ਨਵੀ ਦਿੱਲੀ : 1 ਅਪ੍ਰੈਲ ਦਾ ਦਿਨ ਸਾਡੇ ਦੇਸ਼ ਵਿੱਚ ਸਿਰਫ਼ ਨਵੇਂ ਵਿੱਤੀ ਸਾਲ ਦੀ ਸ਼ੁਰੂਆਤ ਹੀ ਨਹੀਂ ਹੁੰਦਾ, ਸਗੋਂ ਇਹ ਉਹ ਦਿਨ ਹੁੰਦਾ ਹੈ ਜਦੋਂ ਤੁਹਾਡੀ ਜੇਬ, ਤੁਹਾਡੇ ਬੈਂਕ ਬੈਲੇਂਸ ਅਤੇ ਤੁਹਾਡੀ ਜੀਵਨ ਸ਼ੈਲੀ ਨਾਲ ਜੁੜੇ ਕਈ ਨਿਯਮ ਬਦਲ ਜਾਂਦੇ ਹਨ। ਸਾਲ 2026 ਦੀ ਇਹ ਪਹਿਲੀ ਅਪ੍ਰੈਲ ਕੁਝ ਜ਼ਿਆਦਾ ਹੀ ਖ਼ਾਸ ਹੈ ਕਿਉਂਕਿ ਇਸ ਵਾਰ ਸਰਕਾਰ ਕਈ ਦਹਾਕੇ ਪੁਰਾਣੇ ਕਾਨੂੰਨਾਂ ਨੂੰ ਬਦਲ ਕੇ ਨਵੇਂ ਨਿਯਮ ਲਾਗੂ ਕਰਨ ਜਾ ਰਹੀ ਹੈ। ਚਾਹੇ ਉਹ ਤੁਹਾਡੀ ਸੈਲਰੀ ਸਲਿੱਪ ਹੋਵੇ, ਰੇਲਵੇ ਦੀ ਕਨਫਰਮ ਟਿਕਟ ਹੋਵੇ, UPI ਟ੍ਰਾਂਜ਼ੈਕਸ਼ਨ ਹੋਵੇ ਜਾਂ ਫਿਰ ਤੁਹਾਡੇ ਬਟੂਏ ਵਿੱਚ ਰੱਖਿਆ ਕ੍ਰੈਡਿਟ ਕਾਰਡ – ਸਭ ‘ਤੇ ਅਸਰ ਪੈਣ ਵਾਲਾ ਹੈ।
ਐਲਪੀਜੀ ਦੀਆਂ ਕੀਮਤਾਂ
ਹਰ ਮਹੀਨੇ ਦੀ ਪਹਿਲੀ ਤਾਰੀਖ਼ ਨੂੰ ਘਰੇਲੂ ਗੈਸ ਸਿਲੰਡਰ ਦੀਆਂ ਕੀਮਤਾਂ ਵਿੱਚ ਬਦਲਾਅ ਦੇਖਣ ਨੂੰ ਮਿਲਦਾ ਹੈ। ਪੂਰੇ ਦੇਸ਼ ਨੂੰ ਇਸ ਗੱਲ ਦਾ ਇੰਤਜ਼ਾਰ ਸੀ ਕਿ ਕੀ ਪਹਿਲੀ ਤਾਰੀਖ਼ ਨੂੰ ਪੈਟਰੋਲੀਅਮ ਕੰਪਨੀਆਂ ਘਰੇਲੂ ਗੈਸ ਸਿਲੰਡਰ ਦੀਆਂ ਕੀਮਤਾਂ ਵਿੱਚ ਵਾਧਾ ਕਰਨਗੀਆਂ ਜਾਂ ਨਹੀਂ। ਪਰ ਇਸ ਵਾਰ ਆਮ ਲੋਕਾਂ ਨੂੰ ਰਾਹਤ ਮਿਲਦੀ ਹੋਈ ਦਿਖਾਈ ਦਿੱਤੀ ਅਤੇ ਘਰੇਲੂ ਐਲਪੀਜੀ ਦੀਆਂ ਕੀਮਤਾਂ ‘ਚ ਕੋਈ ਬਦਲਾਅ ਨਹੀਂ ਹੋਇਆ। ਪਰ ਕਮਰਸ਼ੀਅਲ ਗੈਸ ਸਿਲੰਡਰ ਦੀਆਂ ਕੀਮਤਾਂ ਵਿੱਚ ਔਸਤਨ 200 ਰੁਪਏ ਤਕ ਦਾ ਵਾਧਾ ਹੋਇਆ ਹੈ, ਜਿਸ ਤੋਂ ਬਾਅਦ ਦੇਸ਼ ਵਿੱਚ ਕੀਮਤ 2,200 ਰੁਪਏ ਪ੍ਰਤੀ ਸਿਲੰਡਰ ਤੱਕ ਪਹੁੰਚ ਗਈ ਹੈ।
ਜੈੱਟ ਈਂਧਨ ਦੀਆਂ ਕੀਮਤਾਂ
ਮੌਜੂਦਾ ਸਮੇਂ ਵਿੱਚ ਜੈੱਟ ਫਿਊਲ (ਏਵੀਏਸ਼ਨ ਫਿਊਲ) ਦੀਆਂ ਕੀਮਤਾਂ ਵੀ ਕਾਫ਼ੀ ਅਹਿਮ ਹੋ ਗਈਆਂ ਹਨ। ਇਸ ਦਾ ਅਸਰ ਏਅਰਲਾਈਨਾਂ ਦੇ ਸੰਚਾਲਨ ਖਰਚੇ ਅਤੇ ਆਮ ਲੋਕਾਂ ਦੀ ਜੇਬ ‘ਤੇ ਸਾਫ਼ ਦੇਖਣ ਨੂੰ ਮਿਲਦਾ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਵਾਰ ਪੈਟਰੋਲੀਅਮ ਕੰਪਨੀਆਂ ਵੱਲੋਂ ਜੈੱਟ ਫਿਊਲ ਦੀਆਂ ਕੀਮਤਾਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ।
