ਨਿਊਜ਼ ਡੈਸਕ: ਅਮਰੀਕਾ ਦੇ ਮਿਨੀਆਪੋਲਿਸ ਦੇ ਇੱਕ ਕੈਥੋਲਿਕ ਸਕੂਲ ਵਿੱਚ ਹੋਈ ਗੋਲੀਬਾਰੀ ਤੋਂ ਬਾਅਦ ਲਗਾਤਾਰ ਨਵੇਂ ਖੁਲਾਸੇ ਹੋ ਰਹੇ ਹਨ। ਬੁੱਧਵਾਰ ਨੂੰ ਹੋਈ ਇਸ ਗੋਲੀਬਾਰੀ ਵਿੱਚ 2 ਬੱਚਿਆਂ ਦੀ ਮੌਤ ਅਤੇ 20 ਤੋਂ ਵੱਧ ਜ਼ਖਮੀ ਹੋ ਗਏ ਹਨ। ਜ਼ਖਮੀਆਂ ਵਿੱਚ 3 ਬਾਲਗ ਵੀ ਸ਼ਾਮਿਲ ਹਨ। ਹਮਲਾਵਰ ਨੇ ਬਾਅਦ ਵਿੱਚ ਆਪਣੇ ਆਪ ਨੂੰ ਵੀ ਗੋਲੀ ਮਾਰ ਲਈ ਸੀ। ਇਸ ਘਟਨਾ ਬਾਰੇ, ਐਫਬੀਆਈ ਡਾਇਰੈਕਟਰ ਨੇ ਕਿਹਾ ਕਿ ਮਿਨੀਆਪੋਲਿਸ ਗੋਲੀਬਾਰੀ ਦੀ ਜਾਂਚ ਘਰੇਲੂ ਅੱਤਵਾਦ ਅਤੇ ਕੈਥੋਲਿਕਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਨਫ਼ਰਤ ਅਪਰਾਧ ਵਜੋਂ ਕੀਤੀ ਜਾ ਰਹੀ ਹੈ।
ਸਕੂਲ ਗੋਲੀਬਾਰੀ ਤੋਂ ਬਾਅਦ, ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਹੁਕਮ ਦਿੱਤਾ ਹੈ ਕਿ ਪੀੜਤਾਂ ਨੂੰ ਸ਼ਰਧਾਂਜਲੀ ਦੇਣ ਲਈ, ਐਤਵਾਰ, 31 ਅਗਸਤ ਨੂੰ ਸੂਰਜ ਡੁੱਬਣ ਤੱਕ ਵ੍ਹਾਈਟ ਹਾਊਸ ਅਤੇ ਦੇਸ਼ ਭਰ ਦੀਆਂ ਹੋਰ ਸਾਰੀਆਂ ਜਨਤਕ ਇਮਾਰਤਾਂ ‘ਤੇ ਸਾਰੇ ਅਮਰੀਕੀ ਝੰਡੇ ਅੱਧੇ ਝੁੱਕੇੇ ਰਹਿਣਗੇ। ਟਰੰਪ ਨੇ ਇਹ ਵੀ ਨਿਰਦੇਸ਼ ਦਿੱਤਾ ਹੈ ਕਿ ਦੁਨੀਆ ਭਰ ਦੇ ਸਾਰੇ ਅਮਰੀਕੀ ਦੂਤਾਵਾਸਾਂ ਅਤੇ ਕੌਂਸਲੇਟਾਂ ‘ਤੇ ਅਮਰੀਕੀ ਝੰਡਾ ਅੱਧਾ ਝੁਕਾਇਆ ਜਾਵੇ।
ਮਿਨੀਆਪੋਲਿਸ ਸ਼ਹਿਰ ਵਿੱਚ ਵਾਪਰੀ ਇਸ ਘਟਨਾ ਬਾਰੇ ਪੁਲਿਸ ਮੁਖੀ ਅਤੇ ਮੇਅਰ ਨੇ ਕਿਹਾ ਕਿ ਗੋਲੀਬਾਰੀ ਦੀ ਘਟਨਾ ਸਕੂਲ ਵਿੱਚ ਪ੍ਰਾਰਥਨਾ ਦੌਰਾਨ ਵਾਪਰੀ ਸੀ। ਮਿਨੀਆਪੋਲਿਸ ਪੁਲਿਸ ਮੁਖੀ ਬ੍ਰਾਇਨ ਓਹਾਰਾ ਨੇ ਕਿਹਾ ਕਿ ਹਮਲਾਵਰ, ਜਿਸ ਵਿੱਚ ਪਿਸਤੌਲ ਸਮੇਤ ਹਥਿਆਰ ਸਨ, ਚਰਚ ਵੱਲ ਤੁਰਿਆ ਅਤੇ ਐਨਾਨਸੀਏਸ਼ਨ ਕੈਥੋਲਿਕ ਸਕੂਲ ਵਿੱਚ ਪ੍ਰਾਰਥਨਾ ਸੇਵਾ ਦੌਰਾਨ ਪਿਊ ਵਿੱਚ ਬੈਠੇ ਬੱਚਿਆਂ ‘ਤੇ ਖਿੜਕੀਆਂ ਰਾਹੀਂ ਗੋਲੀਬਾਰੀ ਕੀਤੀ। ਓਹਾਰਾ ਨੇ ਕਿਹਾ ਕਿ ਗੋਲੀਬਾਰੀ ਕਰਨ ਵਾਲਾ ਸ਼ੱਕੀ ਮਰ ਗਿਆ ਹੈ ਅਤੇ ਉਸਦੀ ਉਮਰ 20 ਸਾਲ ਹੈ। ਮਿਨੀਸੋਟਾ ਦੇ ਸਭ ਤੋਂ ਵੱਡੇ ਐਮਰਜੈਂਸੀ ਵਿਭਾਗ, ਹੇਨੇਪਿਨ ਹੈਲਥਕੇਅਰ ਨੇ ਕਿਹਾ ਕਿ ਉਹ ਗੋਲੀਬਾਰੀ ਵਿੱਚ ਜ਼ਖਮੀ ਹੋਏ ਮਰੀਜ਼ਾਂ ਦਾ ਵੀ ਇਲਾਜ ਕਰ ਰਿਹਾ ਹੈ।
ਮਿਨੀਆਪੋਲਿਸ ਪੁਲਿਸ ਮੁਖੀ ਬ੍ਰਾਇਨ ਓਹਾਰਾ ਦੇ ਤਾਜ਼ਾ ਬਿਆਨ ਦੇ ਅਨੁਸਾਰ ਹਮਲਾਵਰ ਜੋ ਕਿ 20 ਸਾਲ ਦਾ ਸੀ, ਦਾ ਕੋਈ ਵੱਡਾ ਅਪਰਾਧਿਕ ਰਿਕਾਰਡ ਨਹੀਂ ਸੀ। ਉਸਦਾ ਨਾਮ ਰੌਬਿਨ ਵੈਸਟਮੈਨ ਦੱਸਿਆ ਗਿਆ ਹੈ। ਹਮਲਾਵਰ ਨੇ ਚਰਚ ਦੇ ਕੁਝ ਦਰਵਾਜ਼ੇ ਲੱਕੜ ਨਾਲ ਬੰਦ ਕਰ ਦਿੱਤੇ ਸਨ ਅਤੇ ਉੱਥੇ ਇੱਕ ਧੂੰਏਂ ਵਾਲਾ ਬੰਬ ਵੀ ਮਿਲਿਆ ਸੀ, ਪਰ ਕੋਈ ਵਿਸਫੋਟਕ ਨਹੀਂ ਮਿਲਿਆ।
ਦੱਸ ਦੇਈਏ ਕਿ ਹਮਲੇ ਦੌਰਾਨ ਇੱਕ ਬੱਚੇ ਦੀ ਅਨੋਖੀ ਹਿੰਮਤ ਵੀ ਦੇਖੀ ਗਈ। ਪੰਜਵੀਂ ਜਮਾਤ ਦੇ ਵਿਦਿਆਰਥੀ ਵੈਸਟਨ ਹਾਲਸਨੇ ਨੇ ਕਿਹਾ ਕਿ ਉਹ ਡਰ ਦੇ ਮਾਰੇ ਪਿਊ (ਬੈਂਚ) ਦੇ ਹੇਠਾਂ ਲੁਕ ਗਿਆ ਅਤੇ ਉਸਦਾ ਦੋਸਤ ਉਸਨੂੰ ਬਚਾਉਣ ਲਈ ਉਸ ਉੱਤੇ ਲੇਟ ਗਿਆ।ਉਸਦਾ ਦੋਸਤ ਜ਼ਖਮੀ ਹੋ ਗਿਆ ਸੀ ਪਰ ਹੁਣ ਠੀਕ ਹੈ। ਵੈਸਟਨ ਨੇ ਕਿਹਾ ਕਿ ਉਹ ਜ਼ਖਮੀ ਬੱਚਿਆਂ ਅਤੇ ਬਾਲਗਾਂ ਲਈ ਪ੍ਰਾਰਥਨਾ ਕਰ ਰਿਹਾ ਹੈ।
