ਨਵੀਂ ਦਿੱਲੀ: ਦਿੱਲੀ ਦੇ ਸਤਿਆ ਨਿਕੇਤਨ ਵਿੱਚ ਪੰਜ ਮੰਜ਼ਿਲਾ ਇਮਾਰਤ ਡਿੱਗਣ ਨਾਲ 7 ਲੋਕਾਂ ਦੀ ਮੌਤ ਅਤੇ 6 ਦੇ ਜ਼ਖਮੀ ਹੋਣ ਤੋਂ ਬਾਅਦ ਨਗਰ ਨਿਗਮ ਨੇ ਪੂਰੀ ਦਿੱਲੀ ਦੀਆਂ ਇਮਾਰਤਾਂ ਦੀ ਜਾਂਚ ਦੇ ਹੁਕਮ ਦਿੱਤੇ ਹਨ। MCD ਨੇ ਸਾਰੇ ਜ਼ੋਨਾਂ ਦੇ ਬਿਲਡਿੰਗ ਵਿਭਾਗ ਨਾਲ ਜੁੜੇ ਐਗਜ਼ੀਕਿਊਟਿਵ ਇੰਜੀਨੀਅਰਾਂ ਨੂੰ ਆਪਣੇ-ਆਪਣੇ ਇਲਾਕਿਆਂ ਦੀਆਂ ਇਮਾਰਤਾਂ ਦਾ ਨਿਰੀਖਣ ਕਰਕੇ 10 ਸਤੰਬਰ ਤੱਕ ਰਿਪੋਰਟ ਦੇਣ ਲਈ ਕਿਹਾ ਹੈ।
ਹਾਈਕੋਰਟ ’ਚ ਦਿੱਤੇ ਜਾਣ ਵਾਲੇ ਹਲਫਨਾਮੇ ’ਚ ਸ਼ਾਮਲ ਹੋਵੇਗੀ ਰਿਪੋਰਟ
MCD ਵੱਲੋਂ ਜਾਂਚ ਦੌਰਾਨ ਇਕੱਠੀ ਕੀਤੀ ਜਾਣ ਵਾਲੀ ਜਾਣਕਾਰੀ ਨੂੰ ਦਿੱਲੀ ਹਾਈਕੋਰਟ ਵਿੱਚ ਪੇਸ਼ ਕੀਤੇ ਜਾਣ ਵਾਲੇ ਹਲਫਨਾਮੇ ਦਾ ਹਿੱਸਾ ਬਣਾਇਆ ਜਾਵੇਗਾ। ਇਹ ਹਲਫਨਾਮਾ 10 ਦਿਨਾਂ ਦੇ ਅੰਦਰ ਦਾਖ਼ਲ ਕੀਤਾ ਜਾਣਾ ਹੈ, ਜਦਕਿ ਮਾਮਲੇ ਦੀ ਅਗਲੀ ਸੁਣਵਾਈ 25 ਸਤੰਬਰ ਨੂੰ ਹੋਵੇਗੀ।
MCD ਮੁਤਾਬਕ ਇਸ ਸਾਲ ਦੇ ਸ਼ੁਰੂ ਵਿੱਚ ਕੀਤੇ ਗਏ ਸਰਵੇ ਦੌਰਾਨ ਦਿੱਲੀ ਦੀਆਂ 27 ਲੱਖ 84 ਹਜ਼ਾਰ 286 ਇਮਾਰਤਾਂ ਦੀ ਜਾਂਚ ਕੀਤੀ ਗਈ ਸੀ। ਇਸ ਸਰਵੇ ਵਿੱਚ ਸਿਰਫ਼ 19 ਇਮਾਰਤਾਂ ਨੂੰ ਖ਼ਤਰਨਾਕ ਪਾਇਆ ਗਿਆ ਸੀ।
ਹਾਦਸੇ ਮਾਮਲੇ ’ਚ 3 ਗ੍ਰਿਫ਼ਤਾਰ
ਸਤਿਆ ਨਿਕੇਤਨ ਹਾਦਸੇ ਦੇ ਮਾਮਲੇ ਵਿੱਚ ਪੁਲਿਸ ਨੇ ਪ੍ਰਾਪਰਟੀ ਮਾਲਕ ਉਰਮਿਲਾ ਗੁਪਤਾ, ਉਨ੍ਹਾਂ ਦੇ ਪਤੀ ਹਰਿਰਾਮ ਗੁਪਤਾ ਅਤੇ ਪੁੱਤਰ ਮਹੇਸ਼ ਗੁਪਤਾ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਮੁਤਾਬਕ ਪ੍ਰਾਪਰਟੀ ਉਰਮਿਲਾ ਗੁਪਤਾ ਦੇ ਨਾਮ ’ਤੇ ਰਜਿਸਟਰਡ ਹੈ, ਪਰ ਇਸ ਦਾ ਪ੍ਰਬੰਧ ਅਤੇ ਸੰਚਾਲਨ ਉਨ੍ਹਾਂ ਦੇ ਪਤੀ ਤੇ ਪੁੱਤਰ ਵੱਲੋਂ ਕੀਤਾ ਜਾਂਦਾ ਸੀ।
ਤਿੰਨਾਂ ਨੂੰ ਸੋਮਵਾਰ ਰਾਤ ਪਟਿਆਲਾ ਹਾਊਸ ਕੋਰਟ ਵਿੱਚ ਪੇਸ਼ ਕੀਤਾ ਗਿਆ। ਅਦਾਲਤ ਨੇ ਹਰਿਰਾਮ ਅਤੇ ਉਰਮਿਲਾ ਨੂੰ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ, ਜਦਕਿ ਮਹੇਸ਼ ਨੂੰ 2 ਦਿਨਾਂ ਦੀ ਪੁਲਿਸ ਹਿਰਾਸਤ ਦਿੱਤੀ ਗਈ। ਪੁਲਿਸ ਹੁਣ PG ਸੰਚਾਲਕਾਂ ਅਤੇ ਲੇਬਰ ਠੇਕੇਦਾਰ ਦੀ ਵੀ ਭਾਲ ਕਰ ਰਹੀ ਹੈ।
