ਟੋਰਾਂਟੋ: ਕੋਰੋਨਾ ਵਾਇਰਸ ਸੰਕਟ ਦੇ ਚੱਲਦਿਆਂ ਜਿੱਥੇ ਦੁਨੀਆਂ ਭਰ ਦੇ ਕਈ ਦੇਸ਼ਾਂ ਚ ਲਾਕ ਡਾਊਨ ਜਾਰੀ ਹੈ। ਵਾਇਰਸ ਦੇ ਪ੍ਰਸਾਰ ਨੂੰ ਰੋਕਣ ਲਈ ਸਰਹੱਦਾਂ ਨੂੰ ਬੰਦ ਕਰਕੇ ਜਿੱਥੇ ਪੂਰਨ ਤੌਰ ਤੇ ਆਵਾਜਾਈ ਬੰਦ ਕੀਤੀ ਹੋਈ ਹੈ ਇਸਦੇ ਚਲਦਿਆਂ ਫੈਡਰਲ ਸਰਕਾਰ ਨੇ ਇਮੀਗ੍ਰੇਸ਼ਨ ਸਿਸਟਮ ‘ਚ ਕੁਝ ਆਰਜ਼ੀ ਤਬਦੀਲੀਆਂ ਕੀਤੀਆਂ ਹਨ, ਜਿਨ੍ਹਾਂ ‘ਚੋਂ ਮੁੱਖ ਹੇਠ ਲਿਖੀਆਂ ਹਨ:
ਵਰਕ ਪਰਮਿਟ:
ਫੈਡਰਲ ਸਰਕਾਰ ਵੱਲੋਂ ਜਿਥੇ ਪਰਵਾਸੀ ਲੋਕਾਂ ਦੇ ਦਾਖ਼ਲ ਹੋਣ ‘ਤੇ ਲਗਾਈ ਰੋਕ ਲਗਾਈ ਹੋਈ ਹੈ। ਉੱਥੇ ਹੀ ਹੁਣ ਵਰਕ ਪਰਮਿਟ ਹਾਸਲ ਕਰ ਚੁੱਕੇ ਕੈਨੇਡਾ ਵਿਚ ਦਾਖ਼ਲ ਹੋ ਸਕਣਗੇ, ਪਰ ਉਨ੍ਹਾਂ ਨੂੰ 14 ਦਿਨਾਂ ਲਈ ਆਪਣੇ ਆਪ ਨੂੰ ਇਕਾਂਤਵਾਸ ਵਿਚ ਰੱਖਣਾ ਪਵੇਗਾ। ਉੱਥੇ ਹੀ ਸਿਰਫ਼ ਅਮਰੀਕਾ ਤੋਂ ਕੈਨੇਡਾ ਆਉਣ ਵਾਲੇ ਟਰੱਕ ਡਰਾਈਵਰਾਂ ‘ਤੇ ਇਹ ਸ਼ਰਤ ਲਾਗੂ ਨਹੀਂ ਹੋਵੇਗੀ।
ਸਟਡੀ ਵੀਜ਼ਾ:
ਕੈਨੇਡਾ ਦੇ ਮਾਨਤਾ ਪ੍ਰਾਪਤ ਕਾਲਜਾਂ ਵਿਚ ਦਾਖ਼ਲਾ ਲੈ ਚੁੱਕੇ ਅਤੇ ਸਟੱਡੀ ਪਰਮਿਟ ਹਾਸਲ ਕਰ ਚੁੱਕੇ ਵਿਦਿਆਰਥੀਆਂ ਦੇ ਕੈਨੇਡਾ ਆਉਣ ‘ਤੇ ਕੋਈ ਰੋਕ ਨਹੀਂ ਹੋਵੇਗੀ।
ਰਿਫਿਊਜੀਆਂ ਅਤੇ ਟੂਰਿਸਟਾਂ ਲਈ:
