ਹੁਣ BSL ਪ੍ਰੋਜੈਕਟ ਦੀ ਸੁਰੱਖਿਆ ਹਿਮਾਚਲ ਪੁਲਿਸ ਨਹੀਂ, CISF ਦੇ ਹੱਥਾਂ ‘ਚ

ਸ਼ਿਮਲਾ: ਹਿਮਾਚਲ ਪ੍ਰਦੇਸ਼ ਦੇ ਸੁੰਦਰਨਗਰ ਵਿਖੇ 990 ਮੈਗਾਵਾਟ ਦੇ BSL ਪ੍ਰੋਜੈਕਟ ਲਈ ਸੁਰੱਖਿਆ ਪ੍ਰਬੰਧ ਹੁਣ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ (CISF) ਨੂੰ ਸੌਂਪੇ ਜਾਣਗੇ। ਦਸ ਦਈਏ ਕਿ ਪ੍ਰੋਜੈਕਟ ਦੇ ਨਿਰਮਾਣ ਤੋਂ ਲੈ ਕੇ ਹੁਣ ਤੱਕ ਯਾਨੀ ਚਾਰ ਦਹਾਕਿਆਂ ਤੱਕ ਸੁਰੱਖਿਆ ਪ੍ਰਬੰਧ ਹਿਮਾਚਲ ਪ੍ਰਦੇਸ਼ ਪੁਲਿਸ ਦੇ ਹੱਥਾਂ ਵਿੱਚ ਸਨ। ਪਰ ਹੁਣ ਕੇਂਦਰ ਸਰਕਾਰ ਨੇ ਪ੍ਰਾਜੈਕਟ ਦੀ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ​​ਕਰਨ ਦਾ ਫੈਸਲਾ ਕੀਤਾ ਹੈ। ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਪ੍ਰਾਜੈਕਟ ਦੇ ਸੁਰੱਖਿਆ ਪ੍ਰਬੰਧਾਂ ਨੂੰ ਸੰਭਾਲਣ ਲਈ CISF ਦੀ ਤਾਇਨਾਤੀ ਨੂੰ ਮਨਜ਼ੂਰੀ ਦੇਣ ਦੇ ਨਾਲ-ਨਾਲ ਰਸਮੀ ਕਾਰਵਾਈਆਂ ਪੂਰੀਆਂ ਕਰਨ ਦੇ ਹੁਕਮ ਜਾਰੀ ਕੀਤੇ ਹਨ।

ਹੁਣ ਸੀਆਈਐਸਐਫ ਨੇ ਬੀਐਸਐਲ ਪ੍ਰੋਜੈਕਟ ਮੈਨੇਜਮੈਂਟ ਨੂੰ ਸੁਰੱਖਿਆ ਵਿੰਗ ਦੀਆਂ 235 ਅਸਾਮੀਆਂ ਲਈ ਪ੍ਰਤੀ ਸਿਰ 2,65,500 ਰੁਪਏ ਦੀ ਦਰ ਨਾਲ 6 ਕਰੋੜ 23 ਲੱਖ, 92 ਹਜ਼ਾਰ 500 ਰੁਪਏ ਸੁਰੱਖਿਆ ਜਮ੍ਹਾਂ ਕਰਾਉਣ ਲਈ ਕਿਹਾ ਹੈ। ਇਸ ਤੋਂ ਇਲਾਵਾ ਸੀਆਈਐਸਐਫ ਨੇ ਬੀਐਸਐਲ ਪ੍ਰੋਜੈਕਟ ਵਿੱਚ ਫੋਰਸ ਤਾਇਨਾਤ ਕਰਨ ਅਤੇ ਜਵਾਨਾਂ ਲਈ ਰਿਹਾਇਸ਼ (ਪਰਿਵਾਰ ਅਤੇ ਸਿੰਗਲ), ਟਰਾਂਸਪੋਰਟ, ਸੰਚਾਰ ਉਪਕਰਨ, ਸੁਰੱਖਿਆ ਯੰਤਰਾਂ ਸਮੇਤ ਹੋਰ ਬੁਨਿਆਦੀ ਸਹੂਲਤਾਂ ਨੂੰ ਪੂਰਾ ਕਰਨ ਲਈ ਵੀ ਕਿਹਾ ਹੈ, ਤਾਂ ਜੋ ਜਵਾਨਾਂ ਨੂੰ ਮਨਜ਼ੂਰਸ਼ੁਦਾ ਅਸਾਮੀਆਂ ‘ਤੇ ਤਾਇਨਾਤ ਕੀਤਾ ਜਾ ਸਕੇ ਅਤੇ ਸੀਆਈਐਸਐਫ ਨੂੰ ਜਲਦੀ ਤੋਂ ਜਲਦੀ ਸੁਰੱਖਿਆ ਵਿੱਚ ਸ਼ਾਮਿਲ ਕੀਤਾ ਜਾ ਸਕੇ।