ਚੰਡੀਗੜ੍ਹ : 27 ਅਤੇ 28 ਮਾਰਚ ਨੂੰ ਸੁਖਨਾ ਝੀਲ ‘ਤੇ ਇੱਕ ਏਅਰ ਸ਼ੋਅ ਆਯੋਜਿਤ ਕੀਤਾ ਜਾਵੇਗਾ। ਸੁਰੱਖਿਆ ਅਤੇ ਸੁਚਾਰੂ ਆਵਾਜਾਈ ਨੂੰ ਯਕੀਨੀ ਬਣਾਉਣ ਲਈ, ਸ਼ਹਿਰ ਦੇ ਕਈ ਪ੍ਰਮੁੱਖ ਰੂਟਾਂ ‘ਤੇ ਆਵਾਜਾਈ ਪਾਬੰਦੀਆਂ ਲਾਗੂ ਰਹਿਣਗੀਆਂ, ਜਿਸ ਲਈ ਟ੍ਰੈਫਿਕ ਪੁਲਿਸ ਨੇ ਇੱਕ ਐਡਵਾਈਜ਼ਰੀ ਜਾਰੀ ਕੀਤੀ ਹੈ। ਚੰਡੀਗੜ੍ਹ ਪ੍ਰਸ਼ਾਸਨ, ਪੁਲਿਸ, ਸਿਹਤ ਵਿਭਾਗ, ਨਗਰ ਨਿਗਮ, ਫਾਇਰ ਸਰਵਿਸਿਜ਼ ਅਤੇ ਹੋਰ ਏਜੰਸੀਆਂ ਏਅਰ ਸ਼ੋਅ ਨੂੰ ਸਫਲ ਬਣਾਉਣ ਲਈ ਮਿਲ ਕੇ ਕੰਮ ਕਰ ਰਹੀਆਂ ਹਨ। ਸਾਰੇ ਵਿਭਾਗਾਂ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਮੀਟਿੰਗਾਂ ਕਰਕੇ ਸੁਰੱਖਿਆ ਅਤੇ ਪ੍ਰਬੰਧਾਂ ਨੂੰ ਅੰਤਿਮ ਰੂਪ ਦਿੱਤਾ ਗਿਆ ਹੈ।
ਪ੍ਰਸ਼ਾਸਨ ਨੇ ਸੱਤ ਪਿਕਅੱਪ ਪੁਆਇੰਟ ਸਥਾਪਤ ਕੀਤੇ ਹਨ, ਜਿਨ੍ਹਾਂ ਵਿੱਚ ਰੇਲਵੇ ਕਲੋਨੀ ਗਰਾਊਂਡ ਮਨੀਮਾਜਰਾ, ਦੁਸਹਿਰਾ ਗਰਾਊਂਡ ਮਨੀਮਾਜਰਾ, ਪਰੇਡ ਗਰਾਊਂਡ ਸੈਕਟਰ 17, ਰੈਲੀ ਗਰਾਊਂਡ ਸੈਕਟਰ 25, ਮੇਲਾ ਗਰਾਊਂਡ ਸੈਕਟਰ 34, ਪਾਰਕਿੰਗ ਏਰੀਆ ਉੱਪਲ ਸੋਸਾਇਟੀ ਮਨੀਮਾਜਰਾ ਅਤੇ ਲਲਿਤ ਹੋਟਲ ਆਈਟੀ ਪਾਰਕ ਵਿਖੇ ਪਾਰਕਿੰਗ ਸ਼ਾਮਲ ਹਨ। ਇੱਥੋਂ, ਲੋਕ ਸ਼ੋਅ ਵਿੱਚ ਸ਼ਾਮਲ ਹੋਣ ਲਈ ਬੱਸਾਂ ਲੈ ਸਕਦੇ ਹਨ।
ਏਅਰ ਸ਼ੋਅ ਦੌਰਾਨ ਸੁਖਨਾ ਝੀਲ ਅਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਨਿੱਜੀ ਵਾਹਨਾਂ ਦੇ ਦਾਖਲ ਹੋਣ ਦੀ ਸਖ਼ਤ ਮਨਾਹੀ ਹੋਵੇਗੀ। ਸਿਰਫ਼ ਐਮਰਜੈਂਸੀ ਸੇਵਾਵਾਂ ਅਤੇ ਅਧਿਕਾਰਤ ਵਾਹਨਾਂ ਨੂੰ ਹੀ ਇਜਾਜ਼ਤ ਹੋਵੇਗੀ। ਅਧਿਕਾਰੀਆਂ ਨੇ ਲੋਕਾਂ ਨੂੰ ਛੇ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਆਪਣੇ ਨਾਲ ਨਾ ਲਿਆਉਣ ਦੀ ਅਪੀਲ ਕੀਤੀ ਹੈ। ਬਜ਼ੁਰਗਾਂ ਅਤੇ ਬਿਮਾਰ ਵਿਅਕਤੀਆਂ ਨੂੰ ਵੀ ਭੀੜ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ।
