ਟੋਰਾਂਟੋ: ਕੈਨੇਡਾ ਵਾਸੀਆਂ ‘ਤੇ ਮਹਿੰਗਾਈ ਦਾ ਬੋਝ ਲਗਾਤਾਰ ਵਧਦਾ ਜਾ ਰਿਹਾ ਹੈ ਅਤੇ ਉਹ ਆਪਣੇ ਕਰੈਡਿਟ ਕਾਰਡ ਦੀ ਪਹਿਲਾਂ ਨਾਲ ਵੱਧ ਵਰਤੋਂ ਕਰਨ ਲਈ ਮਜਬੂਰ ਹੋ ਚੁੱਕੇ ਹਨ। ਇਕੁਈਫੈਕਸ ਕੈਨੇਡਾ (Equifax Canada) ਦੇ ਤਾਜ਼ਾ ਸਰਵੇਖਣ ਮੁਤਾਬਕ ਕੈਨੇਡਾ ਵਾਸੀਆਂ ਸਿਰ ਕਰੈਡਿਟ ਕਾਰਡ ਦਾ ਔਸਤ ਬਕਾਇਆ ਵਧ ਕੇ 2,121 ਡਾਲਰ ਹੋ ਗਿਆ ਹੈ।
ਦੂਜੇ ਪਾਸੇ ਗੈਰ ਮੌਰਗੇਜ ਵਾਲਾ ਔਸਤ ਕਰਜ਼ਾ ਵਧ ਕੇ 21,188 ਡਾਲਰ ਹੋ ਗਿਆ ਹੈ ਅਤੇ 2020 ਦੀ ਪਹਿਲੀ ਤਿਮਾਹੀ ਤੋਂ ਬਾਅਦ ਇਹ ਸਭ ਤੋਂ ਉਪਰਲਾ ਪੱਧਰ ਹੈ। ਦੂਜੇ ਪਾਸੇ ਲਗਾਤਾਰ 6ਵੀਂ ਤਿਮਾਹੀ ਦੌਰਾਨ ਕਰੈਡਿਟ ਕਾਰਡ ਦੀ ਵਰਤੋਂ ਵਿਚ ਤੇਜ਼ੀ ਦਰਜ ਕੀਤੀ ਗਈ ਹੈ। ਰਹਿਣ-ਸਹਿਣ ਦੇ ਖਰਚੇ ‘ਚ ਵਾਧਾ ਅਤੇ ਲਗਾਤਾਰ ਵਧਦਾ ਕਰਜ਼ਾ ਕੈਨੇਡੀਅਨ ਪਰਿਵਾਰਾਂ ਲਈ ਚਿੰਤਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਸਰਵੇਖਣ ਦੌਰਾਨ ਸਿਰਫ਼ 50 ਫ਼ੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਨਿੱਜੀ ਆਰਥਿਕ ਜ਼ਰੂਰਤਾਂ ਦੇ ਮਾਮਲੇ ‘ਚ ਸੌਖਾ ਮਹਿਸੂਸ ਕਰ ਰਹੇ ਹਨ। 2021 ‘ਚ ਸੌਖਾ ਮਹਿਸੂਸ ਕਰਨ ਵਾਲਿਆਂ ਦੀ ਗਿਣਤੀ 61 ਫ਼ੀਸਦੀ ਦਰਜ ਕੀਤੀ ਗਈ ਸੀ।
ਇਕੁਈਫੈਕਸ ਕੈਨੇਡਾ ਦੀ ਸੀਨੀਅਰ ਕੰਪਲਾਇੰਸ ਅਫ਼ਸਰ ਜੁਲੀ ਕੁਜ਼ਮਿਕ ਨੇ ਕਿਹਾ ਕਿ ਇਸ ਚੀਜ਼ ਨਾਲ ਕੋਈ ਫ਼ਰਕ ਨਹੀਂ ਪੈਂਦਾ ਕਿ ਲੋਕ ਕੈਨੇਡਾ ਦੇ ਕਿਸ ਸੂਬੇ ‘ਚ ਰਹਿੰਦੇ ਹਨ ਜਾਂ ਉਨ੍ਹਾਂ ਦੀ ਉਮਰ ਕਿੰਨੀ ਹੈ ਤੇ ਸਿੱਟਾ ਇਹ ਨਿਕਲਦਾ ਹੈ ਕਿ ਲੋਕ ਆਪਣੀ ਵਿੱਤੀ ਹਾਲਤ ਪ੍ਰਤੀ ਬੇਹੱਦ ਚਿੰਤਤ ਹਨ। ਹਰ ਮਹੀਨੇ ਆਉਣ ਵਾਲੇ ਬਿੱਲ ਅਤੇ ਹੋਰ ਖਰਚਿਆਂ ਨੇ ਲੋਕਾਂ ਵਿਚ ਤਣਾਅ ਦਾ ਪੱਧਰ ਵਧਾ ਦਿੱਤਾ ਹੈ। ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੇ ਵਧਦੇ ਭਾਅ ਅਤੇ ਕਿਰਾਏ ‘ਤੇ ਮਕਾਨ ਸਭ ਤੋਂ ਜ਼ਿਆਦਾ ਸਮੱਸਿਆਵਾਂ ਪੈਦਾ ਕਰ ਰਹੇ ਹਨ। ਸਰਵੇਖਣ ਵਿਚ ਸ਼ਾਮਲ 60 ਫ਼ੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਗਰੋਸਰੀ ਸਟੋਰ ‘ਤੇ ਰਿਆਇਤਾਂ ਦੀ ਭਾਲ ‘ਚ ਰਹਿੰਦੇ ਹਨ ਅਤੇ ਕੂਪਨ ਵਰਤੇ ਰਹੇ ਹਨ। ਉੱਥੇ ਹੀ 17 ਫ਼ੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਸਸਤੀ ਰਿਹਾਇਸ਼ ਵਾਸਤੇ ਕਿਸੇ ਹੋਰ ਸ਼ਹਿਰ ਵੱਲ ਜਾਣ ਦਾ ਵਿਚਾਰ ਕਰ ਰਹੇ ਹਨ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
