ਲੰਦਨ : ਬਰਤਾਨੀਆ ‘ਚ ਸਿੱਖ ਫੌਜੀਆਂ ਨੂੰ 100 ਸਾਲ ਦੇ ਲੰਮੇ ਸਮੇਂ ਤੋਂ ਬਾਅਦ ਨਿਤਨੇਮ ਕਰਨ ਲਈ ਗੁਟਕਾ ਸਾਹਿਬ ਭੇਟ ਕੀਤੇ ਗਏ ਹਨ। ਗੁਟਕਾ ਸਾਹਿਬ ਨੂੰ ਤਿੰਨ ਭਾਸ਼ਾਵਾਂ ‘ਚ ਛਾਪਿਆ ਗਿਆ ਹੈ ਅਤੇ ਫੌਜ ਦੀ ਜ਼ਿੰਦਗੀ ਦੇ ਹਿਸਾਬ ਨਾਲ ਵਾਟਰਪਰੂਫ ਮੈਟੀਰੀਅਲ ਨਾਲ ਤਿਆਰ ਕੀਤਾ ਗਿਆ ਹੈ।
ਬ੍ਰਿਟਿਸ਼ ਫੌਜ ਦੇ ਮੇਜਰ ਦਲਜਿੰਦਰ ਸਿੰਘ ਵਿਰਦੀ ਨੇ ਸਿੱਖ ਫੌਜੀਆਂ ਤੱਕ ਨਿਤਨੇਮ ਵਾਲੇ ਗੁਟਕਾ ਸਾਹਿਬ ਪਹੁੰਚਾਉਣ ਲਈ ਦੋ ਸਾਲ ਤੋਂ ਮੁਹਿੰਮ ਛੇੜੀ ਹੋਈ ਸੀ। ਮੇਜਰ ਦਲਜਿੰਦਰ ਸਿੰਘ ਵਿਰਦੀ ਨੇ ਇਸ ਸਬੰਧੀ ਦੱਸਿਆ ਕਿ ਇਸ ਤੋਂ ਪਹਿਲਾਂ ਫੌਜ ਵੱਲੋਂ ਇਸਾਈ ਧਰਮ ਨਾਲ ਸਬੰਧਤ ਸਮੱਗਰੀ ਮੁਹੱਈਆ ਕਰਵਾਈ ਜਾਂਦੀ ਸੀ ਜਿਸ ਨੂੰ ਵੇਖਦਿਆਂ ਗੁਟਕਾ ਸਾਹਿਬ ਦਾ ਵਿਚਾਰ ਮਨ ‘ਚ ਆਇਆ। ਮੇਜਰ ਦਲਜਿੰਦਰ ਸਿੰਘ ਵੱਲੋਂ ਨਿਤਨੇਮ ਲਈ ਗੁਟਕਾ ਸਾਹਿਬ ਦੀ ਮੰਗ ਉਚ ਅਧਿਕਾਰੀਆਂ ਤੱਕ ਪਹੁੰਚਾਈ ਗਈ ਅਤੇ ਲੰਮੇ ਵਿਚਾਰ ਵਟਾਂਦਰੇ ਤੋਂ ਬਾਅਦ ਇਸ ਨੂੰ ਪ੍ਰਵਾਨਗੀ ਮਿਲ ਗਈ।
ਮੇਜਰ ਦਲਜਿੰਦਰ ਸਿੰਘ ਨੇ ਫੌਜ ਦੇ ਜਰਨੈਲ ਅੱਗੇ ਦਲੀਲ ਪੇਸ਼ ਕੀਤੀ ਕਿ ਗੁਰਬਾਣੀ ਦੇ ਸ਼ਬਦ ਸਿੱਖਾਂ ਲਈ ਗੁਰੂ ਸਾਹਿਬਾਨ ਦੀ ਜਾਗਤ ਜੋਤ ਹਨ ਅਤੇ ਉਨ੍ਹਾਂ ਨੂੰ ਸਿਰਫ਼ ਮਾਨਸਿਕ ਤੇ ਸਰੀਰਕ ਮਜ਼ਬੂਤੀ ਬਖਸ਼ਣ ਤੋਂ ਇਲਾਵਾ ਅਨੁਸ਼ਾਸਨ ‘ਚ ਰਹਿਣ ਦਾ ਬਲ ਵੀ ਬਖਸ਼ਦੇ ਹਨ। ਹੁਣ ਸਿੱਖ ਫੌਜੀ ਚਾਹੇ ਜੰਗ ‘ਚ ਹੋਣ ਜਾਂ ਕਿਸੇ ਹੋਰ ਥਾਂ ਉਹ ਹਮੇਸ਼ਾ ਨਿਤਨੇਮ ਨਾਲ ਜੁੜੇ ਰਹਿਣਗੇ।
ਜ਼ਿਕਰਯੋਗ ਹੈ ਕਿ ਸਿੱਖ ਫੌਜੀਆਂ ਨੂੰ ਨਿਤਨੇਮ ਵਾਲੇ ਗੁਟਕਾ ਸਾਹਿਬ ਪਹਿਲੀ ਵਾਰ 100 ਸਾਲ ਪਹਿਲਾਂ ਮੁਹੱਈਆ ਕਰਵਾਏ ਗਏ ਸਨ। ਗੁਟਕਾ ਸਾਹਿਬ ਦੀ ਛਪਾਈ ਵਿਲਟਸ਼ਾਇਰ ਵਿਖੇ ਕਰਵਾਈ ਗਈ ਹੈ ਅਤੇ ਦਲਜਿੰਦਰ ਸਿੰਘ ਦੀ ਅਗਵਾਈ ਹੇਠ ਇਕ ਵਫਦ ਗੁਟਕਾ ਸਾਹਿਬ ਲੈ ਕੇ ਅੰਮ੍ਰਿਤਸਰ ਪੁੱਜਾ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
