ਉੱਜਵਲਾ ਯੋਜਨਾ ਦੇ ਲਾਭਪਾਤਰੀਆਂ ਲਈ ਤੋਹਫ਼ਾ, ਇੱਕ ਸਾਲ ਲਈ 603 ਰੁਪਏ ਵਿੱਚ ਮਿਲੇਗਾ ਗੈਸ ਸਿਲੰਡਰ

ਨਿਊਜ਼ ਡੈਸਕ : ਕੌਮਾਂਤਰੀ ਮਹਿਲਾ ਦਿਵਸ ਮੌਕੇ ਮੋਦੀ ਕੈਬਨਿਟ ਨੇ ਔਰਤਾਂ ਲਈ ਵੱਡਾ ਐਲਾਨ ਕੀਤਾ ਹੈ। ਉਜਵਲਾ ਯੋਜਨਾ ਦੇ ਲਾਭਪਾਤਰੀਆਂ ਨੂੰ ਸਰਕਾਰ ਵੱਲੋਂ ਦਿੱਤੀ ਜਾਂਦੀ 300 ਰੁਪਏ ਦੀ ਸਬਸਿਡੀ ਨੂੰ ਇੱਕ ਸਾਲ ਲਈ ਵਧਾਉਣ ਦਾ ਫੈਸਲਾ ਕੀਤਾ ਗਿਆ ਹੈ। ਇਸ ਤਹਿਤ ਸਾਲਾਨਾ 12 ਸਿਲੰਡਰ ਮਿਲਣਗੇ। ਇਹ ਸਕੀਮ 31 ਮਾਰਚ 2025 ਤੱਕ ਜਾਰੀ ਰਹੇਗੀ। ਕੇਂਦਰੀ ਮੰਤਰੀ ਪੀਯੂਸ਼ ਗੋਇਲ ਨੇ ਯੋਜਨਾ ਨੂੰ ਇੱਕ ਸਾਲ ਲਈ ਵਧਾਉਣ ਦਾ ਐਲਾਨ ਕਰਦੇ ਹੋਏ ਕਿਹਾ ਕਿ ਮੰਤਰੀ ਮੰਡਲ ਨੇ ਪ੍ਰਧਾਨ ਮੰਤਰੀ ਉੱਜਵਲਾ ਯੋਜਨਾ ਦੇ ਗਾਹਕਾਂ ਨੂੰ 300 ਰੁਪਏ ਦੀ ਸਬਸਿਡੀ 31 ਮਾਰਚ, 2025 ਤੱਕ ਜਾਰੀ ਰੱਖਣ ਦੀ ਮਨਜ਼ੂਰੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਇਸ ‘ਤੇ ਕੁੱਲ 12,000 ਕਰੋੜ ਰੁਪਏ ਖਰਚ ਹੋਣਗੇ।

ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਆਏ ਇਸ ਫੈਸਲੇ ਨੂੰ ਸਰਕਾਰ ਦਾ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ। ਨਿਯਮਾਂ ਦੇ ਅਨੁਸਾਰ, ਸਰਕਾਰ ਇੱਕ ਸਾਲ ਵਿੱਚ LPG ਸਿਲੰਡਰ ਦੇ 12 ਤੱਕ ਰੀਫਿਲ ਕਰਨ ਲਈ ਯੋਗ ਲਾਭਪਾਤਰੀਆਂ ਨੂੰ 300 ਰੁਪਏ ਅਦਾ ਕਰਦੀ ਹੈ। ਇਸ ਤੋਂ ਪਹਿਲਾਂ ਸਰਕਾਰ ਵੱਲੋਂ ਇਸ ‘ਤੇ 100 ਰੁਪਏ ਦੀ ਸਬਸਿਡੀ ਦਿੱਤੀ ਜਾਂਦੀ ਸੀ। ਪਰ ਅਕਤੂਬਰ 2023 ਵਿੱਚ ਸਬਸਿਡੀ ਦੀ ਰਕਮ 100 ਰੁਪਏ ਪ੍ਰਤੀ ਸਿਲੰਡਰ ਤੋਂ ਵਧਾ ਕੇ 300 ਰੁਪਏ ਕਰ ਦਿੱਤੀ ਗਈ। ਨਵੀਂ ਦਿੱਲੀ ਵਿੱਚ 14.2 ਕਿਲੋਗ੍ਰਾਮ ਐਲਪੀਜੀ ਸਿਲੰਡਰ ਦੀ ਕੀਮਤ 903 ਰੁਪਏ ਹੈ। ਹੁਣ ਜਦੋਂ ਉੱਜਵਲਾ ਯੋਜਨਾ ਦੇ ਲਾਭਪਾਤਰੀਆਂ ਨੂੰ ਸਿਲੰਡਰ ‘ਤੇ 300 ਰੁਪਏ ਦੀ ਸਬਸਿਡੀ ਮਿਲੇਗੀ, ਤਾਂ ਇਹ ਸਿਲੰਡਰ ਉਨ੍ਹਾਂ ਲਈ 603 ਰੁਪਏ ਦਾ ਹੋਵੇਗਾ।

