ਹਰਿਆਣਾ : ਹਰਿਆਣਾ ‘ਚ ਸਪੈਸ਼ਲ ਮੈਡੀਕਲ ਅਫਸਰਾਂ (SMOs) ਦੀ ਸਿੱਧੀ ਭਰਤੀ ਸਮੇਤ ਵੱਖ-ਵੱਖ ਮੰਗਾਂ ਦਾ ਹੱਲ ਨਾ ਹੋਣ ਕਾਰਨ ਸਰਕਾਰੀ ਡਾਕਟਰਾਂ ਦੀ ਦੋ ਦਿਨਾਂ ਹੜਤਾਲ ਅੱਜ ਦੂਜੇ ਦਿਨ ਵੀ ਜਾਰੀ ਹੈ। ਸੋਮਵਾਰ ਸਵੇਰੇ ਆਊਟਪੇਸ਼ੈਂਟ ਵਿਭਾਗ (OPD) ਦੇ ਖੁੱਲ੍ਹਣ ਦੇ ਬਾਵਜੂਦ, ਕਈ ਜ਼ਿਲ੍ਹਿਆਂ ਦੇ ਡਾਕਟਰ ਆਪਣੇ ਦਫ਼ਤਰਾਂ ਵਿੱਚ ਨਜ਼ਰ ਨਹੀਂ ਆਏ, ਜਿਸ ਕਾਰਨ ਮਰੀਜ਼ਾਂ ਨੂੰ ਲਾਈਨ ਵਿੱਚ ਉਡੀਕ ਕਰਨੀ ਪਈ।
ਦੱਸਣਯੋਗ ਹੈ ਕਿ ਪੰਚਕੂਲਾ, ਸੋਨੀਪਤ ਅਤੇ ਬਹਾਦਰਗੜ੍ਹ ਵਿੱਚ ਸੇਵਾਵਾਂ ਪ੍ਰਭਾਵਿਤ ਹੋਈਆਂ, ਜਦਕਿ ਯਮੁਨਾਨਗਰ, ਕੁਰੂਕਸ਼ੇਤਰ ਅਤੇ ਕੈਥਲ ਵਿੱਚ ਹਾਲਾਤ ਆਮ ਦੱਸੇ ਗਏ। ਅਸ਼ਾਂਤੀ ਦੀ ਸੰਭਾਵਨਾ ਦੇ ਕਾਰਨ ਭਿਵਾਨੀ ਅਤੇ ਹਿਸਾਰ ਵਿੱਚ ਧਾਰਾ 163 ਪਾਬੰਦੀਆਂ ਲਗਾਈਆਂ ਗਈਆਂ ਹਨ। ਇਸਤੋਂ ਇਲਾਵਾ ਹਿਸਾਰ ਵਿੱਚ ਡੀਸੀ ਦੇ ਨਿਰੀਖਣ ਤੋਂ ਬਾਅਦ ਸਿਹਤ ਸੇਵਾਵਾਂ ਆਮ ਵਾਂਗ ਹੋਣ ਦੀ ਰਿਪੋਰਟ ਮਿਲੀ ਕਿਉਂਕਿ ਵਿਕਲਪਕ ਸਟਾਫ, ਮੈਡੀਕਲ ਕਾਲਜ ਅਤੇ ਪੀਜੀ ਦੇ ਵਿਦਿਆਰਥੀ ਓਪੀਡੀ ਅਤੇ ਐਮਰਜੈਂਸੀ ਚਲਾ ਰਹੇ ਸਨ।
ਹੜਤਾਲ ਦੇ ਪਹਿਲੇ ਦਿਨ ਝੱਜਰ ਦੇ ਐਮਰਜੈਂਸੀ ਰੂਮ ਵਿੱਚ ਪਹੁੰਚੀ ਇੱਕ ਔਰਤ ਨੂੰ ਸਮੇਂ ਸਿਰ ਇਲਾਜ ਦੁਆਰਾ ਬਚਾਇਆ ਗਿਆ ਅਤੇ ਬਾਅਦ ਵਿੱਚ ਪੀਜੀਆਈ ਰੈਫਰ ਕਰ ਦਿੱਤਾ ਗਿਆ। ਡਾਕਟਰਾਂ ਨੇ ਕਿਹਾ ਕਿ ਮੁੱਢਲੀ ਸਹਾਇਤਾ ਤੋਂ ਬਿਨਾਂ ਉਸਦੀ ਹਾਲਤ ਗੰਭੀਰ ਹੋ ਸਕਦੀ ਸੀ। ਓਧਰ ਦੂਜੇ ਪਾਸੇ ਐਚਸੀਐਮਐਸ ਐਸੋਸੀਏਸ਼ਨ ਨੇ ਫਿਰ ਦੁਹਰਾਇਆ ਹੈ ਕਿ ਜੇਕਰ ਏਸੀਪੀ ਸਮੇਤ ਮੰਗਾਂ ਪੂਰੀਆਂ ਨਹੀਂ ਹੁੰਦੀਆਂ ਤਾਂ ਉਹ 10 ਦਸੰਬਰ ਤੋਂ ਅਣਮਿੱਥੇ ਸਮੇਂ ਲਈ ਹੜਤਾਲ ਸ਼ੁਰੂ ਕਰਨਗੇ।
ਹਰਿਆਣਾ ਸਿਵਲ ਮੈਡੀਕਲ ਸਰਵਿਸਿਜ਼ ਐਸੋਸੀਏਸ਼ਨ ਦੇ ਸੂਬਾ ਪ੍ਰਧਾਨ ਡਾ. ਰਾਜੇਸ਼ ਖਿਆਲੀਆ ਨੇ ਕਿਹਾ ਕਿ ਜਦੋਂ ਤੱਕ ਮੰਗਾਂ ਪੂਰੀਆਂ ਨਹੀਂ ਹੁੰਦੀਆਂ ਉਦੋਂ ਤੱਕ ਪਹਿਲਾਂ ਐਲਾਨੀ ਹੜਤਾਲ ਤੋਂ ਪਿੱਛੇ ਹਟਣ ਦਾ ਸਵਾਲ ਹੀ ਪੈਦਾ ਨਹੀਂ ਹੁੰਦਾ। ਜੇਕਰ ਸਰਕਾਰ ਨੇ ਮੰਗਾਂ ਨਾ ਮੰਨੀਆ ਤਾਂ ਅਸੀਂ 10 ਦਸੰਬਰ ਤੋਂ ਅਣਮਿੱਥੇ ਸਮੇਂ ਲਈ ਹੜਤਾਲ ‘ਤੇ ਚਲੇ ਜਾਵਾਂਗੇ। ਦੱਸ ਦਈਏ ਕਿ ਡਾਕਟਰਾਂ ਦੀਆਂ ਦੋ ਮੰਗਾਂ ਹਨ, ਪਹਿਲਾਂ, ਸੀਨੀਅਰ ਮੈਡੀਕਲ ਅਫਸਰਾਂ (ਐਸਐਮਓ) ਦੀ ਸਿੱਧੀ ਭਰਤੀ ਬੰਦ ਕਰਨਾ ਅਤੇ ਪ੍ਰਵਾਨਿਤ ਸੋਧੇ ਹੋਏ ਵਧੇ ਹੋਏ ਸੇਵਾ ਵੰਡ (ACP) ਢਾਂਚੇ ਦੀ ਨੋਟੀਫਿਕੇਸ਼ਨ ਜਾਰੀ ਕਰਨਾ । ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਸਾਡੇ ਮੰਤਰੀ ਅਤੇ ਅਧਿਕਾਰੀ ਇਸ ਸਮੇਂ ਉਨ੍ਹਾਂ ਨਾਲ ਗੱਲਬਾਤ ਕਰ ਰਹੇ ਹਨ। ਉਨ੍ਹਾਂ ਦੀਆਂ ਸਾਰੀਆਂ ਚਿੰਤਾਵਾਂ ਸੁਣੀਆਂ ਜਾਣਗੀਆਂ।