ਦੱਸਣਯੋਗ ਹੈ ਕਿ ਪੰਜਾਬ ਦੇ ਰਾਜਪਾਲ ਅਤੇ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਨੂੰ ਵੀ ਚੰਡੀਗੜ੍ਹ ਏਅਰ ਫੋਰਸ ਸਟੇਸ਼ਨ ਦੇ ਏਅਰ ਕਮਾਂਡਰ ਦੀਪਕ ਪੰਤ ਨੇ ਇਸ ਸਮਾਗਮ ਵਿੱਚ ਸੱਦਾ ਦਿੱਤਾ ਹੈ। ਉਨ੍ਹਾਂ ਨੂੰ ਮੁੱਖ ਮਹਿਮਾਨ ਵਜੋਂ ਸੱਦਾ ਦਿੱਤਾ ਗਿਆ ਹੈ। ਉਹ 28 ਮਾਰਚ ਨੂੰ ਸਵੇਰੇ ਕਰੀਬ 11 ਵਜੇ ਇਸ ਸਮਾਗਮ ਵਿੱਚ ਸ਼ਾਮਲ ਹੋਣਗੇ।
ਦੱਸ ਦਈਏ ਸ਼ਟਲ ਬੱਸ ਸੇਵਾਵਾਂ ਸਵੇਰੇ 8:00 ਵਜੇ ਤੋਂ ਸਵੇਰੇ 9:00 ਵਜੇ ਤੱਕ ਚੱਲਣਗੀਆਂ। ਸੁਖਨਾ ਝੀਲ ਦੇ ਨੇੜੇ ਨਿੱਜੀ ਵਾਹਨਾਂ ਨੂੰ ਇਜਾਜ਼ਤ ਨਹੀਂ ਹੋਵੇਗੀ। ਸੁਰੱਖਿਆ ਕਾਰਨਾਂ ਕਰਕੇ ਬੈਗ ਅਤੇ ਖਾਣ-ਪੀਣ ਦੀਆਂ ਚੀਜ਼ਾਂ ਦੀ ਮਨਾਹੀ ਹੋਵੇਗੀ; ਸਿਰਫ਼ ਪਾਰਦਰਸ਼ੀ ਪਾਣੀ ਦੀਆਂ ਬੋਤਲਾਂ ਦੀ ਇਜਾਜ਼ਤ ਹੋਵੇਗੀ।
ਜ਼ਿਕਰਯੋਗ ਹੈ ਕਿ ਚੰਡੀਗੜ੍ਹ ਏਅਰ ਸ਼ੋਅ ਵਿੱਚ ਸਿਰਫ਼ ਸੂਰਿਆ ਕਿਰਨ ਐਰੋਬੈਟਿਕ ਟੀਮ ਹੀ ਪ੍ਰਦਰਸ਼ਨ ਕਰੇਗੀ। ਇਹ ਟੀਮ BAE ਹਾਕ Mk-132 ਜੈੱਟ ਟ੍ਰੇਨਰ ਜਹਾਜ਼ ਉਡਾਉਂਦੀ ਹੈ, ਅਤੇ ਕੁੱਲ ਨੌਂ ਲਾਲ ਅਤੇ ਚਿੱਟੇ ਜਹਾਜ਼ ਇੱਕੋ ਸਮੇਂ ਅਸਮਾਨ ਵਿੱਚ ਉੱਡਦੇ ਦਿਖਾਈ ਦੇਣਗੇ। ਇਸਨੂੰ ਏਸ਼ੀਆ ਦੀ ਇੱਕੋ ਇੱਕ ਨੌਂ ਜਹਾਜ਼ਾਂ ਵਾਲੀ ਐਰੋਬੈਟਿਕ ਟੀਮ ਮੰਨਿਆ ਜਾਂਦਾ ਹੈ। ਇਸ ਸ਼ੋਅ ਵਿੱਚ ਪ੍ਰੀਸੀਜ਼ਨ ਫਾਰਮੇਸ਼ਨ, ਲੂਪਸ, ਬੈਰਲ ਰੋਲ, ਇਨਵਰਟਿਡ ਫਲਾਇੰਗ, ਹਾਈ-ਸਪੀਡ ਡਾਈਵਜ਼ ਅਤੇ ਡੀਐਨਏ ਵਰਗੇ ਸਿਗਨੇਚਰ ਕਰਤਬ ਹੀ ਦਿਖਾਏ ਜਾਣਗੇ । ਇਹ ਪੂਰਾ ਪ੍ਰਦਰਸ਼ਨ ਲਗਭਗ 30 ਤੋਂ 45 ਮਿੰਟ ਤੱਕ ਚੱਲੇਗਾ।
