ਵਾਸ਼ਿੰਗਟਨ: ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਵੱਡਾ ਫੈਸਲਾ ਲੈਂਦਿਆਂ ਭੰਗ ਸਣੇ ਫੜੇ ਗਏ ਹਜ਼ਾਰਾਂ ਲੋਕਾਂ ਨੂੰ ਮੁਆਫ਼ੀ ਦਿੰਦਿਆਂ ਜੇਲ੍ਹਾਂ ‘ਚੋ ਰਿਹਾਅ ਕਰਨ ਦਾ ਐਲਾਨ ਕੀਤਾ ਹੇ। ਬਾਇਡਨ ਦੇ ਹੁਕਮ ਸਿਰਫ਼ ਅਮਰੀਕਾ ਦੀ ਰਾਜਧਾਨੀ ‘ਚ ਲਾਗੂ ਹੋਣਗੇ ਪਰ ਰਾਸ਼ਟਰਪਤੀ ਨੇ ਸਾਰੇ ਸੂਬਿਆਂ ਦੇ ਗਵਰਨਰਾਂ ਨੂੰ ਸੱਦਾ ਦਿਤਾ ਹੈ ਕਿ ਮਾਮੂਲੀ ਮਾਤਰਾ ‘ਚ ਭੰਗ ਨਾਲ ਫੜੇ ਲੋਕਾਂ ਨੂੰ ਰਿਹਾਅ ਕਰ ਦਿੱਤਾ ਜਾਵੇ।
ਜੋਅ ਬਾਇਡਨ ਨੇ ਕਿਹਾ ਕਿ ਭੰਗ ਵਰਤਣ ਜਾਂ ਰੱਖਣ ਦੇ ਦੋਸ਼ ਹੇਠ ਕੋਈ ਜੇਲ੍ਹ ‘ਚ ਨਹੀਂ ਹੋਣਾ ਚਾਹੀਦਾ। ਭੰਗ ਕਾਰਕੇ ਵੱਡੀ ਗਿਣਤੀ ‘ਚ ਲੋਕ ਜੇਲ੍ਹਾਂ ‘ਚ ਹਨ ਅਤੇ ਆਪਣੀ ਗਲਤੀ ਸੁਧਾਰਨ ਦਾ ਇਹ ਸਹੀ ਸਮਾਂ ਹੈ। ਵਾਈਟ ਹਾਊਸ ਨੇ ਕਿਹਾ ਕਿ ਤਾਜ਼ਾ ਫੈਸਲੇ ਨਾਲ ਭੰਗ ਦੇ ਮਾਮਲੇ ‘ਚ ਅਪਰਾਧਿਕ ਰਿਕਾਰਡ ਵਾਲੇ ਲੋਕਾਂ ਨੂੰ ਨੌਕਰੀ ਲੱਭਣ ਅਤੇ ਕਿਰਾਏ ‘ਤੇ ਮਕਾਨ ਲੈਣ ‘ਚ ਆਸਾਨੀ ਹੋਵੇਗੀ। ਹਜ਼ਾਰਾਂ ਲੋਕਾਂ ਨੂੰ ਸਿਰਫ਼ ਇਸ ਕਰ ਕੇ ਰੁਜ਼ਗਾਰ ਦੇ ਮੌਕਿਆਂ ਜਾਂ ਵਿਦਿਅਕ ਖੇਤਰ ‘ਚ ਵਧਣ ਦੇ ਮੌਕੇ ਨਹੀਂ ਮਿਲ ਸਕੇ ਕਿਉਂਕਿ ਉਨ੍ਹਾਂ ‘ਤੇ ਭੰਗ ਰੱਖਣ ਜਾਂ ਵਰਤਣ ਦੇ ਦੋਸ਼ ਲੱਗੇ ਹੋਏ ਸਨ।
ਰਾਸ਼ਟਰਪਤੀ ਨੇ ਕਿਹਾ ਕਿ ਇਸ ਮੁਆਫ਼ੀ ਨਾਲ ਪੂਰੇ ਅਮਰੀਕਾ ‘ਚ ਭੰਗ ਰੱਖਣ ਦੇ ਦੋਸ਼ੀ ਠਹਿਰਾਏ ਲੋਕਾਂ ਨੂੰ ਰਾਹਤ ਦਾ ਰਾਹ ਪੱਧਰਾ ਹੋਵੇਗਾ। ਪ੍ਰਸ਼ਾਸਨਿਕ ਅਧਿਕਾਰੀਆਂ ਵੱਲੋਂ ਇਕ ਗੱਲ ਦਾ ਖਾਸ ਜ਼ਿਕਰ ਕੀਤਾ ਗਿਆ ਹੈ ਕਿ ਇਸ ਮੁਆਫ਼ੀ ਨਾਲ ਹੋਰ ਨਸ਼ਿਆਂ ਦੇ ਮਾਮਲੇ ‘ਚ ਗ੍ਰਿਫ਼ਤਾਰ ਜਾਂ ਸਜ਼ਾ ਭੁਗਤ ਰਹੇ ਲੋਕਾਂ ਨੂੰ ਕੋਈ ਲਾਭ ਨਹੀਂ ਹੋਵੇਗਾ। ਇਹ ਮੁਆਫ਼ੀ ਗੈਰ ਅਮਰੀਕੀਆਂ ਨੂੰ ਵੀ ਨਹੀਂ ਮਿਲੇਗੀ ਜੋ ਬਗੈਰ ਇੰਮੀਗ੍ਰੇਸ਼ਨ ਸਟੇਟਸ ਤੋਂ ਅਮਰੀਕਾ ‘ਚ ਰਹਿ ਰਹੇ ਹਨ। ਫਿਰ ਇਸ ਦਾ ਫਾਇਦਾ ਪਰਵਾਸੀਆਂ ਨੂੰ ਸਭ ਤੋਂ ਵੱਧ ਹੋਵੇਗਾ ਜੋ ਭੰਗ ਰੱਖਣ ਜਾਂ ਭੰਗ ਦੀ ਕਾਸ਼ਤ ਕਰਨ ਦੇ ਮਾਮਲੇ ‘ਚ ਫਸ ਗਏ ਅਤੇ ਅਪਰਾਧਿਕ ਰਿਕਾਰਡ ਬਣ ਗਿਆ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
