ਨਿਊਜ਼ ਡੈਸਕ: ਅਮਰੀਕਾ ਵਿੱਚ ਪਿਛਲੇ ਕੁਝ ਸਮੇਂ ਤੋਂ ਇਸਕੌਨ ਮੰਦਰਾਂ ’ਤੇ ਲਗਾਤਾਰ ਹਮਲੇ ਹੋ ਰਹੇ ਹਨ। ਇਸ ਵਾਰ ਅਪਰਾਧੀਆਂ ਨੇ ਯੂਟਾ ਦੇ ਸਪੈਨਿਸ਼ ਫੋਰਕ ਵਿਖੇ ਸਥਿਤ ਇਸਕੌਨ ਸ਼੍ਰੀ ਸ਼੍ਰੀ ਰਾਧਾ ਕ੍ਰਿਸ਼ਨ ਮੰਦਰ ਨੂੰ ਨਿਸ਼ਾਨਾ ਬਣਾਇਆ। ਹਮਲੇ ਦੌਰਾਨ ਲਗਭਗ 20-30 ਰਾਊਂਡ ਗੋਲੀਆਂ ਚਲਾਈਆਂ ਗਈਆਂ। ਰਾਹਤ ਵਾਲੀ ਗੱਲ ਇਹ ਹੈ ਕਿ ਗੋਲੀਆਂ ਸਿਰਫ਼ ਮੰਦਰ ਦੀਆਂ ਕੰਧਾਂ ਨਾਲ ਟਕਰਾਈਆਂ ਅਤੇ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਇਹ ਘਟਨਾ ਸੁਰੱਖਿਆ ਕੈਮਰਿਆਂ ਵਿੱਚ ਕੈਦ ਹੋ ਗਈ ਹੈ।
ਭਾਰਤੀ ਦੂਤਘਰ ਦੀ ਸਖ਼ਤ ਪ੍ਰਤੀਕਿਰਿਆ
ਇਸ ਘਟਨਾ ਨੂੰ ਲੈ ਕੇ ਭਾਰਤੀ ਵਣਜ ਦੂਤਘਰ ਨੇ ਸਖ਼ਤ ਪ੍ਰਤੀਕਿਰਿਆ ਦਿੱਤੀ ਹੈ ਅਤੇ ਅਮਰੀਕੀ ਅਧਿਕਾਰੀਆਂ ਤੋਂ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਸੈਨ ਫਰਾਂਸਿਸਕੋ ਵਿੱਚ ਭਾਰਤੀ ਦੂਤਘਰ ਨੇ ਆਪਣੇ ‘X’ ਪਲੈਟਫਾਰਮ ’ਤੇ ਕਿਹਾ, “ਅਸੀਂ ਯੂਟਾ ਦੇ ਸਪੈਨਿਸ਼ ਫੋਰਕ ਵਿਖੇ ਇਸਕੌਨ ਸ਼੍ਰੀ ਸ਼੍ਰੀ ਰਾਧਾ ਕ੍ਰਿਸ਼ਨ ਮੰਦਰ ’ਤੇ ਹੋਈ ਗੋਲੀਬਾਰੀ ਦੀ ਸਖ਼ਤ ਨਿਖੇਧੀ ਕਰਦੇ ਹਾਂ। ਦੂਤਘਰ ਸਾਰੇ ਭਗਤਾਂ ਅਤੇ ਸਮੁਦਾਏ ਨੂੰ ਪੂਰਨ ਸਮਰਥਨ ਦਿੰਦਾ ਹੈ ਅਤੇ ਸਥਾਨਕ ਅਧਿਕਾਰੀਆਂ ਨੂੰ ਤੁਰੰਤ ਕਾਰਵਾਈ ਕਰਨ ਦੀ ਅਪੀਲ ਕਰਦਾ ਹੈ।”
ਰਾਤ ਦੇ ਸਮੇਂ ਹੋਇਆ ਹਮਲਾ
