ਵੈਨਕੂਵਰ: ਬੀ.ਸੀ. ‘ਚ ਸ਼ਨਿਵਾਰ ਤੋਂ ਸ਼ੁਰੂ ਹੋਣ ਵਾਲੀ ਹੜਤਾਲ ਕੈਨੇਡੀਅਨ ਅਰਥਚਾਰੇ ਦਾ ਵੱਡਾ ਨੁਕਸਾਨ ਕਰ ਸਕਦੀ ਹੈ। ਹੜਤਾਲ ਹੋਣ ਕਾਰਨ ਕੈਨੇਡਾ ਦੇ ਵੈਸਟ ਕੋਸਟ ’ਤੇ ਕੰਟੇਨਰਾਂ ਦੇ ਢੇਰ ਲੱਗ ਜਾਣਗੇ ਅਤੇ ਪੂਰੇ ਮੁਲਕ ‘ਚ ਕੀਮਤਾਂ ਵਧ ਸਕਦੀਆਂ ਹਨ। ਕਾਰਗੋ ਲੋਡਰਜ਼ ਦੀ ਯੂਨੀਅਨ ਮਹਿੰਗਾਈ ਭੱਤੇ ਦੇ ਇਵਜ਼ ‘ਚ ਬਿਹਤਰ ਮੁਆਵਜ਼ੇ ਦੀ ਮੰਗ ਕਰ ਰਹੀ ਹੈ ਅਤੇ ਬੁੱਧਵਾਰ ਨੂੰ 72 ਘੰਟੇ ਦਾ ਨੋਟਿਸ ਦਿੱਤਾ ਗਿਆ ਸੀ। ਫਿਲਹਾਲ ਮੰਗਾਂ ਦੇ ਮਸਲੇ ‘ਤੇ ਕੋਈ ਸਮਝੌਤਾ ਹੋਣ ਦੇ ਆਸਰ ਨਜ਼ਰ ਨਹੀਂ ਆ ਰਹੇ।
ਬੀ.ਸੀ. ਦੀਆਂ ਬੰਦਰਗਾਹਾਂ ਰਾਹੀਂ ਰੋਜ਼ਾਨਾ 800 ਮਿਲੀਅਨ ਡਾਲਰ ਮੁੱਲ ਦੀਆਂ ਵਸਤਾਂ ਆਉਂਦੀਆਂ-ਜਾਂਦੀਆਂ ਹਨ ਅਤੇ ਕੈਨੇਡਾ ਦੇ ਕੁੱਲ ਵਪਾਰ ਦਾ 25 ਫ਼ੀਸਦੀ ਇਥੋਂ ਹੀ ਹੁੰਦਾ ਹੈ। 30 ਬੰਦਰਗਾਹਾਂ ‘ਤੇ ਕੰਮ ਕਰਦੇ ਤਕਰੀਬਨ ਸਾਢੇ ਸੱਤ ਹਜ਼ਾਰ ਕਾਰਗੋ ਲੋਡਰਜ਼ ਸਮਾਨ ਲੱਦਣ ਅਤੇ ਉਤਾਰਨ ਵਿਚ ਅਹਿਮ ਭੂਮਿਕਾ ਅਦਾ ਕਰਦੇ ਹਨ ਅਤੇ ਹੜਤਾਲ ਸ਼ੁਰੂ ਹੋਈ ਤਾਂ ਰੋਜ਼ਾਨਾ ਲੱਖਾਂ ਡਾਲਰ ਦਾ ਨੁਕਸਾਨ ਹੋਵੇਗਾ। ਥੋੜੇ ਦਿਨਾਂ ਹੀ ਹੜਤਾਲ ਹੀ ਵੱਡਾ ਅਸਰ ਪਾਉਣ ਦੀ ਤਾਕਤ ਰਖਦੀ ਹੈ ਅਤੇ ਜੇ ਹੜਤਾਲ ਲੰਮੀ ਚੱਲੀ ਤਾਂ ਨੁਕਸਾਨ ਬਹੁਤ ਜ਼ਿਆਦਾ ਹੋਵੇਗਾ।
ਏਸ਼ੀਆ ਤੋਂ ਆਉਣ ਵਾਲਾ ਸਮਾਨ ਬੀ.ਸੀ. ਦੀਆਂ ਬੰਦਰਗਾਹਾਂ ‘ਤੇ ਹੀ ਉਤਰਦਾ ਹੈ ਅਤੇ ਕੈਨੇਡੀਅਨ ਉਤਪਾਦ ਵੀ ਇਥੋਂ ਹੀ ਰਵਾਨਾ ਕੀਤੇ ਜਾਂਦੇ ਹਨ।ਸਭ ਤੋਂ ਵੱਡਾ ਅਸਰ ਆਟੋ ਸੈਕਟਰ ਅਤੇ ਰਿਟੇਲ ਸੈਕਟਰ ‘ਚ ਸਾਹਮਣੇ ਆ ਸਕਦਾ ਹੈ ਜੋ ਦਰਾਮਦਾਂ ‘ਤੇ ਨਿਰਭਰ ਹਨ। ਇਸ ਤੋਂ ਇਲਾਵਾ ਕਿੰਗ ਅਤੇ ਵੇਅਰਹਾਊਸਿੰਗ ਉਦਯੋਗ ਵੀ ਪ੍ਰਭਾਵਤ ਹੋਣਗੇ। ਕੰਮ ਨਾ ਹੋਣ ਦੀ ਸੂਰਤ ਵਿਚ ਟਰੱਕ ਡਰਾਈਵਰਾਂ ਦੀ ਦਿਹਾੜੀ ਬੰਦ ਹੋ ਸਕਦੀ ਹੈ। ਹਾਲਾਤ ਨੂੰ ਵੇਖਦਿਆਂ ਦੋਹਾਂ ਧਿਰਾਂ ਨੂੰ ਕਿਸੇ ਨਾ ਕਿਸੇ ਸਮਝੌਤੇ ‘ਤੇ ਪੁੱਜਣ ਦਾ ਸੱਦਾ ਦਿਤਾ ਜਾ ਰਿਹਾ ਹੈ। ਕੈਨੇਡੀਅ ਚੈਂਬਰ ਆਫ਼ ਕਾਮਰਸ ਦਾ ਕਹਿਣਾ ਹੈ ਕਿ ਬੀ.ਸੀ. ਪੋਰਟ ਵਰਕਰਜ਼ ਯੂਨੀਅਨ ਵੱਲੋਂ ਹੜਤਾਲ ਦਾ ਨੋਟਿਸ ਡੂੰਘੀਆਂ ਚਿੰਤਾਵਾਂ ਪੈਦਾ ਕਰਦਾ ਹੈ। ਵਪਾਰਕ ਜਥੇਬੰਦੀਆਂ ਵੱਲੋਂ ਫੈਡਰ ਸਰਕਾਰ ਨੂੰ ਹੜਤਾਲ ਰੁਕਵਾਉਣ ਲਈ ਹਰ ਸੰਭਵ ਕਦਮ ਉਠਾਉਣ ਦੀ ਅਪੀਲ ਕੀਤੀ ਗਈ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
