ਦਿਲ ਦਾ ਦੌਰਾ (Heart Attack) ਇੱਕ ਗੰਭੀਰ ਸਮੱਸਿਆ ਹੈ। ਜੇ ਸਮੇਂ ਸਿਰ ਇਸ ਦੀ ਪਛਾਣ ਅਤੇ ਇਲਾਜ ਹੋ ਜਾਵੇ, ਤਾਂ ਮਰੀਜ਼ ਦੀ ਜਾਨ ਬਚਾਈ ਜਾ ਸਕਦੀ ਹੈ, ਪਰ ਥੋੜ੍ਹੀ ਜਿਹੀ ਦੇਰੀ ਵੀ ਜਾਨਲੇਵਾ ਸਾਬਤ ਹੋ ਸਕਦੀ ਹੈ। ਆਮ ਤੌਰ ’ਤੇ ਛਾਤੀ ’ਚ ਤੇਜ਼ ਦਰਦ, ਖੱਬੇ ਪਾਸੇ ਦਰਦ, ਜਾਂ ਸਾਹ ਲੈਣ ’ਚ ਤਕਲੀਫ਼ ਨੂੰ ਹਾਰਟ ਅਟੈਕ ਦੇ ਮੁੱਢਲੇ ਲੱਛਣ ਮੰਨਿਆ ਜਾਂਦਾ ਹੈ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਔਰਤਾਂ ’ਚ ਹਾਰਟ ਅਟੈਕ ਦੇ ਲੱਛਣ ਅਕਸਰ ਪੁਰਸ਼ਾਂ ਨਾਲੋਂ ਕਾਫ਼ੀ ਵੱਖਰੇ ਅਤੇ ਹਲਕੇ ਹੁੰਦੇ ਹਨ? ਔਰਤਾਂ ’ਚ ਇਹ ਲੱਛਣ ਅਕਸਰ ਅਜਿਹੇ ਹੁੰਦੇ ਹਨ ਕਿ ਉਹ ਇਨ੍ਹਾਂ ਨੂੰ ਕਮਜ਼ੋਰੀ, ਥਕਾਵਟ, ਜਾਂ ਗੈਸ ਦੀ ਸਮੱਸਿਆ ਸਮਝ ਕੇ ਨਜ਼ਰਅੰਦਾਜ਼ ਕਰ ਦਿੰਦੀਆਂ ਹਨ। ਆਓ, ਜਾਣਦੇ ਹਾਂ ਔਰਤਾਂ ’ਚ ਹਾਰਟ ਅਟੈਕ ਦੇ ਲੱਛਣ ਅਤੇ ਇਸ ਦੇ ਜੋਖਮ ਦੇ ਕਾਰਨ।
ਔਰਤਾਂ ’ਚ ਹਾਰਟ ਅਟੈਕ ਦੇ ਲੱਛਣ
ਬਹੁਤ ਜ਼ਿਆਦਾ ਥਕਾਵਟ
ਬਿਨਾਂ ਜ਼ਿਆਦਾ ਕੰਮ ਕੀਤੇ ਥਕਾਵਟ ਮਹਿਸੂਸ ਹੋਣਾ ਔਰਤਾਂ ’ਚ ਹਾਰਟ ਅਟੈਕ ਦਾ ਸਭ ਤੋਂ ਆਮ ਲੱਛਣ ਹੈ। ਇਹ ਥਕਾਵਟ ਕਈ ਦਿਨਾਂ ਜਾਂ ਹਫਤਿਆਂ ਤੱਕ ਰਹਿ ਸਕਦੀ ਹੈ ਅਤੇ ਆਰਾਮ ਕਰਨ ’ਤੇ ਵੀ ਦੂਰ ਨਹੀਂ ਹੁੰਦੀ।
ਪਿੱਠ, ਗਰਦਨ, ਜਬਾੜੇ, ਜਾਂ ਮੋਢਿਆਂ ’ਚ ਦਰਦ
ਅਕਸਰ ਔਰਤਾਂ ਨੂੰ ਪਿੱਠ ਦੇ ਉਪਰਲੇ ਹਿੱਸੇ, ਗਰਦਨ, ਜਬਾੜੇ, ਜਾਂ ਮੋਢਿਆਂ ’ਚ ਦਰਦ ਜਾਂ ਦਬਾਅ ਮਹਿਸੂਸ ਹੁੰਦਾ ਹੈ। ਇਹ ਦਰਦ ਹੌਲੀ-ਹੌਲੀ ਵਧ ਸਕਦਾ ਹੈ।
ਪੇਟ ’ਚ ਦਰਦ
ਕਈ ਔਰਤਾਂ ਨੂੰ ਹਾਰਟ ਅਟੈਕ ਦੌਰਾਨ ਪੇਟ ’ਚ ਦਰਦ, ਜਲਣ, ਜਾਂ ਭਾਰੀਪਣ ਮਹਿਸੂਸ ਹੁੰਦਾ ਹੈ। ਇਸ ਨੂੰ ਅਕਸਰ ਐਸਿਡਿਟੀ ਜਾਂ ਗੈਸ ਸਮਝ ਕੇ ਨਜ਼ਰਅੰਦਾਜ਼ ਕਰ ਦਿੱਤਾ ਜਾਂਦਾ ਹੈ, ਜਿਸ ਨਾਲ ਸਮੱਸਿਆ ਗੰਭੀਰ ਹੋ ਸਕਦੀ ਹੈ।