ਇਸਕੌਨ ਨੇ ਘਟਨਾ ਦੀ ਪੁਸ਼ਟੀ ਕਰਦਿਆਂ ਇਸ ਨੂੰ ਨਫ਼ਰਤੀ ਅਪਰਾਧ (ਹੇਟ ਕ੍ਰਾਈਮ) ਕਰਾਰ ਦਿੱਤਾ। ਮੰਦਰ ਦੇ ਅੰਦਰ ਉਸ ਸਮੇਂ 20-30 ਭਗਤ ਮੌਜੂਦ ਸਨ ਜਦੋਂ ਰਾਤ ਨੂੰ ਇਹ ਹਮਲਾ ਹੋਇਆ। ਇਸਕੌਨ ਨੇ ਆਪਣੇ ‘X’ ਅਕਾਊਂਟ ’ਤੇ ਲਿਖਿਆ, “ਇਸ ਘਟਨਾ ਨਾਲ ਮੰਦਰ ਦੀਆਂ ਹੱਥੀਂ ਨੱਕਾਸ਼ੀ ਵਾਲੀਆਂ ਮੇਹਰਾਬਾਂ ਸਮੇਤ ਹਜ਼ਾਰਾਂ ਡਾਲਰ ਦਾ ਸੰਰਚਨਾਤਮਕ ਨੁਕਸਾਨ ਹੋਇਆ ਹੈ।” ਮੰਦਰ ਦੇ ਪ੍ਰਧਾਨ ਵੈ ਵਾਰਡਨ ਨੇ ਦੱਸਿਆ ਕਿ ਜੂਨ ਮਹੀਨੇ ਵਿੱਚ ਮੰਦਰ ਦੀ ਇਮਾਰਤ ’ਤੇ ਤਿੰਨ ਵੱਖ-ਵੱਖ ਮੌਕਿਆਂ ’ਤੇ ਗੋਲੀਬਾਰੀ ਹੋਈ ਸੀ। ਹੁਣ ਕੰਧਾਂ, ਖਿੜਕੀਆਂ ਅਤੇ ਮੇਹਰਾਬਾਂ ’ਤੇ ਗੋਲੀਆਂ ਦੇ ਨਿਸ਼ਾਨ ਹਨ।
ਹਿੰਦੂ ਮੰਦਰਾਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ
ਅਮਰੀਕਾ ਵਿੱਚ ਇਸ ਤੋਂ ਪਹਿਲਾਂ ਵੀ ਹਿੰਦੂ ਮੰਦਰਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ। ਇਸ ਸਾਲ 9 ਮਾਰਚ 2025 ਨੂੰ ਕੈਲੀਫੋਰਨੀਆ ਦੇ ਚੀਨੋ ਹਿੱਲਜ਼ ਵਿਖੇ ਬੋਚਾਸਨਵਾਸੀ ਅਕਸ਼ਰ ਪੁਰੁਸ਼ੋਤਮ ਸਵਾਮੀਨਾਰਾਇਣ ਸੰਸਥਾ (BAPS) ਦੇ ਮੰਦਰ ਵਿੱਚ ਭੰਨਤੋੜ ਕੀਤੀ ਗਈ ਸੀ। ਇਸੇ ਤਰ੍ਹਾਂ, ਕੈਲੀਫੋਰਨੀਆ ਦੇ ਸੈਕਰਾਮੈਂਟੋ ਵਿੱਚ BAPS ਹਿੰਦੂ ਮੰਦਰਾਂ ਦੀਆਂ ਕੰਧਾਂ ’ਤੇ “ਹਿੰਦੂ ਵਾਪਸ ਜਾਓ” ਵਰਗੇ ਨਾਅਰੇ ਲਿਖ ਕੇ ਅਪਵਿੱਤਰ ਕੀਤਾ ਗਿਆ ਸੀ।
