ਚੰਡੀਗੜ੍ਹ ਪੰਜਾਬ ਰੋਡਵੇਜ਼, ਪਨਬਸ, ਅਤੇ ਪੀ.ਆਰ.ਟੀ.ਸੀ ਦੇ ਕੰਟਰੈਕਟ ਵਰਕਰਜ਼ ਯੂਨੀਅਨ ਪੰਜਾਬ 25/11 ਦੇ ਆਗੂਆਂ ਨੇ ਸਮੂਹ ਮੁਲਾਜ਼ਮਾਂ ਨੂੰ ਸੱਦਾ ਦਿੱਤਾ ਹੈ ਕਿ ਉਹ ਆਪਣੀਆਂ ਮੰਗਾਂ ਨੂੰ ਲੈ ਕੇ 15 ਅਗਸਤ ਨੂੰ ਆਜ਼ਾਦੀ ਦਿਹਾੜੇ ਨੂੰ ‘ਗੁਲਾਮੀ ਦਿਵਸ’ ਵਜੋਂ ਮਨਾਉਣ ਅਤੇ ਸੰਘਰਸ਼ ਨੂੰ ਤਿੱਖਾ ਕਰਨ। ਇਸ ਮੌਕੇ ਮੁੱਖ ਮੰਤਰੀ ਪੰਜਾਬ ਅਤੇ ਟਰਾਂਸਪੋਰਟ ਮੰਤਰੀ ਵੱਲੋਂ ਤਿਰੰਗਾ ਝੰਡਾ ਲਹਿਰਾਉਣ ਦੀ ਰਸਮ ਦੌਰਾਨ ਮੁਲਾਜ਼ਮ ਕਾਲੇ ਝੰਡੇ ਦਿਖਾਉਣਗੇ ਅਤੇ ਰੋਸ ਪ੍ਰਦਰਸ਼ਨ ਕਰਨਗੇ।
ਯੂਨੀਅਨ ਦੇ ਆਗੂਆਂ ਨੇ ਕਿਹਾ ਕਿ ਅਸੀਂ ਠੇਕੇਦਾਰੀ ਪ੍ਰਥਾ, ਵਿਭਾਗ ਦੇ ਨਿੱਜੀਕਰਨ, ਘੱਟ ਤਨਖਾਹਾਂ, ਅਤੇ ਆਊਟਸੋਰਸਿੰਗ ਵਿੱਚ ਰਿਸ਼ਵਤਖੋਰੀ ਵਰਗੇ ਮੁੱਦਿਆਂ ਦੇ ਵਿਰੁੱਧ ਲਗਾਤਾਰ ਸੰਘਰਸ਼ ਕਰ ਰਹੇ ਹਾਂ। ਹਾਲੀਆ ਮੀਟਿੰਗ ਵਿੱਚ ਵੀ ਕੋਈ ਹੱਲ ਨਹੀਂ ਨਿਕਲਿਆ। ਇਸ ਲਈ ਸਾਰੇ ਸਾਥੀਆਂ ਨੂੰ ਅਪੀਲ ਹੈ ਕਿ ਉਹ ਸ਼ਾਂਤਮਈ ਅਤੇ ਅਨੁਸ਼ਾਸਤ ਢੰਗ ਨਾਲ ਆਪਣੀਆਂ ਮੰਗਾਂ ਉਠਾਉਣ। ਮੁੱਖ ਮੰਗਾਂ ਵਿੱਚ ਸ਼ਾਮਲ ਹਨ:
- ਵਿਭਾਗ ਵਿੱਚੋਂ ਵਿਚੋਲੀਆਂ ਅਤੇ ਠੇਕੇਦਾਰਾਂ ਦੀ ਲੁੱਟ ਨੂੰ ਖਤਮ ਕਰਨਾ।
- ਆਊਟਸੋਰਸਿੰਗ ਅਤੇ ਰਿਸ਼ਵਤਖੋਰੀ ‘ਤੇ ਰੋਕ।
