ਟੋਰਾਂਟੋ: ਕੈਨੇਡਾ ਦੀਆਂ ਹਥਿਆਰਬੰਦ ਫੌਜਾਂ ਨੇ ਇਕ ਵੱਡਾ ਫੈਸਲਾ ਲੈਂਦਿਆਂ ਪਰਮਾਨੈਂਟ ਰੈਜ਼ੀਡੈਂਟਸ ਨੂੰ ਭਰਤੀ ਕਰਨ ਦਾ ਐਲਾਨ ਕੀਤਾ ਹੈ ਅਤੇ ਭਾਰਤ ਤੋਂ ਨਵੇਂ ਆਉਣ ਵਾਲੇ ਪਰਵਾਸੀ ਫੌਜ ‘ਚ ਵੀ ਆਪਣਾ ਦਮ-ਖਮ ਦਿਖਾ ਸਕਣਗੇ। ਹੁਣ ਤੱਕ ਪਰਮਾਨੈਂਟ ਰੈਜ਼ੀਡੈਂਟਸ ਸਿਰਫ਼ ਸਕਿਲਡ ਮਿਲੀਟਰੀ ਫੌਰਨ ਐਪਲੀਕੈਂਟ ਐਂਟਰੀ ਪ੍ਰੋਗਰਾਮ ‘ਚ ਭਰਤੀ ਹੋਣ ਦੀ ਖੁੱਲ੍ਹ ਸੀ, ਜਿਸ ਤਹਿਤ ਡਾਕਟਰ ਜਾਂ ਸਿਖਲਾਈ ਪ੍ਰਾਪਤ ਪਾਇਲਟ ਹੀ ਆਉਂਦੇ ਸਨ।
ਲੋੜੀਂਦੀ ਭਰਤੀ ਨਾਂ ਹੋਣ ਦੀ ਸਮੱਸਿਆ ਨਾਲ ਜੂਝ ਰਹੀ ਫੌਜ ਦੇ ਇਸ ਫੈਸਲੇ ਦਾ ਪਰਵਾਸੀਆਂ ਵੱਲੋਂ ਜ਼ੋਰਦਾਰ ਸਵਾਗਤ ਕੀਤਾ ਗਿਆ ਹੈ। ਕੈਨੇਡੀਅਨ ਫੌਜ ਵੱਲੋਂ ਸਤੰਬਰ ‘ਚ ਜਾਰੀ ਇੱਕ ਬਿਆਨ ‘ਚ ਕਿਹਾ ਗਿਆ ਸੀ ਕਿ ਉਹ ਹਰ ਮਹੀਨੇ ਲੋੜੀਂਦੇ ਜਵਾਨਾਂ ਤੋਂ ਸਿਰਫ ਅੱਧੇ ਹੀ ਭਰਤੀ ਕਰਨ ‘ਚ ਸਫਲ ਹੋ ਰਹੀ ਹੈ। ਇਸ ਸਾਲ ਦੇ ਅਖੀਰ ਤੱਕ ਫੌਜ ‘ਚ 5,900 ਨਵੇਂ ਜਵਾਨ ਭਰਤੀ ਕਰਨ ਦਾ ਟੀਚਾ ਮਿੱਥਿਆ ਗਿਆ ਹੈ। ਕੈਨੇਡਾ ਦੇ ਰਾਇਲ ਮਿਲੀਟਰੀ ਕਾਲਜ ‘ਚ ਪ੍ਰੋਫੈਸਰ ਕ੍ਰਿਸ਼ਚਨ ਲੁਪੈਕਟ ਨੇ ਕਿਹਾ ਕਿ ਸਿਰਫ਼ ਕੈਨੇਡੀਅਨ ਨਾਗਰਿਕਾਂ ਨੂੰ ਭਰਤੀ ਕਰਨ ਦੀ ਰਵਾਇਤ ਖ਼ਤਮ ਕਰ ਦਿੱਤੀ ਗਈ ਹੈ। ਜਦਕਿ ਪਹਿਲਾਂ ਫੌਜ ਲਈ ਲੋੜੀਂਦੇ ਰੰਗਰੂਟ ਮਿਲ ਜਾਂਦੇ ਸਨ, ਪਰ ਮੌਜੂਦਾ ਹਾਲਾਤ ਪੂਰੀ ਤਰ੍ਹਾਂ ਬਦਲ ਚੁੱਕੇ ਹਨ। ਸੁਰੱਖਿਆ ਕਲੀਅਰੈਂਸ ਵਰਗੇ ਮਾਪਦੰਡਾਂ ਨੂੰ ਵੇਖਦਿਆਂ ਪਰਮਾਨੈਂਟ ਰੈਜ਼ੀਡੈਂਟਸ ਦੀ ਭਰਤੀ ਨਹੀਂ ਸੀ ਕੀਤੀ ਜਾਂਦੀ ਜਦਕਿ ਕਈ ਹੋਰ ਮੁਲਕਾਂ ‘ਚ ਇਹ ਰਵਾਇਤ ਪਹਿਲਾਂ ਹੀ ਸ਼ੁਰੂ ਹੋ ਚੁੱਕੀ ਹੈ। ਫਰਾਂਸ ਵਰਗੇ ਮੁਲਕ ‘ਚ ਫੌਜ ਵਿੱਚ ਭਰਤੀ ਹੋਣ ਵਾਲੇ ਪਰਵਾਸੀਆਂ ਦੀ ਨਾਗਰਿਕਤਾ ਪੱਕੀ ਹੋ ਜਾਂਦੀ ਹੈ ਜਿਸ ਨੂੰ ਵੇਖਦਿਆਂ ਵੱਡੀ ਗਿਣਤੀ ‘ਚ ਪਰਵਾਸੀ ਇਸ ਪਾਸੇ ਆਉਣਾ ਚਾਹੁੰਦੇ ਹਨ।
ਕੈਨੇਡਾ ‘ਚ ਪੀ.ਆਰ. ਤੋਂ ਬਾਅਦ ਸਿਟੀਜ਼ਨਸ਼ਿਪ ਲੈਣ ਦੀ ਪ੍ਰਕਿਰਿਆ ਪਹਿਲਾਂ ਹੀ ਬਹੁਤ ਸੁਖਾਲੀ ਹੈ ਅਤੇ ਅਜਿਹੇ ‘ਚ ਦੇਖਣਾ ਹੋਵੇਗਾ ਕਿ ਫੌਜ ਵੱਲੋਂ ਕੋਈ ਖਾਸ ਪੇਸ਼ਕਸ਼ ਕੀਤੀ ਜਾਂਦੀ ਹੈ ਜਾਂ ਨਹੀਂ। ਕੈਨੇਡੀਅਨ ਹਥਿਆਰਬੰਦ ਫੌਜਾਂ ਦਾ ਇਹ ਕਦਮ ਆਰ.ਸੀ.ਐਮ.ਪੀ. ਦੇ ਉਸ ਐਲਾਨ ਤੋਂ ਪੰਜ ਸਾਲ ਬਾਅਦ ਆਇਆ ਹੈ ਜਿਸ ਤਹਿਤ 10 ਸਾਲ ਤੋਂ ਕੈਨੇਡਾ ਵਿਚ ਰਹਿ ਰਹੇ ਪਰਮਾਨੈਂਟ ਰੈਜ਼ੀਡੈਂਟਸ ਨੂੰ ਫੈਡਰਲ ਪੁਲਿਸ ‘ਚ ਸ਼ਾਮਲ ਹੋਣ ਦੀ ਇਜਾਜ਼ਤ ਦਿੱਤੀ ਗਈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
