ਕੈਨੇਡਾ ਵਿੱਚ ਸੜਕ ਹਾਦਸੇ ਦੌਰਾਨ ਲੁਧਿਆਣਾ ਦੀ ਧੀ ਦੀ ਹੋਈ ਮੌਤ

ਨਿਊਜ਼ ਡੈਸਕ: ਲੁਧਿਆਣਾ ਦੇ ਪਿੰਡ ਗੁੱਡੇ ਦੀ ਰਹਿਣ ਵਾਲੀ 25 ਸਾਲਾ ਰਮਨਦੀਪ ਕੌਰ ਮਾਨ ਦੀ ਕੈਨੇਡਾ ਦੇ ਅਲਬਰਟਾ ਸੂਬੇ ਵਿੱਚ ਇੱਕ ਸੜਕ ਹਾਦਸੇ ਦੌਰਾਨ ਮੌਤ ਹੋ ਗਈ ਹੈ। ਇਹ ਹਾਦਸਾ 7 ਅਗਸਤ ਨੂੰ ਅਲਬਰਟਾ ਦੇ ‘ਜ਼ਾਰ’ (Czar) ਇਲਾਕੇ ਵਿੱਚ ਹਾਈਵੇਅ 41 ਅਤੇ ਹਾਈਵੇਅ 13 ਦੇ ਚੌਰਾਹੇ ‘ਤੇ ਵਾਪਰਿਆ।

ਰਮਨਦੀਪ ਕੈਨੇਡੀਅਨ ਕਰੈਕਸ਼ਨਲ ਸਰਵਿਸਿਜ਼ (ਜੇਲ੍ਹ ਪ੍ਰਸ਼ਾਸਨ) ਵਿੱਚ ਇੱਕ ਕਰੈਕਸ਼ਨਲ ਅਫ਼ਸਰ ਸੀ। ਉਹ ਇੱਕ ਮਿੰਨੀ-ਵੈਨ ਵਿੱਚ ਇੱਕ ਮਹਿਲਾ ਕੈਦੀ ਨੂੰ ਲੈ ਕੇ ਜਾ ਰਹੀ ਸੀ ਜਦੋਂ ਵੈਨ ਦੀ ਟੱਕਰ ਸਾਹਮਣੇ ਤੋਂ ਆ ਰਹੇ ਇੱਕ ‘ਹੀਨੋ’ (Hino) ਬਾਕਸ ਟਰੱਕ ਨਾਲ ਹੋ ਗਈ। ਰਮਨਦੀਪ ਕੌਰ, ਉਸਦੇ ਸਾਥੀ ਨਿਕਲਾਸ ਸਰਬਨ (57) ਅਤੇ ਮਹਿਲਾ ਕੈਦੀ ਕਿਆਰਾ ਮੁਸਵਾਗਨ (24) ਦੀ ਹਾਦਸੇ ਵਾਲੀ ਥਾਂ ‘ਤੇ ਹੀ ਮੌਤ ਹੋ ਗਈ।

ਕੈਨੇਡੀਅਨ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਸੁਧਾਰ ਸੇਵਾਵਾਂ (Correctional Service) ਦੇ ਕਮਿਸ਼ਨਰ ਤਲਾਲ ਡਾਕਲਬਾਬ ਨੇ ਇਸ ਘਟਨਾ ‘ਤੇ ਦੁੱਖ ਪ੍ਰਗਟ ਕੀਤਾ ਹੈ। ਰਾਇਲ ਕੈਨੇਡੀਅਨ ਮਾਊਂਟਿਡ ਪੁਲਿਸ ਇਸ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕਰ ਰਹੀ ਹੈ।

ਰਮਨਦੀਪ ਕੌਰ ਦੀ ਮੌਤ ਨੇ ਵਿਦੇਸ਼ ਗਏ ਭਾਰਤੀ ਨੌਜਵਾਨਾਂ ਦੀ ਸੁਰੱਖਿਆ ਬਾਰੇ ਇੱਕ ਵਾਰ ਫਿਰ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਭਾਰਤ ਸਰਕਾਰ ਵੱਲੋਂ ਸੰਸਦ ਵਿੱਚ ਦਿੱਤੀ ਗਈ ਜਾਣਕਾਰੀ ਅਨੁਸਾਰ, 2018 ਅਤੇ 2025 ਦੇ ਵਿਚਕਾਰ ਕੈਨੇਡਾ ਵਿੱਚ ਹਿੰਸਕ ਘਟਨਾਵਾਂ ਦੌਰਾਨ 17 ਭਾਰਤੀ ਵਿਦਿਆਰਥੀਆਂ ਦੀ ਮੌਤ ਹੋਈ—ਜੋ ਕਿ ਕਿਸੇ ਵੀ ਹੋਰ ਦੇਸ਼ ਦੇ ਮੁਕਾਬਲੇ ਸਭ ਤੋਂ ਵੱਧ ਅੰਕੜਾ ਹੈ।