ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਮਹਾਰਾਸ਼ਟਰ ਚੋਣਾਂ ਵਿੱਚ ਮੈਚ ਫਿਕਸਿੰਗ ਦਾ ਦੋਸ਼ ਲਗਾਇਆ ਸੀ, ਜਿਸ ਦਾ ਜਵਾਬ ਚੋਣ ਕਮਿਸ਼ਨ ਨੇ ਸ਼ਨੀਵਾਰ (07 ਜੂਨ, 2025) ਨੂੰ ਦਿੱਤਾ। ਚੋਣ ਕਮਿਸ਼ਨ ਨੇ ਕਿਹਾ ਕਿ ਮਹਾਰਾਸ਼ਟਰ ਦੀ ਵੋਟਰ ਸੂਚੀ ‘ਤੇ ਬੇਬੁਨਿਆਦ ਦੋਸ਼ ਲਗਾਉਣਾ ਕਾਨੂੰਨੀ ਸ਼ਾਸਨ ਦੀ ਤੌਹੀਨ ਹੈ।
ਚੋਣ ਕਮਿਸ਼ਨ ਨੇ ਦੱਸਿਆ, “ਕਮਿਸ਼ਨ ਨੇ 24 ਦਸੰਬਰ 2024 ਨੂੰ ਕਾਂਗਰਸ ਨੂੰ ਦਿੱਤੇ ਜਵਾਬ ਵਿੱਚ ਸਾਰੇ ਤੱਥ ਸਪੱਸ਼ਟ ਕਰ ਦਿੱਤੇ ਸਨ, ਜੋ ਕਮਿਸ਼ਨ ਦੀ ਵੈੱਬਸਾਈਟ ‘ਤੇ ਮੌਜੂਦ ਹਨ। ਲਗਾਤਾਰ ਅਜਿਹੇ ਮੁੱਦੇ ਉਠਾ ਕੇ ਇਨ੍ਹਾਂ ਤੱਥਾਂ ਨੂੰ ਪੂਰੀ ਤਰ੍ਹਾਂ ਨਜ਼ਰਅੰਦਾਜ਼ ਕੀਤਾ ਜਾ ਰਿਹਾ ਹੈ।”
‘ਚੋਣ ਕਮਿਸ਼ਨ ਨੂੰ ਬਦਨਾਮ ਕਰਨ ਦੀ ਕੋਸ਼ਿਸ਼ ਬੇਤੁਕੀ’
ਚੋਣ ਕਮਿਸ਼ਨ ਨੇ ਅੱਗੇ ਕਿਹਾ, “ਕਿਸੇ ਵੀ ਤਰ੍ਹਾਂ ਦੀ ਗਲਤ ਜਾਣਕਾਰੀ ਫੈਲਾਉਣਾ ਨਾ ਸਿਰਫ਼ ਕਾਨੂੰਨ ਦਾ ਅਪਮਾਨ ਹੈ, ਸਗੋਂ ਆਪਣੀ ਸਿਆਸੀ ਪਾਰਟੀ ਦੇ ਹਜ਼ਾਰਾਂ ਨੁਮਾਇੰਦਿਆਂ ਨੂੰ ਬਦਨਾਮ ਕਰਦਾ ਹੈ ਅਤੇ ਲੱਖਾਂ ਚੋਣ ਕਰਮਚਾਰੀਆਂ ਦਾ ਹੌਸਲਾ ਤੋੜਦਾ ਹੈ, ਜੋ ਚੋਣਾਂ ਦੌਰਾਨ ਨਿਰਪੱਖ ਅਤੇ ਪਾਰਦਰਸ਼ੀ ਢੰਗ ਨਾਲ ਕੰਮ ਕਰਦੇ ਹਨ। ਵੋਟਰਾਂ ਦੇ ਕਿਸੇ ਵੀ ਉਲਟ ਫੈਸਲੇ ਤੋਂ ਬਾਅਦ, ਇਹ ਕਹਿ ਕੇ ਚੋਣ ਕਮਿਸ਼ਨ ਨੂੰ ਬਦਨਾਮ ਕਰਨ ਦੀ ਕੋਸ਼ਿਸ਼ ਪੂਰੀ ਤਰ੍ਹਾਂ ਬੇਤੁਕੀ ਹੈ।”
ਰਾਹੁਲ ਗਾਂਧੀ ਨੇ ਕੀ ਦੋਸ਼ ਲਗਾਏ ਸਨ?