ਸਰਕਾਰ 14.2 ਕਿਲੋ ਦੇ ਗੈਸ ਸਿਲੰਡਰ ਦੇ ਨਾਲ ਨਵੇਂ ਗੈਸ ਕੁਨੈਕਸ਼ਨ ਲਈ ਯੋਗ ਉਮੀਦਵਾਰਾਂ ਨੂੰ 1600 ਰੁਪਏ ਟ੍ਰਾਂਸਫਰ ਕਰਦੀ ਹੈ। ਇਹ ਰਕਮ 5 ਕਿਲੋ ਦੇ ਸਿਲੰਡਰ ਲਈ 1150 ਰੁਪਏ ਹੈ।

14.2 ਕਿਲੋਗ੍ਰਾਮ ਸਿਲੰਡਰ ਲਈ 1250 ਰੁਪਏ ਜਾਂ 5 ਕਿਲੋਗ੍ਰਾਮ ਸਿਲੰਡਰ ਲਈ 800 ਰੁਪਏ ਸਿਲੰਡਰ ਸੁਰੱਖਿਆ ਜਮ੍ਹਾਂ

ਰੈਗੂਲੇਟਰ ਲਈ 150 ਰੁਪਏ

LPG ਹੋਜ਼ ਲਈ 100 ਰੁਪਏ

25 ਰੁਪਏ ਦਾ ਘਰੇਲੂ ਗੈਸ ਖਪਤਕਾਰ ਕਾਰਡ

75 ਰੁਪਏ ਨਿਰੀਖਣ/ਇੰਸਟਾਲੇਸ਼ਨ/ਪ੍ਰਦਰਸ਼ਨ ਫੀਸ

ਪ੍ਰਧਾਨ ਮੰਤਰੀ ਉੱਜਵਲਾ ਯੋਜਨਾ (PMUY) 2016 ਵਿੱਚ ਸ਼ੁਰੂ ਕੀਤੀ ਗਈ ਸੀ। ਇਸ ਦਾ ਉਦੇਸ਼ ਪਹਿਲੇ ਪੜਾਅ ਵਿੱਚ ਗਰੀਬੀ ਰੇਖਾ ਤੋਂ ਹੇਠਾਂ (ਬੀਪੀਐਲ) ਪਰਿਵਾਰਾਂ ਦੀਆਂ ਪੰਜ ਕਰੋੜ ਮਹਿਲਾ ਮੈਂਬਰਾਂ ਨੂੰ ਐਲਪੀਜੀ ਕੁਨੈਕਸ਼ਨ ਪ੍ਰਦਾਨ ਕਰਨਾ ਸੀ। ਇਸ ਸਕੀਮ ਦਾ ਵਿਸਤਾਰ ਅਪ੍ਰੈਲ 2018 ਵਿੱਚ ਸੱਤ ਹੋਰ ਸ਼੍ਰੇਣੀਆਂ (SC/ST, PMAY, AAY, ਮੋਸਟ ਬੈਕਵਰਡ ਕਲਾਸ, ਟੀ ਗਾਰਡਨ, ਫੋਰੈਸਟ ਡਵੈਲਰਜ਼, ਟਾਪੂਆਂ) ਦੀਆਂ ਮਹਿਲਾ ਲਾਭਪਾਤਰੀਆਂ ਨੂੰ ਸ਼ਾਮਲ ਕਰਨ ਲਈ ਕੀਤਾ ਗਿਆ ਸੀ। ਦੂਜੇ ਪੜਾਅ ਵਿੱਚ, ਟੀਚਾ ਅੱਠ ਕਰੋੜ ਐਲਪੀਜੀ ਕੁਨੈਕਸ਼ਨਾਂ ਤੱਕ ਵਧਾ ਦਿੱਤਾ ਗਿਆ ਸੀ।