ਸਾਹ ਲੈਣ ’ਚ ਤਕਲੀਫ਼
ਹਾਰਟ ਅਟੈਕ ਦੌਰਾਨ ਔਰਤਾਂ ਨੂੰ ਸਾਹ ਫੁੱਲਣ ਜਾਂ ਸਾਹ ਲੈਣ ’ਚ ਮੁਸ਼ਕਿਲ ਹੋ ਸਕਦੀ ਹੈ, ਭਾਵੇਂ ਉਹ ਕੋਈ ਭਾਰੀ ਕੰਮ ਨਾ ਕਰ ਰਹੀਆਂ ਹੋਣ।
ਉਲਟੀਆਂ ਅਤੇ ਚੱਕਰ ਆਉਣਾ
ਔਰਤਾਂ ’ਚ ਉਲਟੀਆਂ, ਸਿਰ ਚੱਕਰ ਆਉਣਾ, ਜਾਂ ਘੁੰਮਣ ਵਰਗੇ ਲੱਛਣ ਵੀ ਹਾਰਟ ਅਟੈਕ ਦੇ ਸੰਕੇਤ ਹੋ ਸਕਦੇ ਹਨ।
ਨੀਂਦ ਨਾ ਆਉਣਾ ਅਤੇ ਬੇਚੈਨੀ
ਹਾਰਟ ਅਟੈਕ ਤੋਂ ਕੁਝ ਦਿਨ ਜਾਂ ਹਫਤੇ ਪਹਿਲਾਂ ਔਰਤਾਂ ਨੂੰ ਨੀਂਦ ਨਾ ਆਉਣਾ, ਬੇਚੈਨੀ, ਜਾਂ ਘਬਰਾਹਟ ਵਰਗੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ।
ਪੁਰਸ਼ਾਂ ’ਚ ਹਾਰਟ ਅਟੈਕ ਦੇ ਲੱਛਣ
- ਛਾਤੀ ’ਚ ਤੇਜ਼ ਦਰਦ ਜਾਂ ਦਬਾਅ।
- ਸਾਹ ਲੈਣ ’ਚ ਮੁਸ਼ਕਲ।
- ਅਚਾਨਕ ਪਸੀਨਾ ਆਉਣਾ।
- ਚੱਕਰ ਆਉਣਾ ਜਾਂ ਬੇਹੋਸ਼ੀ।
ਔਰਤਾਂ ’ਚ ਲੱਛਣ ਵੱਖਰੇ ਕਿਉਂ ਹੁੰਦੇ ਹਨ?
- ਔਰਤਾਂ ਦੀਆਂ ਧਮਣੀਆਂ ’ਚ ਰੁਕਾਵਟ ਦਾ ਤਰੀਕਾ, ਹਾਰਮੋਨਲ ਬਦਲਾਅ, ਅਤੇ ਸਰੀਰ ਦੀ ਬਣਤਰ ਪੁਰਸ਼ਾਂ ਨਾਲੋਂ ਵੱਖਰੀ ਹੁੰਦੀ ਹੈ।
- ਔਰਤਾਂ ’ਚ ਅਕਸਰ ਛੋਟੀਆਂ ਧਮਣੀਆਂ ’ਚ ਰੁਕਾਵਟ ਹੁੰਦੀ ਹੈ, ਜਿਸ ਕਾਰਨ ਛਾਤੀ ’ਚ ਤੇਜ਼ ਦਰਦ ਦੀ ਬਜਾਏ ਹਲਕੇ ਲੱਛਣ ਦਿਖਾਈ ਦਿੰਦੇ ਹਨ।
ਔਰਤਾਂ ’ਚ ਹਾਰਟ ਅਟੈਕ ਦਾ ਜੋਖਮ ਜ਼ਿਆਦਾ ਕਿਉਂ?
- ਮੇਨੋਪੌਜ਼ ਤੋਂ ਬਾਅਦ: ਮੇਨੋਪੌਜ਼ ਤੋਂ ਬਾਅਦ ਔਰਤਾਂ ’ਚ ਹਾਰਟ ਅਟੈਕ ਦਾ ਜੋਖਮ ਪੁਰਸ਼ਾਂ ਦੇ ਬਰਾਬਰ ਜਾਂ ਇਸ ਤੋਂ ਵੱਧ ਹੋ ਜਾਂਦਾ ਹੈ।
- ਸਿਹਤ ਸਮੱਸਿਆਵਾਂ: ਹਾਈ ਬਲੱਡ ਪ੍ਰੈਸ਼ਰ, ਸ਼ੂਗਰ, ਮੋਟਾਪਾ, ਅਤੇ ਤਣਾਅ ਵਰਗੀਆਂ ਸਮੱਸਿਆਵਾਂ ਜੋਖਮ ਵਧਾਉਂਦੀਆਂ ਹਨ।
- ਹਲਕੇ ਲੱਛਣ: ਔਰਤਾਂ ’ਚ ਲੱਛਣ ਅਸਪੱਸ਼ਟ ਅਤੇ ਹਲਕੇ ਹੋਣ ਕਾਰਨ ਅਕਸਰ ਇਲਾਜ ’ਚ ਦੇਰੀ ਹੋ ਜਾਂਦੀ ਹੈ।
