ਚੰਡੀਗੜ੍ਹ: ਹਰਿਆਣਾ ਦੇ 13 ਜ਼ਿਲ੍ਹਿਆਂ ਵਿੱਚ ਅੱਜ ਬਾਰਿਸ਼ ਦਾ ਅਲਰਟ ਜਾਰੀ ਕੀਤਾ ਗਿਆ ਹੈ। ਅੰਬਾਲਾ, ਯਮੁਨਾਨਗਰ, ਨੂੰਹ ਅਤੇ ਪਲਵਲ ਵਿੱਚ ਬਾਰਿਸ਼ ਦਾ ਪੀਲਾ ਅਲਰਟ ਜਾਰੀ ਕੀਤਾ ਗਿਆ ਹੈ। ਜਦਕਿ ਪੰਚਕੂਲਾ, ਪਾਣੀਪਤ, ਸੋਨੀਪਤ, ਰੋਹਤਕ, ਚਰਖੀ ਦਾਦਰੀ, ਝੱਜਰ, ਮਹਿੰਦਰਗੜ੍ਹ, ਰੇਵਾੜੀ, ਗੁੜਗਾਓਂ ਅਤੇ ਫਰੀਦਾਬਾਦ ਵਿੱਚ ਵੀ ਹਲਕੀ ਬਾਰਿਸ਼ ਦਾ ਅਨੁਮਾਨ ਲਗਾਇਆ ਗਿਆ ਹੈ।
ਹਰਿਆਣਾ ਸਰਕਾਰ ਨੇ ਭਾਖੜਾ ਬਿਆਸ ਮੈਨੇਜਮੈਂਟ ਬੋਰਡ (BBMB) ਅਤੇ ਪੰਜਾਬ ਸਰਕਾਰ ਨੂੰ ਇੱਕ ਪੱਤਰ ਲਿਖਿਆ ਹੈ। ਇਸ ਪੱਤਰ ਵਿੱਚ ਹਰਿਆਣਾ ਨੇ ਪੰਜਾਬ ਨੂੰ ਨਹਿਰੀ ਪਾਣੀ ਘਟਾਉਣ ਲਈ ਕਿਹਾ ਹੈ।
ਇਸ ਦੌਰਾਨ, ਕੁਰੂਕਸ਼ੇਤਰ ਦੇ ਸ਼ਾਹਾਬਾਦ ਵਿੱਚ ਮਾਰਕੰਡਾ ਨਦੀ ਓਵਰਫਲੋ ਹੋ ਗਈ ਹੈ। ਮਾਰਕੰਡਾ ਵਿੱਚ ਇਸ ਵੇਲੇ ਪਾਣੀ ਦਾ ਪੱਧਰ ਲਗਭਗ 26 ਹਜ਼ਾਰ ਕਿਊਸਕ ਹੈ। ਪਾਣੀ ਕਠਵਾ ਪਿੰਡ ਵਿੱਚ ਘੁਸ ਚੁੱਕਿਆ ਹੈ, ਜਿੱਥੇ ਹੜ੍ਹ ਵਰਗੇ ਹਾਲਾਤ ਬਣ ਗਏ ਹਨ। ਸੜਕਾਂ ਅਤੇ ਖੇਤ ਪਾਣੀ ਵਿੱਚ ਡੁੱਬ ਚੁੱਕੇ ਹਨ, ਹਾਲਾਂਕਿ ਹੁਣ ਤੱਕ ਘਰਾਂ ਤੱਕ ਪਾਣੀ ਨਹੀਂ ਪਹੁੰਚਿਆ।
ਪ੍ਰਸ਼ਾਸਨ ਨੇ ਕਠਵਾ ਦੇ ਨਾਲ-ਨਾਲ ਗੁਮਟੀ, ਪੱਟੀ ਜਾਮੜਾ, ਮੁਗਲ ਮਾਜਰਾ, ਮਲਕਪੁਰ, ਕਲਸਾਨਾ ਅਤੇ ਤੰਗੌਰ ਵਿੱਚ ਅਲਰਟ ਜਾਰੀ ਕੀਤਾ ਹੈ। ਕੁਰੂਕਸ਼ੇਤਰ ਦੇ ਕਈ ਇਲਾਕਿਆਂ ਵਿੱਚ ਬਾਰਿਸ਼ ਵੀ ਹੋ ਰਹੀ ਹੈ।