28 ਘੰਟੇ ਚੱਲਿਆ ਰੈਸਕਿਊ ਆਪਰੇਸ਼ਨ
ਇਮਾਰਤ ਡਿੱਗਣ ਤੋਂ ਬਾਅਦ NDRF ਦੀਆਂ ਟੀਮਾਂ ਨੇ ਕਰੀਬ 28 ਘੰਟਿਆਂ ਤੱਕ ਮਲਬਾ ਹਟਾਉਣ ਅਤੇ ਲੋਕਾਂ ਨੂੰ ਬਚਾਉਣ ਲਈ ਆਪਰੇਸ਼ਨ ਚਲਾਇਆ। ਮਲਬੇ ਵਿੱਚੋਂ ਕੁੱਲ 12 ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ। ਹਾਦਸੇ ਵਿੱਚ 7 ਲੋਕਾਂ ਦੀ ਮੌਤ ਹੋਈ, ਜਦਕਿ 3 ਜ਼ਖਮੀਆਂ ਦੀ ਹਾਲਤ ਗੰਭੀਰ ਦੱਸੀ ਗਈ ਹੈ।
MCD ਦੇ 5 ਅਧਿਕਾਰੀ ਸਸਪੈਂਡ
ਹਾਦਸੇ ਤੋਂ ਬਾਅਦ MCD ਨੇ ਸਾਊਥ ਜ਼ੋਨ ਦੇ ਡਿਪਟੀ ਕਮਿਸ਼ਨਰ ਰਾਕੇਸ਼ ਕੁਮਾਰ ਨੂੰ ਸਸਪੈਂਡ ਕਰ ਦਿੱਤਾ। ਇਸ ਦੇ ਨਾਲ ਚਾਰ ਇੰਜੀਨੀਅਰਿੰਗ ਅਧਿਕਾਰੀਆਂ ’ਤੇ ਵੀ ਵਿਭਾਗੀ ਕਾਰਵਾਈ ਪੂਰੀ ਹੋਣ ਤੱਕ ਮੁਅੱਤਲੀ ਦੀ ਕਾਰਵਾਈ ਕੀਤੀ ਗਈ ਹੈ। IAS ਅਧਿਕਾਰੀ ਸ਼ਾਸ਼ਵਤ ਸੌਰਭ ਨੂੰ ਸਾਊਥ ਜ਼ੋਨ ਦਾ ਵਾਧੂ ਚਾਰਜ ਦਿੱਤਾ ਗਿਆ ਹੈ।
300 ਘਰਾਂ ’ਚੋਂ ਕਰੀਬ 170 ’ਚ PG
ਸਤਿਆ ਨਿਕੇਤਨ ਇਲਾਕਾ 1965 ਤੋਂ 1970 ਦੇ ਵਿਚਕਾਰ ਝੁੱਗੀ ਵਸਨੀਕਾਂ ਦੇ ਮੁੜ ਵਸੇਬੇ ਲਈ ਵਿਕਸਿਤ ਕੀਤਾ ਗਿਆ ਸੀ। 1970 ਦੇ ਦਹਾਕੇ ਵਿੱਚ ਸਾਊਥ ਕੈਂਪਸ ਸ਼ੁਰੂ ਹੋਣ ਤੋਂ ਬਾਅਦ ਇਲਾਕੇ ਵਿੱਚ ਵਿਦਿਆਰਥੀਆਂ ਦੀ ਗਿਣਤੀ ਵਧੀ ਅਤੇ ਕਈ ਘਰ PG ਵਿੱਚ ਤਬਦੀਲ ਹੋ ਗਏ। ਇੱਥੇ ਕਰੀਬ 300 ਮਕਾਨ ਹਨ, ਜਿਨ੍ਹਾਂ ਵਿੱਚ ਲਗਭਗ 170 ਵਿੱਚ PG ਚੱਲ ਰਹੇ ਹਨ।
ਅਰਬਨ ਪਲਾਨਿੰਗ ਮਾਹਿਰ ਜਗਦੀਸ਼ ਮਮਗੈਨ ਮੁਤਾਬਕ ਦਿੱਲੀ ਦੀਆਂ ਕਈ ਪੁਰਾਣੀਆਂ ਇਮਾਰਤਾਂ ਵਾਧੂ ਮੰਜ਼ਿਲਾਂ ਦਾ ਭਾਰ ਝੱਲਣ ਲਈ ਤਿਆਰ ਨਹੀਂ ਕੀਤੀਆਂ ਗਈਆਂ ਸਨ। ਉਨ੍ਹਾਂ ਅਨੁਸਾਰ ਦਿੱਲੀ ਦੇ ਲਗਭਗ 75 ਲੱਖ ਘਰਾਂ ਵਿੱਚੋਂ ਸਿਰਫ਼ 1.75 ਲੱਖ ਇਮਾਰਤਾਂ ਕੋਲ ਮਨਜ਼ੂਰਸ਼ੁਦਾ ਬਿਲਡਿੰਗ ਲੇਆਉਟ ਪਲਾਨ ਹਨ।
