨੀ ਤੌਰ ‘ਤੇ ਦਸਤਾਵੇਜ਼ੀ ਫਿਲਮ ਤੋਂ ਬਹੁਤ ਨਿਰਾਸ਼ ਹੋਵੇਗੀ। ਹਾਲ ਹੀ ‘ਚ ਉਨ੍ਹਾਂ ਨੇ ਦਲਿਤਾਂ ‘ਤੇ ਡਾਕੂਮੈਂਟਰੀ ਬਣਾਉਣ ਲਈ ਵੀਜ਼ਾ ਮੰਗਿਆ ਸੀ ਪਰ ਇਸ ਨੂੰ ਰੱਦ ਕਰ ਦਿੱਤਾ ਗਿਆ ਸੀ। ਹੁਣ ਉਹ ਨਿੱਜੀ ਯਾਤਰਾ ‘ਤੇ ਪਰਿਵਾਰ ਨੂੰ ਮਿਲਣ ਆ ਰਿਹਾ ਸੀ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