ਉਧਰ, ਫਰੀਦਾਬਾਦ ਵਿੱਚ ਮੰਝਾਵਲੀ ਨੇੜੇ ਸਥਿਤ ਪਿੰਡ ਚਿਰਸ ਦੇ ਖੇਤਾਂ ਵਿੱਚ ਯਮੁਨਾ ਦਾ ਪਾਣੀ ਘੁਸ ਗਿਆ। ਇੱਥੇ ਯਮੁਨਾ ਦੇ ਓਵਰਫਲੋ ਹੋਣ ਕਾਰਨ ਤਟਬੰਧ ਟੁੱਟ ਗਿਆ।
ਪੰਚਕੂਲਾ ਦੇ ਮੋਰਨੀ ਖੇਤਰ ਵਿੱਚ ਲੋਕ ਉਫਨਦੇ ਨਾਲੇ ਨੂੰ ਪਾਰ ਕਰਨ ਲਈ ਮਜਬੂਰ ਹਨ। ਇੱਥੇ ਪੱਕਾ ਰਾਹ ਟੁੱਟ ਚੁੱਕਿਆ ਹੈ। ਉਧਰ, ਫਰੀਦਾਬਾਦ ਦੀ ਪਾਲੀ ਰੋਡ ’ਤੇ ਸਵੇਰੇ 5 ਵਜੇ ਵਾਹਨ ਦੀ ਟੱਕਰ ਨਾਲ ਇੱਕ ਤੇਂਦੂਏ ਦੀ ਮੌਤ ਹੋ ਗਈ।
ਹਿਸਾਰ ਜ਼ਿਲ੍ਹੇ ਦੇ ਬਰਵਾਲਾ ਖੇਤਰ ਦੇ ਪਿੰਡ ਰਾਜਲੀ ਸਥਿਤ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿੱਚ ਪਾਣੀ ਘੁਸ ਗਿਆ। ਸਕੂਲ ਦੇ ਮੈਦਾਨ ਤੋਂ ਲੈ ਕੇ ਇਮਾਰਤ ਦੇ ਕਮਰਿਆਂ ਤੱਕ ਪਾਣੀ ਭਰ ਗਿਆ ਹੈ।
ਬੀਤੇ ਕੱਲ੍ਹ ਅੰਬਾਲਾ ਦੀ ਟਾਂਗਰੀ ਨਦੀ ਵਿੱਚ ਆਏ ਉਫਾਨ ਤੋਂ ਬਾਅਦ ਬਣੇ ਹਾਲਾਤਾਂ ਨੂੰ ਵੇਖਦੇ ਹੋਏ ਮੁੱਖ ਮੰਤਰੀ ਨਾਇਬ ਸੈਨੀ ਨੇ ਸਾਰੇ ਜ਼ਿਲ੍ਹਾ ਡਿਪਟੀ ਕਮਿਸ਼ਨਰਾਂ ਨੂੰ ਨਦੀਆਂ ਦਾ ਸਰਵੇ ਕਰਨ ਅਤੇ ਐਮਰਜੈਂਸੀ ਹਾਲਾਤ ਨਾਲ ਨਜਿੱਠਣ ਲਈ ਪੂਰੀ ਤਿਆਰੀ ਰੱਖਣ ਦੇ ਨਿਰਦੇਸ਼ ਦਿੱਤੇ ਹਨ। ਨਾਲ ਹੀ, ਨਦੀਆਂ ਨਾਲ ਲੱਗਦੇ ਪਿੰਡਾਂ, ਬਸਤੀਆਂ ਅਤੇ ਕਲੋਨੀਆਂ ਲਈ ਪਹਿਲਾਂ ਤੋਂ ਹੀ ਯੋਜਨਾ ਤਿਆਰ ਕਰਨ ਦੀ ਹਦਾਇਤ ਵੀ ਦਿੱਤੀ ਹੈ।
ਹਾਲਾਂਕਿ ਅੱਜ ਸਵੇਰੇ ਟਾਂਗਰੀ ਨਦੀ ਸ਼ਾਂਤ ਨਜ਼ਰ ਆਈ। ਰਿਹਾਇਸ਼ੀ ਘਰਾਂ ਵਿੱਚ ਘੁਸਿਆ ਪਾਣੀ ਵੀ ਉਤਰਨ ਲੱਗਾ, ਜਿਸ ਨਾਲ ਲੋਕ ਆਪਣੇ ਘਰਾਂ ਵੱਲ ਮੁੜਨ ਲੱਗੇ।
