ਜਲੰਧਰ: ਜਲੰਧਰ ਜ਼ਿਲ੍ਹੇ ਦੇ ਲੰਬੜਾ ਕਸਬੇ ਦੇ ਹੁਸੈਨਪੁਰ ਪਿੰਡ ਦੇ ਵਸਨੀਕ ਛਿੰਦਰਪਾਲ ਨੇ ਸੋਨੀ ਟੀਵੀ ਦੇ ਮਸ਼ਹੂਰ ਸ਼ੋਅ ‘ਕੌਣ ਬਣੇਗਾ ਕਰੋੜਪਤੀ’ ਦੇ 18 ਸਤੰਬਰ ਵਾਲੇ ਐਪੀਸੋਡ ਵਿੱਚ ਇਤਿਹਾਸ ਰਚ ਦਿੱਤਾ। ਪੇਸ਼ੇ ਵਜੋਂ ਮਿਸਤਰੀ (ਕਾਰਪੇਂਟਰ) ਅਤੇ ਜੀਵਨ ਭਰ ਸੰਘਰਸ਼ ਕਰਦੇ ਆਏ ਛਿੰਦਰਪਾਲ ਨੇ ਆਪਣੀ ਮਿਹਨਤ, ਗਿਆਨ ਅਤੇ ਹਿੰਮਤ ਨਾਲ ਨਾ ਸਿਰਫ਼ ਹੌਟ ਸੀਟ ’ਤੇ ਪਹੁੰਚਣ ਦਾ ਸਫ਼ਰ ਪੂਰਾ ਕੀਤਾ, ਸਗੋਂ 50 ਲੱਖ ਰੁਪਏ ਜਿੱਤ ਕੇ ਆਪਣੇ ਪਿੰਡ ਅਤੇ ਪਰਿਵਾਰ ਦਾ ਨਾਮ ਉੱਚਾ ਕੀਤਾ।
ਛਿੰਦਰਪਾਲ ਦੀ ਜ਼ਿੰਦਗੀ ਮੁਸ਼ਕਲਾਂ ਨਾਲ ਭਰੀ ਰਹੀ ਹੈ। ਮਿਸਤਰੀ ਦਾ ਕੰਮ ਕਰਦਿਆਂ ਉਨ੍ਹਾਂ ਨੇ ਪਰਿਵਾਰ ਦੀ ਜ਼ਿੰਮੇਵਾਰੀ ਨਿਭਾਈ ਅਤੇ ਨਾਲ ਹੀ ਪੜ੍ਹਾਈ-ਲਿਖਾਈ ਅਤੇ ਸਾਧਾਰਨ ਗਿਆਨ ’ਚ ਡੂੰਘੀ ਦਿਲਚਸਪੀ ਰੱਖੀ। ਆਪਣੇ ਗਿਆਨ ਅਤੇ ਆਤਮਵਿਸ਼ਵਾਸ ਨਾਲ ਉਨ੍ਹਾਂ ਨੇ ਸਾਬਤ ਕਰ ਦਿੱਤਾ ਕਿ ਵੱਡੇ ਸੁਪਨੇ ਮਿਹਨਤ ਅਤੇ ਲਗਨ ਨਾਲ ਪੂਰੇ ਕੀਤੇ ਜਾ ਸਕਦੇ ਹਨ।
ਅਮਿਤਾਭ ਬੱਚਨ ਵੀ ਹੋਏ ਪ੍ਰਭਾਵਿਤ
ਬਿੱਗ-ਬੀ ਅਮਿਤਾਭ ਬੱਚਨ ਵੀ ਛਿੰਦਰਪਾਲ ਦੇ ਸੰਘਰਸ਼ ਅਤੇ ਸ਼ੋਅ ’ਚ ਉਨ੍ਹਾਂ ਦੇ ਪ੍ਰਦਰਸ਼ਨ ਤੋਂ ਕਾਫੀ ਪ੍ਰਭਾਵਿਤ ਹੋਏ। ਐਪੀਸੋਡ ਦੀ ਸ਼ੁਰੂਆਤ ਤੋਂ ਹੀ ਛਿੰਦਰਪਾਲ ਨੇ ਬੇਹੱਦ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਉਨ੍ਹਾਂ ਨੇ ਇੱਕ ਪਿੱਛੋਂ ਇੱਕ ਸਵਾਲਾਂ ਦੇ ਸਹੀ ਜਵਾਬ ਦਿੱਤੇ ਅਤੇ ਬਿਨਾਂ ਜ਼ਿਆਦਾ ਲਾਈਫ ਲਾਈਨ ਵਰਤੇ ਵੱਡੀ ਰਕਮ ਜਿੱਤ ਲਈ। ਅਮਿਤਾਭ ਨੇ ਕਿਹਾ ਕਿ ਛਿੰਦਰਪਾਲ ਦੀ ਸੋਚ ਅਤੇ ਆਤਮਵਿਸ਼ਵਾਸ ਹਮੇਸ਼ਾ ਦਿਲਾਂ ’ਚ ਯਾਦ ਰਹੇਗਾ।
ਐਪੀਸੋਡ 7.50 ਲੱਖ ਦੇ ਸਵਾਲ ਨਾਲ ਸ਼ੁਰੂ ਹੋਇਆ, ਜਿਸ ਦਾ ਛਿੰਦਰਪਾਲ ਨੇ ਪੂਰੇ ਵਿਸ਼ਵਾਸ ਨਾਲ ਸਹੀ ਜਵਾਬ ਦਿੱਤਾ। ਇਸ ਤੋਂ ਬਾਅਦ ਉਨ੍ਹਾਂ ਨੇ 12.50 ਲੱਖ ਅਤੇ 25 ਲੱਖ ਦੇ ਸਵਾਲ ਵੀ ਸਹੀ ਹੱਲ ਕੀਤੇ। 25 ਲੱਖ ਦੇ ਸਵਾਲ ’ਤੇ ਉਨ੍ਹਾਂ ਨੇ ਦੋ ਲਾਈਫ ਲਾਈਨ ਵਰਤੀਆਂ, ਪਰ ਕਿਸਮਤ ਨੇ ਉਨ੍ਹਾਂ ਦਾ ਸਾਥ ਦਿੱਤਾ। ਜਦੋਂ 50 ਲੱਖ ਦਾ ਸਵਾਲ ਆਇਆ, ਤਾਂ ਬਿਨਾਂ ਕਿਸੇ ਲਾਈਫ ਲਾਈਨ ਦੀ ਮਦਦ ਲਈ ਛਿੰਦਰਪਾਲ ਨੇ ਸਹੀ ਜਵਾਬ ਦੇ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ, ਅਤੇ ਸਟੂਡੀਓ ਤਾਲੀਆਂ ਨਾਲ ਗੂੰਜ ਉੱਠਿਆ।
50 ਲੱਖ ਜਿੱਤ ਕੇ ਘਰ ਵਾਪਸੀ
50 ਲੱਖ ਰੁਪਏ ਜਿੱਤਣ ਤੋਂ ਬਾਅਦ ਛਿੰਦਰਪਾਲ ਦੇ ਸਾਹਮਣੇ 1 ਕਰੋੜ ਦਾ ਸਵਾਲ ਆਇਆ। ਸਵਾਲ ਸੀ: ਭਾਰਤ ਦੇ ਮਹਾਨ ਤ੍ਰਿਕੋਣਮਿਤੀ ਸਰਵੇਖਣ ਦੇ ਮੁਖੀ ਬਣਨ ਤੋਂ ਪਹਿਲਾਂ, ਜਾਰਜ ਐਵਰੈਸਟ ਨੇ 1814 ਤੋਂ 1816 ਤੱਕ ਕਿਸ ਟਾਪੂ ਦਾ ਸਰਵੇਖਣ ਕੀਤਾ ਸੀ? ਵਿਕਲਪ ਸਨ: a) ਜੇਜੂ, b) ਜਮੈਕਾ, c) ਜਰਸੀ, d) ਜਾਵਾ।