ਰਾਹੁਲ ਗਾਂਧੀ ਨੇ ਇੱਕ ਲੇਖ ਵਿੱਚ ਮਹਾਰਾਸ਼ਟਰ ਵਿਧਾਨ ਸਭਾ ਚੋਣਾਂ ਵਿੱਚ ਭਾਜਪਾ ਦੀ ਜਿੱਤ ਨੂੰ ਮੈਚ ਫਿਕਸਿੰਗ ਕਰਾਰ ਦਿੱਤਾ। ਇਸ ਲੇਖ ਦੀ ਫੋਟੋ ਸਾਂਝੀ ਕਰਦਿਆਂ ਉਨ੍ਹਾਂ ਨੇ ਐਕਸ ‘ਤੇ ਲਿਖਿਆ, “ਚੋਣ ਨੂੰ ਕਿਵੇਂ ਚੋਰੀ ਕਰਨਾ ਹੈ? 2024 ਦੀਆਂ ਮਹਾਰਾਸ਼ਟਰ ਵਿਧਾਨ ਸਭਾ ਚੋਣਾਂ ਲੋਕਤੰਤਰ ਵਿੱਚ ਧੋਖਾਧੜੀ ਦਾ ਖਾਕਾ ਸੀ। ਮੇਰਾ ਲੇਖ ਕਦਮ-ਦਰ-ਕਦਮ ਦੱਸਦਾ ਹੈ ਕਿ ਇਹ ਕਿਵੇਂ ਹੋਇਆ: ਪਹਿਲਾ ਕਦਮ: ਚੋਣ ਕਮਿਸ਼ਨ ਦੀ ਨਿਯੁਕਤੀ ਲਈ ਪੈਨਲ ਵਿੱਚ ਗੜਬੜ ਕਰੋ, ਦੂਜਾ ਕਦਮ: ਵੋਟਰ ਸੂਚੀ ਵਿੱਚ ਨਕਲੀ ਵੋਟਰ ਜੋੜੋ, ਤੀਜਾ ਕਦਮ: ਵੋਟਿੰਗ ਪ੍ਰਤੀਸ਼ਤ ਵਧਾਓ, ਚੌਥਾ ਕਦਮ: ਨਕਲੀ ਵੋਟਿੰਗ ਨੂੰ ਉਸੇ ਜਗ੍ਹਾ ‘ਤੇ ਨਿਸ਼ਾਨਾ ਬਣਾਓ ਜਿੱਥੇ ਭਾਜਪਾ ਨੂੰ ਜਿੱਤਾਉਣਾ ਹੈ, ਪੰਜਵਾਂ ਕਦਮ: ਸਬੂਤ ਲੁਕਾਓ।”
ਉਨ੍ਹਾਂ ਨੇ ਅੱਗੇ ਕਿਹਾ, “ਇਹ ਸਮਝਣਾ ਮੁਸ਼ਕਿਲ ਨਹੀਂ ਕਿ ਮਹਾਰਾਸ਼ਟਰ ਵਿੱਚ ਭਾਜਪਾ ਇੰਨੀ ਬੇਚੈਨ ਕਿਉਂ ਸੀ। ਪਰ ਧੋਖਾਧੜੀ ਮੈਚ ਫਿਕਸਿੰਗ ਵਰਗੀ ਹੈ – ਜੋ ਧਿਰ ਧੋਖਾ ਦਿੰਦੀ ਹੈ, ਉਹ ਖੇਡ ਜਿੱਤ ਸਕਦੀ ਹੈ, ਪਰ ਸੰਸਥਾਵਾਂ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ ਅਤੇ ਨਤੀਜਿਆਂ ‘ਤੇ ਲੋਕਾਂ ਦਾ ਭਰੋਸਾ ਖਤਮ ਕਰ ਦਿੰਦੀ ਹੈ। ਸਾਰੇ ਚਿੰਤਤ ਭਾਰਤੀਆਂ ਨੂੰ ਸਬੂਤ ਦੇਖਣੇ ਚਾਹੀਦੇ, ਆਪਣਾ ਫੈਸਲਾ ਕਰਨਾ ਚਾਹੀਦਾ ਅਤੇ ਜਵਾਬ ਮੰਗਣਾ ਚਾਹੀਦਾ। ਕਿਉਂਕਿ ਮਹਾਰਾਸ਼ਟਰ ਦੀ ਮੈਚ ਫਿਕਸਿੰਗ ਹੁਣ ਬਿਹਾਰ ਵਿੱਚ ਵੀ ਹੋਵੇਗੀ ਅਤੇ ਫਿਰ ਹਰ ਉਸ ਥਾਂ ਜਿੱਥੇ ਭਾਜਪਾ ਹਾਰ ਰਹੀ ਹੋਵੇਗੀ। ਮੈਚ ਫਿਕਸਿੰਗ ਵਾਲੀਆਂ ਚੋਣਾਂ ਕਿਸੇ ਵੀ ਲੋਕਤੰਤਰ ਲਈ ਜ਼ਹਿਰ ਹਨ।”
