ਹਰਿਆਣਾ : ਕੁਰੂਕਸ਼ੇਤਰ ਜ਼ਿਲ੍ਹੇ ਦੇ ਇੱਕ 26 ਸਾਲਾ ਵਿਅਕਤੀ ਦੀ ਲੇਬਨਾਨ ਵਿੱਚ ਮੌਤ ਹੋ ਗਈ ਹੈ। ਉਹ ਲਗਭਗ ਇੱਕ ਸਾਲ ਪਹਿਲਾਂ ਲੇਬਨਾਨ ਗਿਆ ਸੀ ਅਤੇ ਇੱਕ ਪਲਾਈਵੁੱਡ ਫੈਕਟਰੀ ਵਿੱਚ ਮਜ਼ਦੂਰ ਵਜੋਂ ਕੰਮ ਕਰਦਾ ਸੀ। ਮ੍ਰਿਤਕ ਦੀ ਪਛਾਣ ਧੀਰਜ ਕੁਮਾਰ ਵਜੋਂ ਹੋਈ ਹੈ, ਜੋ ਕਿ ਗਡਰੀਆ ਮੁਹੱਲਾ, ਵਾਰਡ 7, ਪਿਹੋਵਾ ਦਾ ਰਹਿਣ ਵਾਲਾ ਸੀ। ਧੀਰਜ ਤਿੰਨ ਭੈਣਾਂ ਦਾ ਇਕਲੌਤਾ ਭਰਾ ਸੀ। ਉਸਦੇ ਪਿਤਾ ਪਵਨ ਕੁਮਾਰ ਦਾ ਪਿਹੋਵਾ ਦੇ ਕੈਥਲ ਰੋਡ ‘ਤੇ ਚਾਹ ਦੀ ਦੁਕਾਨ ਸੀ। ਧੀਰਜ ਦੇ ਪਰਿਵਾਰ ਨੇ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਉਸਦੀ ਲਾਸ਼ ਭਾਰਤ ਵਾਪਸ ਲਿਆਉਣ ਦੀ ਅਪੀਲ ਕੀਤੀ ਹੈ।
ਜਾਣਕਾਰੀ ਦਿੰਦਿਆ ਮ੍ਰਿਤਕ ਨੌਜਵਾਨ ਦੇ ਪਿਤਾ ਨੇ ਦੱਸਿਆ ਕਿ ਉਸਦਾ ਪੁੱਤਰ ਧੀਰਜ ਪਿਛਲੇ ਸਾਲ 19 ਫਰਵਰੀ ਨੂੰ ਵਰਕ ਵੀਜ਼ੇ ‘ਤੇ ਲੇਬਨਾਨ ਗਿਆ ਸੀ। ਧੀਰਜ ਲੇਬਨਾਨ ਦੇ ਬੇਕਾ ਵੈਲੀ ਦੇ ਜੇਲਾ ਇੰਡਸਟਰੀਜ਼ ਖੇਤਰ ਵਿੱਚ ਬੋਇਸ ਡਿਜ਼ਾਈਨ ਨਾਮਕ ਇੱਕ ਫੈਕਟਰੀ ਵਿੱਚ ਕੰਮ ਕਰਦਾ ਸੀ। ਧੀਰਜ ਨੇ ਇੱਕ ਮਹੀਨਾ ਪਹਿਲਾਂ ਹੀ ਇਸ ਫੈਕਟਰੀ ਵਿੱਚ ਕੰਮ ਕਰਨਾ ਸ਼ੁਰੂ ਕੀਤਾ ਸੀ। ਇਸ ਤੋਂ ਪਹਿਲਾਂ ਧੀਰਜ ਇੱਕ ਹੋਰ ਫੈਕਟਰੀ ਵਿੱਚ ਚੌਕੀਦਾਰ ਵਜੋਂ ਕੰਮ ਕਰਦਾ ਸੀ। ਫੈਕਟਰੀ ਵਿੱਚ ਕੰਮ ਕਰਦੇ ਸਮੇਂ ਪਲਾਈਵੁੱਡ ਹੇਠਾਂ ਦੱਬਣ ਨਾਲ ਉਸਦੀ ਮੌਤ ਹੋ ਗਈ। ਘਟਨਾ ਦੀ ਸੀਸੀਟੀਵੀ ਫੁਟੇਜ ਵੀ ਸਾਹਮਣੇ ਆਈ ਹੈ।