ਛਿੰਦਰਪਾਲ ਨੇ ਬਹੁਤ ਸੋਚਿਆ, ਪਰ ਉਨ੍ਹਾਂ ਨੂੰ ਸਹੀ ਜਵਾਬ ਦਾ ਪੂਰਾ ਭਰੋਸਾ ਨਹੀਂ ਸੀ। ਅਮਿਤਾਭ ਬੱਚਨ ਨੇ ਸਲਾਹ ਦਿੱਤੀ ਕਿ ਉਹ ਖੇਡ ਛੱਡ ਸਕਦੇ ਹਨ। ਅੰਤ ਵਿੱਚ, ਛਿੰਦਰਪਾਲ ਨੇ 50 ਲੱਖ ਰੁਪਏ ਨਾਲ ਘਰ ਵਾਪਸੀ ਦਾ ਫ਼ੈਸਲਾ ਕੀਤਾ। ਔਪਚਾਰਕਤਾ ਲਈ ਉਨ੍ਹਾਂ ਨੇ ਜਮੈਕਾ ਵਿਕਲਪ ਚੁਣਿਆ, ਜੋ ਗ਼ਲਤ ਸੀ; ਸਹੀ ਜਵਾਬ ਜਾਵਾ ਸੀ।
ਪਿੰਡ ਹੁਸੈਨਪੁਰ ’ਚ ਖੁਸ਼ੀ ਦੀ ਲਹਿਰ
ਛਿੰਦਰਪਾਲ ਦੀ ਜਿੱਤ ਦੀ ਖ਼ਬਰ ਜਿਵੇਂ ਹੀ ਉਨ੍ਹਾਂ ਦੇ ਪਿੰਡ ਹੁਸੈਨਪੁਰ ਪਹੁੰਚੀ, ਉੱਥੇ ਖੁਸ਼ੀ ਦੀ ਲਹਿਰ ਫੈਲ ਗਈ। ਛਿੰਦਰਪਾਲ ਨੇ ਸਾਬਤ ਕਰ ਦਿੱਤਾ ਕਿ ਮਿਹਨਤ ਅਤੇ ਲਗਨ ਨਾਲ ਆਮ ਇਨਸਾਨ ਵੀ ਵੱਡਾ ਮੁਕਾਮ ਹਾਸਲ ਕਰ ਸਕਦਾ ਹੈ। ਸ਼ੋਅ ’ਚ ਛਿੰਦਰਪਾਲ ਨੇ ਕਿਹਾ ਕਿ ਉਨ੍ਹਾਂ ਦੇ ਕਈ ਸੁਪਨੇ ਅਜੇ ਅਧੂਰੇ ਹਨ, ਜਿਨ੍ਹਾਂ ਨੂੰ ਉਹ ਇਸ ਇਨਾਮੀ ਰਕਮ ਨਾਲ ਪੂਰਾ ਕਰਨਗੇ। ਉਨ੍ਹਾਂ ਦੀ ਜਿੱਤ ਨਾ ਸਿਰਫ਼ ਉਨ੍ਹਾਂ ਦੇ ਪਰਿਵਾਰ, ਸਗੋਂ ਸਮੁੱਚੇ ਪੰਜਾਬ ਲਈ ਪ੍ਰੇਰਨਾ ਬਣ ਗਈ। ਉਨ੍ਹਾਂ ਨੇ ਇਹ ਵੀ ਕਿਹਾ, “ਮੈਂ ਖੁਦ ਜਿੰਨਾ ਮਰਜ਼ੀ ਸੰਘਰਸ਼ ਕਰ ਲਵਾਂ, ਪਰ ਮੈਂ ਆਪਣੇ ਬੱਚਿਆਂ ਨੂੰ ਜ਼ਰੂਰ ਪੜ੍ਹਾਵਾਂਗਾ।”
