ਲੁਧਿਆਣਾ: ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸੈਣੀ ਨੂੰ ਲੁਧਿਆਣਾ ਵਿੱਚ ਚੋਣ ਪ੍ਰਚਾਰ ਦੌਰਾਨ ਲੋਕਾਂ ਦੇ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ। ਪਾਣੀ ਦੇ ਮੁੱਦੇ ਨੂੰ ਲੈ ਕੇ ਕੁਝ ਲੋਕਾਂ ਨੇ ਸੈਣੀ ਨੂੰ ਕਾਲੇ ਝੰਡੇ ਵਿਖਾਏ ਅਤੇ ‘ਪੰਜਾਬ ਦਾ ਪਾਣੀ ਚੋਰ’ ਦੇ ਨਾਅਰੇ ਲਗਾਏ। ਪੁਲਿਸ ਦੀ ਸਖ਼ਤ ਸੁਰੱਖਿਆ ਵਿਚਕਾਰ ਸੈਣੀ ਦੇ ਕਾਫਲੇ ਨੂੰ ਬਾਹਰ ਕੱਢਿਆ ਗਿਆ।
ਲੁਧਿਆਣਾ ਦੇ ਪੱਛਮੀ ਹਲਕੇ ਵਿੱਚ 19 ਜੂਨ ਨੂੰ ਉਪ-ਚੋਣ ਲਈ ਵੋਟਿੰਗ ਹੋਣੀ ਹੈ। ਇਸ ਦੇ ਲਈ ਸਾਰੀਆਂ ਸਿਆਸੀ ਪਾਰਟੀਆਂ ਪ੍ਰਚਾਰ ਵਿੱਚ ਜੁਟੀਆਂ ਹੋਈਆਂ ਹਨ। ਸ਼ਨੀਵਾਰ ਨੂੰ ਭਾਜਪਾ ਦੇ ਉਮੀਦਵਾਰ ਜੀਵਨ ਗੁਪਤਾ ਦੇ ਹੱਕ ਵਿੱਚ ਪ੍ਰਚਾਰ ਕਰਨ ਲਈ ਨਾਇਬ ਸੈਣੀ ਲੁਧਿਆਣਾ ਪਹੁੰਚੇ ਸਨ।
ਜਦੋਂ ਸੈਣੀ ਬਾੜੇਵਾਲ ਰੋਡ ’ਤੇ ਇੱਕ ਪ੍ਰੋਗਰਾਮ ਵਿੱਚ ਜਾ ਰਹੇ ਸਨ, ਤਾਂ 25-30 ਲੋਕਾਂ ਨੇ ਉਨ੍ਹਾਂ ਦਾ ਵਿਰੋਧ ਕੀਤਾ। ਇਨ੍ਹਾਂ ਲੋਕਾਂ ਨੇ ਸੈਣੀ ਨੂੰ ਕਾਲੇ ਝੰਡੇ ਵਿਖਾਏ, ਹਾਲਾਂਕਿ ਉਨ੍ਹਾਂ ਨੂੰ ਪੁਲਿਸ ਸੁਰੱਖਿਆ ਪ੍ਰਦਾਨ ਕੀਤੀ ਗਈ ਸੀ। ਸੈਣੀ ਦੀ ਗੱਡੀ ਦੇ ਅੱਗੇ ਪਾਇਲਟ ਵਾਹਨ ਸੀ।
ਵਿਰੋਧ ’ਤੇ ਨਾਇਬ ਸੈਣੀ ਨੇ ਕਿਹਾ, ‘ਪਾਣੀ ਦੀ ਨੀਚ ਸਿਆਸਤ ਨੂੰ ਸਾਨੂੰ ਛੱਡਣਾ ਪਵੇਗਾ।’
ਸੈਣੀ ਨੇ ਆਖਿਆ ਕਿ ਜੀਵਨ ਗੁਪਤਾ ਨਾਲ ਉਨ੍ਹਾਂ ਦੀ ਪੁਰਾਣੀ ਦੋਸਤੀ ਹੈ ਅਤੇ ਪਰਿਵਾਰਕ ਸਬੰਧ ਵੀ ਰਹੇ ਹਨ। “ਅੱਜ ਜਦੋਂ ਮੈਂ ਲੋਕਾਂ ਵਿੱਚ ਗਿਆ, ਤਾਂ ਉਨ੍ਹਾਂ ਦਾ ਜੋਸ਼ ਵੇਖ ਕੇ ਮਹਿਸੂਸ ਹੋਇਆ ਕਿ ਇਹ ਉਪ-ਚੋਣ 2027 ਦੀਆਂ ਚੋਣਾਂ ਦੀ ਮਜ਼ਬੂਤ ਨੀਂਹ ਸਾਬਤ ਹੋਵੇਗੀ।
ਹਰਿਆਣਾ ’ਚ ਉਜਵਲ ਯੋਜਨਾ ਦਾ ਲਾਭ
ਸੈਣੀ ਨੇ ਕਿਹਾ, ਹਰਿਆਣਾ ਵਿੱਚ 13 ਲੱਖ ਔਰਤਾਂ ਉਜਵਲ ਯੋਜਨਾ ਦਾ ਫਾਇਦਾ ਲੈ ਰਹੀਆਂ ਹਨ। ਮੋਦੀ ਸਰਕਾਰ ਨੇ ਗਰੀਬਾਂ ਦੇ ਘਰਾਂ ’ਚ ਗੈਸ ਸਿਲੰਡਰ ਪਹੁੰਚਾਏ। ਪ੍ਰਧਾਨ ਮੰਤਰੀ ਆਵਾਸ ਯੋਜਨਾ ਅਧੀਨ ਸਾਨੂੰ ਜਿੰਨੀਆਂ ਅਰਜ਼ੀਆਂ ਮਿਲੀਆਂ, ਸਾਰਿਆਂ ਦੇ ਘਰ ਬਣਾ ਕੇ ਚਾਬੀਆਂ ਸੌਂਪੀਆਂ।
