ਟੋਰਾਂਟੋ: ਮਹਿੰਗਾਈ ਘਟਣ ਦੇ ਬਾਵਜੂਦ ਵੀ ਗਰੋਸਰੀ ਦੀਆਂ ਕੀਮਤਾਂ ਨੇ 41 ਸਾਲ ਦਾ ਰਿਕਾਰਡ ਤੋੜ ਦਿੱਤਾ ਹੈ। ਸਾਲਾਨਾ ਆਧਾਰ `ਤੇ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਸਤੰਬਰ ਮਹੀਨੇ ਦੌਰਾਨ 11.4 ਫ਼ੀਸਦੀ ਮਹਿਗੀਆਂ ਹੋਈਆਂ ਜਦਕਿ ਤੇਲ ਕੀਮਤਾਂ ‘ਚ ਕਮੀ ਕਾਰਨ ਕੁਝ ਮਹਿੰਗਾਈ ਦਰ ਘਟ ਕੇ 6.9 ਫ਼ੀਸਦੀ ‘ਤੇ ਆ ਗਈ। ਚਾਹਪੱਤੀ ਅਤੇ ਕੌਫ਼ੀ ਦੇ ਭਾਅ 16.4 ਫ਼ੀਸਦੀ ਵਧ ਚੁੱਕੇ ਹਨ ਜਦਕਿ ਤਾਜ਼ਾ ਫਲਾਂ ਦੀ ਕੀਮਤ 12.7 ਫ਼ੀਸਦੀ ਵਧ ਗਈ। ਇਸੇ ਤਰਾਂ ਬਰੈੱਡ 14.8 ਫ਼ੀਸਦੀ ਮਹਿੰਗੀ ਹੋਈ ਜਦਕਿ ਤਾਜ਼ੀਆਂ ਸਬਜ਼ੀਆਂ ਦੇ ਭਾਅ 11.8 ਫ਼ੀਸਦੀ ਵਧ ਗਏ।
ਡੇਅਰੀ ਉਤਪਾਦਾਂ ਦੀ ਗੱਲ ਕਰੀਏ ਤਾਂ ਇਹ 9.7 ਫ਼ੀਸਦੀ ਮਹਿੰਗੇ ਹੋਏ ਅਤੇ ਮੀਟ ਦੀਆਂ ਕੀਮਤਾਂ ‘ਚ 7.6 ਫ਼ੀਸਦੀ ਵਾਧਾ ਹੋਇਆ। ਕੀਮਤਾਂ ‘ਚ ਵਾਧੇ ਦਾ ਇੱਕ ਕਾਰਨ ਅਮਰੀਕੀ ਡਾਲਰ ਦੇ ਮੁਕਾਬਲੇ ਲੁਨੀ ਦਾ ਕਮਜ਼ੋਰ ਹੋਣਾ ਵੀ ਮੰਨਿਆ ਜਾ ਰਿਹਾ ਹੈ। ਗਰਮੀਆਂ ‘ਚ ਇੱਕ ਅਮਰੀਕੀ ਡਾਲਰ ਦੀ ਕੀਮਤ ।.30 ਡਾਲਰ ਸੀ ਜੋ ਹੁਣ 1.40 ਡਾਲਰ ਹੋ ਗਈ ਹੈ। ਕੈਨੇਡੀਅਨ ਸੈਂਟਰ ਫ਼ੋਰ ਪੌਲਿਸੀ ਅਲਟਰਨੇਟਿਵਜ਼ ਦੇ ਸੀਨੀਅਰ ਇਕੋਨੋਮਿਸਟ ਡੇਵਿਡ ਮੈਕਡੋਨਲਡ ਨੇ ਚਿਤਾਵਨੀ ਦਿੱਤੀ ਹੈ ਕਿ ਫੂਡ ਇਨਫ਼ਲੇਸ਼ਨ ਭਵਿੱਖ ‘ਚ ਹੇਠਾਂ ਆਉਣ ਵਾਲੀ ਨਹੀਂ ਅਤੇ ਲੋਕਾਂ ਨੂੰ ਖਾਣ-ਪੀਣ ‘ਤੇ ਖਰਚਾ ਘਟਾਉਣਾ ਹੋਵੇਗਾ।
ਗਰੀਬੀ ਵਿਰੁੱਧ ਕੰਮ ਕਰਨ ਵਾਲੀ ਐਕਟੀਵਿਸਟ ਲੀਲਾ ਸਾਰੰਗੀ ਨੇ ਕਿਹਾ ਕਿ ਘੱਟ ਆਮਦਨ ਵਾਲੇ ਗੰਭੀਰ ਸੰਕਟ ‘ਚ ਘਿਰ ਚੁੱਕੇ ਹਨ। ਉਨ੍ਹਾਂ ਨੂੰ ਸਮਝ ਨਹੀਂ ਆ ਰਿਹਾ ਕਿ ਉਹ ਗਰੌਸਰੀ ਖਰੀਦਣ, ਕਿਰਾਇਆ ਦੇਣ ਜਾਂ ਦਵਾਈਆਂ ਖਰੀਦਣ। ਲੀਲਾ ਸਾਰੰਗੀ ਨੇ ਦਾਅਵਾ ਕੀਤਾ ਕਿ 14 ਲੱਖ ਬੱਚੇ ਆਰਥਿਕ ਤੌਰ ‘ਤੇ ਬੇਹੱਦ ਕਮਜ਼ੋਰ ਪਰਿਵਾਰਾਂ ‘ਚ ਰਹਿ ਰਹੇ ਹਨ, ਜਿਥੇ ਇੱਕ ਟਾਈਮ ਦੀ ਰੋਟੀ ਦਾ ਵੀ ਔਖਾ ਹੋ ਸਕਦਾ ਹੈ। ਉੱਥੇ ਹੀ ਟੋਰਾਂਟੋ ਦੇ ਡੇਲੀ ਫੂਡ ਬੈਂਕ ਦੇ ਮੁੱਖ ਕਾਰਜਕਾਰੀ ਅਫ਼ਸਰ ਨੀਲ ਨੇ ਦੱਸਿਆ ਕਿ ਜਨਵਰੀ ਵਿਚ ਉਨ੍ਹਾਂ ਕੋਲ 1 ਲੱਖ 20 ਹਜ਼ਾਰ ਲੋਕ ਆ ਰਹੇ ਸਨ ਜਿਨ੍ਹਾਂ ਦੀ ਗਿਣਤੀ ਵਧ ਕੇ 1 ਲੱਖ 86 ਹਜ਼ਾਰ ਹੋ ਗਈ ਹੈ। ਗਰੌਸਰੀ ਕੀਮਤਾਂ ਵਧਣ ਦੀ ਰਫ਼ਤਾਰ ਬਹੁਤ ਜ਼ਿਆਦਾ ਹੋ ਚੁੱਕੀ ਹੈ ਅਤੇ ਪਿਛਲੇ 10 ਮਹੀਨੇ ਤੋਂ ਇਹ ਕੁਲ ਮਹਿੰਗਾਈ ਦਰ ਤੋਂ ਤੇਜ਼ੀ ਨਾਲ ਵਧ ਰਹੀਆਂ ਹਨ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