ਕੈਨੇਡਾ ਵਿਚ ਘੁੰਮਣ ਆਏ, ਕੰਮ ਕਰ ਰਹੇ, ਵਿਦਿਆਰਥੀ ਅਤੇ ਰਿਫਿਊਜੀ ਲੋਕਾਂ ਦੇ ਨੇੜਲੇ ਪਰਿਵਾਰਕ ਮੈਂਬਰਾਂ ਦੇ ਕੈਨੇਡਾ ਵਿਚ ਦਾਖ਼ਲ ਹੋਣ ‘ਤੇ ਕੋਈ ਪਾਬੰਦੀ ਨਹੀਂ ਹੋਵੇਗੀ। ਜਿਨ੍ਹਾਂ ਚ ਜੀਵਨ ਸਾਥੀ, ਬੱਚੇ, ਮਾਪੇ ਅਤੇ ਸਰਪ੍ਰਸਤ ਆਉਂਦੇ ਹਨ।
ਪੀਆਰ:
ਪੀਆਰ ਲਈ ਪ੍ਰਕਿਰਿਆ ਪੂਰੀ ਕਰ ਕੇ ਪੀਆਰ ਹਾਸਲ ਕਰ ਚੁੱਕੇ ਉਮੀਦਵਾਰ ਕੈਨੇਡਾ ਵਿਚ ਦਾਖ਼ਲ ਹੋ ਸਕਣਗੇ। ।
ਖੇਤੀਬਾੜੀ ਅਤੇ ਫੂਡ ਪ੍ਰੋਸੈਸਿੰਗ ਖੇਤਰ ਦੇ ਕਾਮਿਆਂ ਲਈ:
ਕਾਮਿਆਂ ਲਈ ਭਰਤੀ ਪ੍ਰਕਿਰਿਆ ਲਾਜ਼ਮੀ ਨਹੀਂ ਹੋਣਗੀਆਂ। ਰੁਜ਼ਗਾਰ ਦੇਣ ਵਾਲੇ ਵੀ ਹੁਣ ਕਾਮਿਆਂ ਨੂੰ ਇਕ ਸਾਲ ਦੀ ਬਜਾਏ 2 ਸਾਲ ਲਈ ਕੰਮ ‘ਤੇ ਰੱਖ ਸਕਣਗੇ। ਖੇਤੀਬਾੜੀ ਅਤੇ ਫੂਡ ਪ੍ਰੋਸੈਸਿੰਗ ਖੇਤਰ ਦੀਆਂ ਐੱਲਐੱਮਆਈਏ ਅਰਜ਼ੀਆਂ ਨੂੰ ਪਹਿਲ ਦੇ ਆਧਾਰ ‘ਤੇ ਮਨਜ਼ੂਰ ਕੀਤਾ ਜਾਵੇਗਾ।
ਪੇਰੈਂਟਸ ਐਂਡ ਗ੍ਰੈਂਡ ਪੇਰੈਂਟਸ ਪ੍ਰੋਗਰਾਮ:
ਜਨਵਰੀ 2020 ਵਿਚ ਖੁੱਲ੍ਹਣ ਵਾਲੇ ਇਸ ਪ੍ਰੋਗਰਾਮ ਨੂੰ ਪਹਿਲਾਂ ਹੀ ਕੁਝ ਮੁਸ਼ਕਲਾਂ ਦੇ ਚੱਲਦਿਆਂ ਆਰਜ਼ੀ ਤੌਰ ‘ਤੇ ਲਟਕਾਇਆ ਗਿਆ ਸੀ ਅਤੇ ਹੁਣ ਕੁਝ ਹਫ਼ਤਿਆਂ ਵਿਚ ਇਹ ਮੁੜ ਲਾਗੂ ਹੋਣ ਵਾਲਾ ਸੀ। ਇਸ ਪ੍ਰੋਗਰਾਮ ਤਹਿਤ ਸਾਲ 2020 ਤੋਂ 2022 ਤਕ ਹਰ ਸਾਲ 21,000 ਮਾਪਿਆਂ ਨੂੰ ਪੱਕੇ ਤੌਰ ‘ਤੇ ਕੈਨੇਡਾ ਆਉਣ ਲਈ ਮਨਜ਼ੂਰੀ ਦਿੱਤੀ ਜਾਣੀ ਹੈ।
