ਕੈਲੀਫੋਰਨੀਆ ਦੇ ਔਰੇਂਜ ਕਾਉਂਟੀ ਵਿੱਚ ਐਮਰਜੈਂਸੀ ਦੀ ਸਥਿਤੀ, ਫੈਕਟਰੀ ਦੇ ਇੱਕ ਰਸਾਇਣਕ ਟੈਂਕ ਵਿੱਚ ਧਮਾਕੇ ਦਾ ਖ਼ਤਰਾ

ਨਿਊਜ਼ ਡੈਸਕ: ਕੈਲੀਫੋਰਨੀਆ ਦੇ ਗਵਰਨਰ ਗੇਵਿਨ ਨਿਊਸਮ ਨੇ ਔਰੇਂਜ ਕਾਉਂਟੀ ਵਿੱਚ ਐਮਰਜੈਂਸੀ ਦੀ ਸਥਿਤੀ ਦਾ ਐਲਾਨ ਕੀਤਾ ਹੈ।ਗਾਰਡਨ ਗਰੋਵ ਖੇਤਰ ਵਿੱਚ ਇੱਕ ਏਰੋਸਪੇਸ ਨਿਰਮਾਣ ਫੈਕਟਰੀ ਵਿੱਚ ਖਤਰਨਾਕ ਉਦਯੋਗਿਕ ਰਸਾਇਣਾਂ ਵਾਲੇ ਟੈਂਕ ਖ਼ਤਰਨਾਕ ਪੱਧਰ ਤੱਕ ਗਰਮ ਹੋ ਗਏ ਹਨ, ਅਤੇ ਐਮਰਜੈਂਸੀ ਟੀਮਾਂ ਉਨ੍ਹਾਂ ਨੂੰ ਠੰਡਾ ਕਰਨ ਲਈ ਅਣਥੱਕ ਮਿਹਨਤ ਕਰ ਰਹੀਆਂ ਹਨ। ਇਨ੍ਹਾਂ ਰਸਾਇਣਕ ਟੈਂਕਾਂ ਨੂੰ ਠੰਡਾ ਨਾ ਕਰਨ ਨਾਲ ਇੱਕ ਵੱਡਾ ਹਾਦਸਾ ਹੋ ਸਕਦਾ ਹੈ।

ਰਿਪੋਰਟ ਅਨੁਸਾਰ ਨਿਊਸਮ ਨੇ ਸ਼ਨੀਵਾਰ ਨੂੰ ਇੱਕ ਬਿਆਨ ਵਿੱਚ ਕਿਹਾ, “ਔਰੇਂਜ ਕਾਉਂਟੀ ਦੇ ਲੋਕਾਂ ਦੀ ਸੁਰੱਖਿਆ ਸਾਡੀ ਸਭ ਤੋਂ ਵੱਡੀ ਤਰਜੀਹ ਹੈ।” ਉਨ੍ਹਾਂ ਕਿਹਾ ਕਿ ਕੈਲੀਫੋਰਨੀਆ ਸਰਕਾਰ ਰਾਹਤ ਟੀਮਾਂ ਅਤੇ ਪ੍ਰਭਾਵਿਤ ਲੋਕਾਂ ਦੀ ਸਹਾਇਤਾ ਲਈ ਹਰ ਸੰਭਵ ਸਰੋਤ ਦੀ ਵਰਤੋਂ ਕਰ ਰਹੀ ਹੈ। ਗਵਰਨਰ ਗੇਵਿਨ ਨਿਊਸਮ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X ‘ਤੇ ਲਿਖਿਆ “ਮੈਂ ਔਰੇਂਜ ਕਾਉਂਟੀ ਵਿੱਚ ਐਮਰਜੈਂਸੀ ਦੀ ਸਥਿਤੀ ਦਾ ਐਲਾਨ ਕਰ ਰਿਹਾ ਹਾਂ ਕਿਉਂਕਿ ਕੈਲੀਫੋਰਨੀਆ ਗਾਰਡਨ ਗਰੋਵ ਵਿੱਚ ਹੋਏ ਘਾਤਕ ਰਸਾਇਣਕ ਹਾਦਸੇ ਨੂੰ ਨਿਪਟਨ ‘ਚ ਜੁਟੇ ਹੋਏ ਹਨ। ਰਾਜ ਏਜੰਸੀਆਂ ਜਨਤਕ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਸਥਾਨਿਕ ਅਧਿਕਾਰੀਆਂ ਅਤੇ ਪ੍ਰਭਾਵਿਤ ਭਾਈਚਾਰਿਆਂ ਦੀ ਸਹਾਇਤਾ ਕਰ ਰਹੀਆਂ ਹਨ। ਕਿਰਪਾ ਕਰਕੇ ਐਮਰਜੈਂਸੀ ਅਧਿਕਾਰੀਆਂ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕਰਦੇ ਰਹੋ।