ਟਰੇਨ ਟਿਕਟ ਕੈਂਸਲ ਨਿਯਮ
ਟਰੇਨ ‘ਚ ਸਫ਼ਰ ਕਰਨ ਵਾਲਿਆਂ ਲਈ ਵੀ ਨਿਯਮ ਬਦਲ ਰਹੇ ਹਨ। ਰੇਲਵੇ ਨੇ ਟਿਕਟ ਕੈਂਸਲੇਸ਼ਨ ਨੂੰ ਲੈ ਕੇ ਸਖ਼ਤ ਰੁਖ ਅਪਣਾਇਆ ਹੈ। ਹੁਣ ਜੇਕਰ ਤੁਸੀਂ ਟ੍ਰੇਨ ਛੁੱਟਣ ਤੋਂ 8 ਤੋਂ 24 ਘੰਟੇ ਪਹਿਲਾਂ ਟਿਕਟ ਰੱਦ ਕਰਵਾਉਂਦੇ ਹੋ, ਤਾਂ ਸਿਰਫ਼ 50% ਰਿਫੰਡ ਹੀ ਮਿਲੇਗਾ। ਅਤੇ ਜੇਕਰ ਸਮਾਂ 8 ਘੰਟੇ ਤੋਂ ਘੱਟ ਬਚਿਆ ਹੈ, ਤਾਂ ਸਮਝ ਲਓ ਕਿ ਤੁਹਾਨੂੰ ਕੋਈ ਰਿਫੰਡ ਨਹੀਂ ਮਿਲੇਗਾ।
FASTag ਫੀਸ
ਹੁਣ ਸੜਕਾਂ ‘ਤੇ ਟੋਲ ਪਲਾਜ਼ਾ ਦਾ ਸਫ਼ਰ ਵੀ ਮਹਿੰਗਾ ਹੋ ਗਿਆ ਹੈ। NHAI ਨੇ ਗੈਰ-ਵਪਾਰਕ ਵਾਹਨਾਂ ਲਈ ਫਾਸਟੈਗ (FASTag) ਦੇ ਸਾਲਾਨਾ ਪਾਸ ਦੀ ਕੀਮਤ 3,000 ਰੁਪਏ ਤੋਂ ਵਧਾ ਕੇ 3,075 ਰੁਪਏ ਕਰ ਦਿੱਤੀ ਹੈ। ਇਹ ਪਾਸ ਇੱਕ ਸਾਲ ਜਾਂ 200 ਵਾਰ ਟੋਲ ਪਾਰ ਕਰਨ ਤੱਕ ਵੈਧ ਰਹੇਗਾ।
PAN ਕਾਰਡ ਬਣਵਾਉਣ ਦੇ ਨਿਯਮਾਂ ਚ ਬਦਲਾਅ
ਹੁਣ ਨਵਾਂ ਪੈਨ ਕਾਰਡ ਬਣਵਾਉਣ ਲਈ ਆਧਾਰ ਕਾਰਡ ਨੂੰ ‘ਜਨਮ ਮਿਤੀ’ ਦਾ ਇਕਲੌਤਾ ਸਬੂਤ ਨਹੀਂ ਮੰਨਿਆ ਜਾਵੇਗਾ। ਤੁਹਾਨੂੰ 10ਵੀਂ ਦਾ ਸਰਟੀਫਿਕੇਟ, ਪਾਸਪੋਰਟ ਜਾਂ ਜਨਮ ਪ੍ਰਮਾਣ ਪੱਤਰ ਦੇਣਾ ਹੋਵੇਗਾ। ਇਸ ਤੋਂ ਇਲਾਵਾ ਕ੍ਰੈਡਿਟ ਸਕੋਰ ਦੇ ਮਾਮਲੇ ਵਿੱਚ ਵੀ ਹੁਣ ਬੈਂਕ ਹਰ ਹਫ਼ਤੇ ਤੁਹਾਡੀ ਰਿਪੋਰਟ ਅਪਡੇਟ ਕਰਨਗੇ, ਜਿਸ ਨਾਲ ਤੁਹਾਡਾ ਕ੍ਰੈਡਿਟ ਸਕੋਰ ਹੋਰ ਵੀ ਸਹੀ ਅਤੇ ਸਟੀਕ ਦਿਖਾਈ ਦੇਵੇਗਾ।
ਗੱਡੀਆਂ ਦੀਆਂ ਨਵੀਆਂ ਕੀਮਤਾਂ
31 ਮਾਰਚ ਤੱਕ ਪੁਰਾਣੇ ਸਟਾਕ ਅਤੇ ਪੁਰਾਣੀਆਂ ਕੀਮਤਾਂ ‘ਤੇ ਗੱਡੀਆਂ ਮਿਲ ਰਹੀਆਂ ਸਨ। ਅੱਜ 1 ਅਪ੍ਰੈਲ ਤੋਂ ਕਮਰਸ਼ੀਅਲ ਅਤੇ ਪੈਸੰਜਰ ਗੱਡੀਆਂ ਦੀਆਂ ਕੀਮਤਾਂ 2% ਤੋਂ 3% ਤੱਕ ਵਧ ਗਈਆਂ ਹਨ।
