ਨਿਊਜ਼ ਡੈਸਕ: ਲੇਬਨਾਨ ਦੇ ਬੇਰੂਤ ‘ਚ ਬੁੱਧਵਾਰ ਨੂੰ ਇੱਕ ਔਰਤ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਬਲੌਮ ਬੈਂਕ ‘ਚ ਬੰਦੂਕ ਦੀ ਨੌਕ ‘ਤੇ ਬੈਂਕ ਲੁੱਟਿਆ। ਐਨਾ ਹੀ ਨਹੀਂ ਔਰਤ ਨੇ ਸਾਰੀ ਚੋਰੀ ਦੀ ਵਾਰਦਾਤ ਨੂੰ ਫੇਸਬੁੱਕ ‘ਤੇ ਲਾਈਵ ਸਟ੍ਰੀਮ ਵੀ ਕੀਤਾ। ਹਾਲਾਂਕਿ, ਚੋਰੀ ਕਰਨ ਤੋਂ ਬਾਅਦ ਵੀ ਔਰਤ ਦੀ ਚਾਰੇ ਪਾਸੇ ਤਾਰੀਫ ਹੋ ਰਹੀ ਹੈ।
ਕੀ ਹੈ ਪੂਰਾ ਮਾਮਲਾ?
28 ਸਾਲ ਦੀ ਸਾਲੀ ਹਾਫਿਜ਼ ਇੱਕ ਇੰਟੀਰੀਅਰ ਡਿਜ਼ਾਈਨਰ ਹੈ। ਉਹ ਆਪਣੇ ਸਾਥੀਆਂ ਨਾਲ ਬੈਂਕ ‘ਚ ਦਾਖਲ ਹੋਈ ਅਤੇ ਦਰਵਾਜ਼ਾ ਬੰਦ ਕਰਕੇ ਬੈਂਕ ਕਰਮਚਾਰੀਆਂ ‘ਤੇ ਚੀਕਣਾ ਸ਼ੁਰੂ ਕਰ ਦਿੱਤਾ। ਲਾਈਵ ਸਟ੍ਰੀਮ ਦੌਰਾਨ ਉਹ ਕਹਿੰਦੀ ਹੈ ਕਿ, “ਮੈਂ ਸਾਲੀ ਹਾਫਿਜ਼ ਹਾਂ। ਮੈਂ ਇੱਥੇ ਕਿਸੇ ਨੂੰ ਮਾਰਨ ਜਾਂ ਕਿਸੇ ਨੂੰ ਨੁਕਸਾਨ ਪਹੁੰਚਾਉਣ ਨਹੀਂ ਆਈ, ਸਗੋਂ ਆਪਣੇ ਹੱਕਾਂ ਲਈ ਆਈ ਹਾਂ। ਮੇਰੀ ਭੈਣ ਕੈਂਸਰ ਨਾਲ ਜੂਝ ਰਹੀ ਹੈ ਅਤੇ ਹਸਪਤਾਲ ਵਿੱਚ ਦਾਖਲ ਹੈ। ਮੈਂ ਸਿਰਫ਼ ਆਪਣੀ ਭੈਣ ਦੇ ਇਲਾਜ ਲਈ ਆਪਣੇ ਹੀ ਪੈਸੇ ਲੈਣ ਆਈ ਹਾਂ।”
ਆਪਣੇ ਹੀ ਪੈਸੇ ਕਿਉਂ ਕਰਨੇ ਪਏ ਚੋਰੀ ?
ਲੇਬਨਾਨ 2019 ਤੋਂ ਇੱਕ ਵੱਡੇ ਆਰਥਿਕ ਸੰਕਟ ਨਾਲ ਜੂਝ ਰਿਹਾ ਹੈ ਅਤੇ ਇਸ ਦੀ ਮੁਦਰਾ ਬਾਜ਼ਾਰ ਵਿੱਚ ਆਪਣੀ ਕੀਮਤ ਦਾ 90 ਫੀਸਦ ਤੋਂ ਜ਼ਿਆਦਾ ਗਵਾ ਚੁੱਕੀ ਹੈ। ਇਸ ਕਾਰਨ ਸਰਕਾਰ ਨੇ ਕਈ ਚੀਜ਼ਾਂ ਸੀਮਤ ਕਰ ਦਿੱਤੀਆਂ ਹਨ, ਜਿਸ ‘ਚ ਇਹ ਵੀ ਸ਼ਾਮਲ ਹੈ ਕਿ ਕੋਈ ਬੈਂਕ ਗਾਹਕ ਆਪਣੇ ਖਾਤੇ ‘ਚੋਂ ਕਿੰਨੇ ਪੈਸੇ ਕਢਵਾ ਸਕਦਾ ਹੈ। ਹਾਫਿਜ਼ ਸਣੇ ਹੋਰ ਕਈ ਲੋਕ ਅਜਿਹੇ ਹਨ, ਜੋ ਬੈਂਕ ਤੋਂ ਜ਼ਿਆਦਾ ਪੈਸੇ ਕਢਵਾਉਣ ਤੋਂ ਅਸਮਰਥ ਹਨ ਅਤੇ ਇਸ ਲਈ ਉਨ੍ਹਾਂ ਨੂੰ ਚੋਰੀ ਕਰਨੀ ਪੈਂਦੀ ਹੈ।
ਇੱਕ ਰਿਪੋਰਟ ਮੁਤਾਬਕ ਹਾਫਿਜ਼ ਅਤੇ ਉਸ ਦੇ ਸਾਥੀ ਪੁਲਿਸ ਦੇ ਆਉਣ ਤੋਂ ਪਹਿਲਾਂ ਬੈਂਕ ਦੀ ਪਿਛਲੀ ਖਿੜਕੀ ਤੋੜ ਕੇ ਭੱਜਣ ਵਿੱਚ ਕਾਮਯਾਬ ਹੋ ਗਏ। ਚੋਰੀ ਤੋਂ ਬਾਅਦ ਇਕ ਸਥਾਨਕ ਚੈਨਲ ਨੂੰ ਦਿੱਤੇ ਇੰਟਰਵਿਊ ਵਿੱਚ ਹਾਫਿਜ਼ ਨੇ ਦੱਸਿਆ ਕਿ ਉਸ ਨੇ ਪੁਲਿਸ ਦੇ ਫੜੇ ਜਾਣ ਦੇ ਡਰੋਂ ਚੋਰੀ ਲਈ ਆਪਣੇ ਭਤੀਜੇ ਦੀ ਖਿਡੌਣਾ ਬੰਦੂਕ ਦੀ ਵਰਤੋਂ ਕੀਤੀ ਸੀ।
ਉਸ ਨੇ ਕਿਹਾ, ‘ਮੈਂ ਆਪਣੇ ਪਰਿਵਾਰ ਵੱਲੋਂ ਬੈਂਕ ਵਿੱਚ ਜਮ੍ਹਾਂ $20,000 ‘ਚੋਂ ਲਗਭਗ $13,000 ਪ੍ਰਾਪਤ ਕਰਨ ਵਿੱਚ ਕਾਮਯਾਬ ਰਹੀ। ਹਾਲਾਂਕਿ, ਮੇਰੀ ਭੈਣ ਦੇ ਕੈਂਸਰ ਦੇ ਇਲਾਜ ‘ਤੇ $50,000 ਦਾ ਖਰਚਾ ਆਵੇਗਾ।”
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