- ਕਿਲੋਮੀਟਰ ਸਕੀਮ ਅਤੇ ਪ੍ਰਾਈਵੇਟ ਬੱਸਾਂ ਦੁਆਰਾ ਨਿੱਜੀਕਰਨ ਬੰਦ ਕਰਨਾ।
- ਕੱਚੇ ਮੁਲਾਜ਼ਮਾਂ ਨੂੰ ਪੱਕਾ ਕਰਨਾ।
- ਨਵੀਆਂ ਬੱਸਾਂ ਸ਼ਾਮਲ ਕਰਨਾ।
- ਟਰਾਂਸਪੋਰਟ ਮਾਫੀਆ ਨੂੰ ਖਤਮ ਕਰਨਾ।
ਸੰਘਰਸ਼ ਦੀ ਰੂਪ-ਰੇਖਾ
ਆਗੂਆਂ ਨੇ ਕਿਹਾ, “ਅਸੀਂ ਠੇਕੇਦਾਰੀ ਪ੍ਰਥਾ ਦੀ ਗੁਲਾਮੀ ਤੋਂ ਕਦੋਂ ਮੁਕਤ ਹੋਵਾਂਗੇ?” ਅਤੇ “ਵਿਭਾਗ ਨੂੰ ਬਚਾਉਣ ਦੀ ਬਜਾਏ ਕਾਰਪੋਰੇਟ ਘਰਾਣਿਆਂ ਦੇ ਹੱਥਾਂ ਵਿੱਚ ਕਿਉਂ ਵੇਚਿਆ ਜਾ ਰਿਹਾ ਹੈ?” ਸਾਰੇ ਸਾਥੀ ਹੇਠ ਲਿਖੇ ਸਥਾਨਾਂ ‘ਤੇ ਨਿਰਧਾਰਤ ਸਮੇਂ ‘ਤੇ ਪਹੁੰਚ ਕੇ ਇਹ ਸਵਾਲ ਉਠਾਉਣਗੇ।
ਫਰੀਦਕੋਟ ਵਿਖੇ ਸੰਘਰਸ਼ ਲਈ ਹੇਠਲੇ ਡਿੱਪੂਆਂ ਦੇ ਵਰਕਰ ਸਾਥੀ ਪਹੁੰਚਣਗੇ:
ਫਰੀਦਕੋਟ, ਕਪੂਰਥਲਾ, ਫਿਰੋਜ਼ਪੁਰ, ਅਮ੍ਰਿਤਸਰ (1), ਅਮ੍ਰਿਤਸਰ (2), ਜਲੰਧਰ (1), ਜਲੰਧਰ (2), ਲੁਧਿਆਣਾ ਪਨਬਸ, ਮੋਗਾ, ਜਗਰਾਓਂ, ਪੱਟੀ, ਤਰਨਤਾਰਨ, ਹੁਸ਼ਿਆਰਪੁਰ, ਬਟਾਲਾ, ਲੁਧਿਆਣਾ ਪੀ.ਆਰ.ਟੀ.ਸੀ, ਮੁਕਤਸਰ, ਫਾਜ਼ਿਲਕਾ, ਪਠਾਨਕੋਟ, ਜੀਰਾ।
ਮਾਨਸਾ ਵਿਖੇ ਹੇਠਲੇ ਡਿੱਪੂਆਂ ਦੇ ਵਰਕਰ ਸਾਥੀ ਹਾਜ਼ਰ ਹੋਣਗੇ:
ਬਠਿੰਡਾ, ਪਟਿਆਲਾ (ਹੈਡ ਆਫਿਸ), ਸੰਗਰੂਰ, ਬਰਨਾਲਾ, ਬੁੱਢਲਾਡਾ, ਚੰਡੀਗੜ੍ਹ, ਰੋਪੜ, ਨਵਾਂ ਸ਼ਹਿਰ, ਨੰਗਲ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