ਨਾਲ ਹੀ ਪਿਤਾ ਪਵਨ ਨੇ ਕਿਹਾ ਕਿ ਨੇੜਲੇ ਪਿੰਡ ਦੇ ਇੱਕ ਵਿਅਕਤੀ ਨੇ ਉਸਨੂੰ 23 ਜਨਵਰੀ ਨੂੰ ਉਸ ਦੇ ਪੁੱਤਰ ਦੀ ਮੌਤ ਬਾਰੇ ਦੱਸਿਆ। ਜਦਕਿ ਉਸਦੀ ਮੌਤ 21 ਜਨਵਰੀ ਨੂੰ ਹੋਈ ਸੀ। ਲੜਕੇ ਦੀ ਮੌਤ ਤੋਂ ਬਾਅਦ ਇਕ ਕੁੜੀ ਨੇ ਉਸਦੀ ਪਤਨੀ ਹੋਣ ਦਾ ਦਾਅਵਾ ਵੀ ਕੀਤਾ ਹੈ। ਜਦਕਿ ਉਸਦੇ ਪੁੱਤਰ ਨੇ ਕਦੇ ਵੀ ਆਪਣੇ ਵਿਆਹ ਬਾਰੇ ਨਹੀਂ ਦੱਸਿਆ। ਮ੍ਰਿਤਕ ਨੌਜਵਾਨ ਦੇ ਪਿਤਾ ਨੇ ਦੋਸ਼ ਲਗਾਇਆ ਕਿ ਔਰਤ ਨੇ ਵਿਆਹ ਰਜਿਸਟਰ ਕਰਵਾਉਣ ਲਈ ਜਾਅਲੀ ਦਸਤਾਵੇਜ਼ਾਂ ਦੀ ਵਰਤੋਂ ਕੀਤੀ ਸੀ, ਉਸਦੇ ਪੁੱਤਰ ਦੇ ਪਾਸਪੋਰਟ ਵਿੱਚ ਕਿਸੇ ਵੀ ਔਰਤ ਦਾ ਨਾਮ ਨਹੀਂ ਦਿਖਾਇਆ ਗਿਆ ਹੈ। ਉਸਨੇ ਪਿਹੋਵਾ ਦੇ ਤਹਿਸੀਲਦਾਰ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ ਜਿਸ ਵਿੱਚ ਜਾਂਚ ਅਤੇ ਕਾਰਵਾਈ ਦੀ ਮੰਗ ਕੀਤੀ ਗਈ।
ਇਸਤੋਂ ਇਲਾਵਾ ਪਰਿਵਾਰਿਕ ਮੈਂਬਰਾਂ ਨੇ ਕਿਹਾ ਕਿ 29 ਜਨਵਰੀ ਨੂੰ ਉਨ੍ਹਾਂ ਨੇ ਲੇਬਨਾਨੀ ਦੂਤਾਵਾਸ ਨੂੰ ਧੀਰਜ ਦੀ ਲਾਸ਼ ਭਾਰਤ ਲਿਆਉਣ ਦੀ ਅਪੀਲ ਕੀਤੀ ਸੀ। ਇਸ ਦੌਰਾਨ ਉਸਨੂੰ ਪਤਾ ਲੱਗਿਆ ਕਿ ਧੀਰਜ ਦੀ ਪਤਨੀ ਨੇ ਵੀ ਲਾਸ਼ ਭਾਰਤ ਲਿਆਉਣ ਲਈ ਦਾਅਵਾ ਦਾਇਰ ਕੀਤਾ ਹੈ, ਭਾਵੇਂ ਕਿ ਉਹ ਵਿਆਹਿਆ ਨਹੀਂ ਸੀ। ਉਸਨੇ ਦੋਸ਼ ਲਗਾਇਆ ਕਿ ਕੁੜੀ ਅਤੇ ਉਸਦੇ ਪਿਤਾ ਨੇ ਧੀਰਜ ਨੂੰ ਹਨੀ-ਟਰੈਪ ਕੀਤਾ ਸੀ ਅਤੇ ਉਸਦੀ ਕਮਾਈ ਨੂੰ ਹੜੱਪ ਰਹੇ ਸਨ।