ਵੀਜ਼ਾ ਵੈਧਤਾ:
ਆਰਜ਼ੀ ਤੌਰ ‘ਤੇ ਕੈਨੇਡਾ ਵਿਚ ਰਹਿ ਰਹੇ ਲੋਕ ਰਹਿਣ ਲਈ ਹੋਰ ਸਮਾਂ ਵਧਾਉਣ ਲਈ ਆਨਲਾਈਨ ਅਪਲਾਈ ਕਰ ਸਕਦੇ ਹਨ।
ਉੱਥੇ ਹੀ ਲੋੜੀਂਦੇ ਦਸਤਾਵੇਜ਼ ਦੀ ਘਾਟ ਕਾਰਨ ਉਮੀਦਵਾਰਾਂ ਦੀ ਅਰਜ਼ੀ ਰੱਦ ਨਹੀਂ ਕੀਤੀ ਜਾਵੇਗੀ। ਬਾਇਓਮੈਟ੍ਰਿਕ ਅਤੇ ਡਾਕਟਰੀ ਮੁਆਇਨਾ ਨਾ ਕਰਵਾ ਸਕਣ ਵਾਲੇ ਉਮੀਦਵਾਰਾਂ ਦੀ ਵੀ ਅਰਜ਼ੀ ਖ਼ਾਰਜ ਨਹੀਂ ਹੋਵੇਗੀ। ਉਮੀਦਵਾਰਾਂ ਨੂੰ ਲੋੜੀਂਦੇ ਦਸਤਾਵੇਜ਼ ਮੁਹੱਈਆ ਕਰਵਾਉਣ ਲਈ 90 ਦਿਨ ਦਾ ਵਾਧੂ ਸਮਾਂ ਦਿੱਤਾ ਜਾਵੇਗਾ।
ਉੱਥੇ ਹੀ’ਗਲੋਬਲ ਟੇਲੈਂਟ ਸਟਰੀਮ’ ਕੈਟਾਗਿਰੀ ਵਾਸਤੇ ਐੱਲਐੱਮਆਈਏ ਅਰਜ਼ੀ ਦੀ ਪ੍ਰਕਿਰਿਆ 10 ਦਿਨਾਂ ਵਿਚ ਹੋਵੇਗੀ। ਐੱਲਐੱਮਆਈਏ ਵਿਚ ਪਿਛਲੇ ਉਮੀਦਵਾਰ ਦਾ ਨਾਂ ਹਟਾ ਕੇ ਨਵੇਂ ਉਮੀਦਵਾਰ ਦਾ ਨਾਂ 5 ਦਿਨ ਦੀ ਬਜਾਏ 1 ਦਿਨ ਵਿਚ ਸ਼ਾਮਲ ਕਰਵਾਇਆ ਜਾ ਸਕੇਗਾ।
ਇਸਦੇ ਨਾਲ ਹੀ ਸਿਟੀਜ਼ਨਸ਼ਿਪ ਲੈਣ ਲਈ ਹਰ ਤਰ੍ਹਾਂ ਦੀ ਪ੍ਰਕਿਰਿਆ, ਜਿਵੇਂ ਸਿਟੀਜ਼ਨਸ਼ਿਪ ਟੈਸਟ, ਸਹੁੰ ਚੁੱਕ ਸਮਾਗਮ ਆਦਿ ਨੂੰ ਆਰਜ਼ੀ ਤੌਰ ‘ਤੇ ਬੰਦ ਕਰ ਦਿੱਤਾ ਗਿਆ ਹੈ। ਰਿਫਿਊਜੀ ਦੇ ਆਧਾਰ ‘ਤੇ ਅਰਜ਼ੀ ਦੇਣ ਵਾਲੇ 13 ਅਪ੍ਰੈਲ ਤਕ ਨਿੱਜੀ ਤੌਰ ‘ਤੇ ਅਰਜ਼ੀ ਜਮ੍ਹਾਂ ਨਹੀਂ ਕਰਵਾ ਸਕਣਗੇ।
