ਮੇਘਾਲਿਆ ਵਿੱਚ ਇੰਦੌਰ ਦੇ ਕਾਰੋਬਾਰੀ ਰਾਜਾ ਰਘੂਵੰਸ਼ੀ ਦੇ ਕਤਲ ਮਾਮਲੇ ਵਿੱਚ ਮਹੱਤਵਪੂਰਨ ਜਾਣਕਾਰੀ ਸਾਹਮਣੇ ਆਈ ਹੈ। ਪੁਲਿਸ ਨੇ ਕਤਲ ਵਿੱਚ ਵਰਤਿਆ ਹਥਿਆਰ, ਇੱਕ ਦਾਤ ਨੂੰ ਬਰਾਮਦ ਕਰ ਲਿਆ ਹੈ, ਜਿਸ ਨਾਲ ਰਾਜਾ ਦਾ ਬੇਰਹਿਮੀ ਨਾਲ ਕਤਲ ਕੀਤਾ ਗਿਆ ਸੀ। ਇਸ ਹਥਿਆਰ ਦੀ ਤਸਵੀਰ ਵੀ ਜਨਤਕ ਹੋਈ ਹੈ। ਜਾਂਚ ਅਨੁਸਾਰ, ਰਾਜਾ ’ਤੇ ਇਸ ਹਥਿਆਰ ਨਾਲ ਕਈ ਵਾਰ ਹਮਲੇ ਕੀਤੇ ਗਏ, ਜਿਸ ਵਿੱਚ ਪਹਿਲਾ ਵਾਰ ਆਰੋਪੀ ਵਿਸ਼ਾਲ ਚੌਹਾਨ ਨੇ ਕੀਤਾ।
ਸੂਤਰਾਂ ਮੁਤਾਬਕ, ਰਾਜਾ ਨੇ ਆਪਣੀ ਜਾਨ ਬਚਾਉਣ ਲਈ ਸੰਘਰਸ਼ ਕੀਤਾ, ਪਰ ਹਮਲਾਵਰਾਂ ਨੇ ਉਸ ਨੂੰ ਬੇਰਹਿਮੀ ਨਾਲ ਮਾਰ ਸੁੱਟਿਆ। ਇਸ ਦੌਰਾਨ, ਆਰੋਪੀ ਆਕਾਸ਼ ਰਾਜਪੂਤ ਦੀ ਕਮੀਜ਼ ’ਤੇ ਖੂਨ ਦੇ ਧੱਬੇ ਲੱਗ ਗਏ, ਜੋ ਜਾਂਚ ਵਿੱਚ ਸਬੂਤ ਵਜੋਂ ਸਾਹਮਣੇ ਆਏ। ਪੁਲਿਸ ਨੇ ਪਤਾ ਲਗਾਇਆ ਹੈ ਕਿ ਇਹ ਹਥਿਆਰ ਗੁਹਾਟੀ ਰੇਲਵੇ ਸਟੇਸ਼ਨ ਨੇੜਿਓਂ ਖਰੀਦਿਆ ਗਿਆ ਸੀ ਅਤੇ ਇਸ ਨੂੰ ਅਪਰਾਧ ਸਥਾਨ ਤੋਂ ਬਰਾਮਦ ਕੀਤਾ ਗਿਆ।
ਕੀ ਹੈ ਮਾਮਲੇ ਦੀ ਪੂਰੀ ਕਹਾਣੀ?
ਇੰਦੌਰ ਦਾ ਟਰਾਂਸਪੋਰਟ ਕਾਰੋਬਾਰੀ ਰਾਜਾ ਰਘੂਵੰਸ਼ੀ (29) ਆਪਣੀ ਪਤਨੀ ਸੋਨਮ (25) ਨਾਲ ਹਨੀਮੂਨ ਮਨਾਉਣ 21 ਮਈ 2025 ਨੂੰ ਮੇਘਾਲਿਆ ਗਿਆ ਸੀ। ਦੋਵਾਂ ਦਾ ਵਿਆਹ 11 ਮਈ ਨੂੰ ਇੰਦੌਰ ਵਿੱਚ ਹੋਇਆ ਸੀ। 23 ਮਈ ਨੂੰ ਉਹ ਮੇਘਾਲਿਆ ਦੇ ਸੋਹਰਾ (ਚੇਰਾਪੂੰਜੀ) ਖੇਤਰ ਵਿੱਚ ਲਾਪਤਾ ਹੋ ਗਏ। 2 ਜੂਨ ਨੂੰ ਰਾਜਾ ਦੀ ਲਾਸ਼ ਵੇਈਸਾਵਡੌਂਗ ਝਰਨੇ ਨੇੜੇ ਇੱਕ ਡੂੰਘੀ ਖੱਡ ਵਿੱਚ ਮਿਲੀ, ਜਦਕਿ ਸੋਨਮ ਦਾ ਕੋਈ ਸੁਰਾਗ ਨਹੀਂ ਲੱਗਾ।
ਸੋਨਮ ਦੀ ਗੁੰਮਸ਼ੁਦਗੀ ਤੋਂ ਆਤਮ ਸਮਰਪਣ ਤੱਕ
ਰਾਜਾ ਦੇ ਕਤਲ ਤੋਂ ਬਾਅਦ ਸੋਨਮ ਲਾਪਤਾ ਸੀ, ਪਰ 7 ਜੂਨ ਨੂੰ ਉਸ ਨੇ ਉੱਤਰ ਪ੍ਰਦੇਸ਼ ਦੇ ਗਾਜ਼ੀਪੁਰ ਵਿੱਚ ਨੰਦਗੰਜ ਪੁਲਿਸ ਸਟੇਸ਼ਨ ਵਿੱਚ ਆਤਮ ਸਮਰਪਣ ਕਰ ਦਿੱਤਾ। ਮੇਘਾਲਿਆ ਪੁਲਿਸ ਨੇ ਸੋਨਮ ਨੂੰ ਹਿਰਾਸਤ ਵਿੱਚ ਲੈ ਲਿਆ। ਸੋਨਮ ਦੇ ਨਾਲ-ਨਾਲ ਉਸ ਦੇ ਕਥਿਤ ਪ੍ਰੇਮੀ ਰਾਜ ਕੁਸ਼ਵਾਹ (20) ਅਤੇ ਤਿੰਨ ਹੋਰ ਵਿਸ਼ਾਲ ਚੌਹਾਨ, ਆਕਾਸ਼ ਰਾਜਪੂਤ, ਅਤੇ ਅਨੰਦ ਕੁਰਮੀ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ। ਪੁਲਿਸ ਮੁਤਾਬਕ, ਇਹ ਸਾਜ਼ਿਸ਼ ਇੰਦੌਰ ਵਿੱਚ ਵਿਆਹ ਤੋਂ ਪਹਿਲਾਂ ਹੀ ਰਚੀ ਗਈ ਸੀ, ਜਿਸ ਵਿੱਚ ਸੋਨਮ ਨੇ ਕੁਸ਼ਵਾਹ ਅਤੇ ਉਸ ਦੇ ਦੋਸਤਾਂ ਨਾਲ ਮਿਲ ਕੇ ਰਾਜਾ ਦਾ ਕਤਲ ਕੀਤਾ।