ਇਸ ਐਮਰਜੈਂਸੀ ਆਦੇਸ਼ ਨਾਲ, ਰਾਜ ਸਰਕਾਰ ਹੁਣ ਵਧੇਰੇ ਸਰੋਤ ਜੁਟਾ ਸਕੇਗੀ ਅਤੇ ਸਥਾਨਿਕ, ਰਾਜ ਅਤੇ ਸੰਘੀ ਏਜੰਸੀਆਂ ਵਿਚਕਾਰ ਤੇਜ਼ ਤਾਲਮੇਲ ਹੋਵੇਗਾ। ਇਹ ਸੰਕਟ ਗਾਰਡਨ ਗਰੋਵ ਦੇ GKN ਏਰੋਸਪੇਸ ਪਲਾਂਟ ਵਿੱਚ ਵਾਪਰਿਆ, ਜਿੱਥੇ ਮਿਥਾਈਲ ਮੈਥਾਕ੍ਰਾਈਲੇਟ (MMA) ਨਾਮਕ ਰਸਾਇਣ ਵਾਲੇ ਟੈਂਕ ਦਾ ਤਾਪਮਾਨ, ਜੋ ਕਿ ਐਕ੍ਰੀਲਿਕ ਪਲਾਸਟਿਕ ਅਤੇ ਏਰੋਸਪੇਸ ਨਿਰਮਾਣ ਵਿੱਚ ਵਰਤਿਆ ਜਾਣ ਵਾਲਾ ਇੱਕ ਬਹੁਤ ਹੀ ਜਲਣਸ਼ੀਲ ਉਦਯੋਗਿਕ ਰਸਾਇਣ ਹੈ, ਕਈ ਦਿਨਾਂ ਤੋਂ ਅਸਥਿਰ ਹੈ।

ਖਰਾਬ ਟੈਂਕ ਦੇ ਅੰਦਰ ਤਾਪਮਾਨ ਵਧਣ ਕਾਰਨ ਸਥਿਤੀ ਹੁਣ ਹੋਰ ਗੰਭੀਰ ਹੁੰਦੀ ਜਾ ਰਹੀ ਹੈ। ਇੱਕ ਦਿਨ ਪਹਿਲਾਂ 77 ਡਿਗਰੀ ਫਾਰਨਹੀਟ (25 ਡਿਗਰੀ ਸੈਲਸੀਅਸ) ਤੋਂ, ਇਹ ਹੁਣ ਲਗਭਗ 90 ਡਿਗਰੀ ਫਾਰਨਹੀਟ (32.22 ਡਿਗਰੀ ਸੈਲਸੀਅਸ) ਤੱਕ ਪਹੁੰਚ ਗਿਆ ਹੈ। ਅੱਗ ਬੁਝਾਊ ਅਧਿਕਾਰੀਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਤਾਪਮਾਨ ਵਧਦਾ ਰਿਹਾ, ਤਾਂ ਦੋ ਵੱਡੇ ਖ਼ਤਰੇ ਪੈਦਾ ਹੋ ਸਕਦੇ ਹਨ: ਜਾਂ ਤਾਂ ਟੈਂਕ ਫਟ ਸਕਦਾ ਹੈ ਅਤੇ ਜ਼ਹਿਰੀਲੇ ਰਸਾਇਣ ਬਾਹਰ ਨਿਕਲ ਸਕਦੇ ਹਨ, ਜਾਂ ਇੱਕ ਵੱਡਾ ਧਮਾਕਾ ਹੋ ਸਕਦਾ ਹੈ, ਜਿਸ ਨਾਲ ਨੇੜੇ ਦੇ ਹੋਰ ਰਸਾਇਣਕ ਟੈਂਕਾਂ ਦੇ ਫਟਣ ਦਾ ਖ਼ਤਰਾ ਹੋ ਸਕਦਾ ਹੈ।