ਟੋਰਾਂਟੋ: ਐਕਸਪ੍ਰੈਸ ਐਂਟਰੀ ਦੇ ਤਾਜ਼ਾ ਡਰਾਅ ਤਹਿਤ 4,250 ਪਰਵਾਸੀਆਂ ਨੂੰ ਕੈਨੇਡਾ ਦੀ ਪੀ.ਆਰ. ਲਈ ਸੱਦਾ ਭੇਜਿਆ ਗਿਆ ਹੈ ਅਤੇ 6 ਜੁਲਾਈ ਤੋਂ ਬਾਅਦ ਹਰ ਡਰਾਅ ‘ਚ ਉਮੀਦਵਾਰਾਂ ਦੀ ਗਿਣਤੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਬੁੱਧਵਾਰ ਨੂੰ ਕੱਢੇ ਗਏ ਡਰਾਅ ਦੌਰਾਨ CRS ਸਕੋਰ 500 ਦਰਜ ਕੀਤਾ ਗਿਆ ਜੋ ਪਿਛਲੇ ਮਹੀਨੇ ਦੇ ਅਖੀਰ ‘ਚ ਕੱਢੇ ਗਏ ਡਰਾਅ ਦੌਰਾਨ 504 ਰਿਹਾ ਸੀ।
ਇਮੀਗ੍ਰੇਸ਼ਨ ਵਿਭਾਗ ਵੱਲੋਂ 1 ਨਵੰਬਰ ਨੂੰ 2023 ਤੋਂ 2025 ਦੇ ਇੰਮੀਗੇਸ਼ਨ ਟੀਚਿਆਂ ਦਾ ਐਲਾਨ ਕੀਤਾ ਜਾਣਾ ਹੈ ਅਤੇ ਮੰਨਿਆ ਜਾ ਰਿਹਾ ਹੈ ਕਿ ਹਰ ਸਾਲ ਸੱਦੇ ਜਾਣ ਵਾਲੇ ਪਰਵਾਸੀਆਂ ਦੀ ਗਿਣਤੀ 5 ਲੱਖ ਤੋਂ ਪਾਰ ਹੋ ਸਕਦੀ ਹੈ। ਐਕਸਪ੍ਰੈਸ ਐਂਟਰੀ ਦੇ ਲਗਾਤਾਰ ਚੌਥੇ ਡਰਾਅ ਦੌਰਾਨ 500 ਉਮੀਦਵਾਰਾਂ ਦਾ ਵਾਧਾ ਹੋਇਆ ਹੈ। ਇਸ ਤੋਂ ਪਹਿਲਾਂ 29 ਸਤੰਬਰ ਦੇ ਡਰਾਅ ‘ਚ 3,750 ਪਰਵਾਸੀਆਂ ਨੂੰ ਪੀ.ਆਰ. ਦਾ ਸੱਦਾ ਦਿੱਤਾ ਗਿਆ ਸੀ, ਜਦਕਿ 14 ਸਤੰਬਰ ਦੇ ਡਰਾਅ ਦੌਰਾਨ 3,250 ਉਮੀਦਵਾਰਾਂ ਨੂੰ ਪੀ.ਆਰ. ਲਈ ਸੱਦਾ ਭੇਜਿਆ ਗਿਆ। ਇਸੇ ਤਰ੍ਹਾਂ 31 ਅਗਸਤ ਦੇ ਡਰਾਅ ਵਿਚ 2,750 ਉਮੀਦਵਾਰ ਸੱਦੇ ਗਏ ਸਨ।
ਵਿਆਪਕ ਦਰਜਾਬੰਦੀ ਪ੍ਰਣਾਲੀ ਦੇ ਅੰਕ 6 ਜੁਲਾਈ ਤੋਂ ਬਾਅਦ ਲਗਾਤਾਰ ਘਟਦੇ ਆ ਰਹੇ ਹਨ ਜਦੋਂ 557 CRS ਵਾਲਿਆਂ ਨੂੰ ਪੀ.ਆਰ. ਲਈ ਸੱਦਿਆ ਗਿਆ ਪਰ ਇਸ ਵਾਰ 504 ਅੰਕਾਂ ਵਾਲੇ ਯੋਗ ਮੰਨੇ ਗਏ। ਇੱਥੇ ਦੱਸਣਯੋਗ ਹੈ ਕਿ ਕੋਰੋਨਾ ਮਹਾਂਮਾਰੀ ਕਾਰਨ ਐਕਸਪ੍ਰੈਸ ਐਂਟਰੀ ਡਰਾਅ 18 ਮਹੀਨੇ ਤੋਂ ਵੱਧ ਸਮਾਂ ਬੰਦ ਰਹੇ। ਇਸ ਸਾਲ ਜੁਲਾਈ ਦੇ ਅਖੀਰ ਤੱਕ ਐਕਸਪ੍ਰੈਸ ਐਂਟਰੀ ਦੀ ਕਤਾਰ ‘ਚ 51,616 ਉਮੀਦਵਾਰ ਸਨ ਜੋ ਅਗਸਤ ਦੇ ਅੰਤ ਤੱਕ ਘਟ ਕੇ 40 ਹਜ਼ਾਰ ਰਹਿ ਗਏ। ਪਿਛਲੇ 7 ਡਰਾਅ ਦੌਰਾਨ ਲਗਭਗ 14 ਹਜ਼ਾਰ ਉਮੀਦਵਾਰਾਂ ਨੂੰ ਪੀ.ਆਰ. ਦਾ ਸੱਦਾ ਦਿੱਤਾ ਗਿਆ ਹੈ ਅਤੇ 40 ਹਜ਼ਾਰ ਦੇ ਅੰਕੜੇ ‘ਚ ਅੱਧੇ ਪੋਵਿੰਸ਼ੀਅਲ ਨੌਮਿਨੀ ਪ੍ਰੋਗਰਾਮ ਨਾਲ ਸਬੰਧਤ ਦੱਸੇ ਜਾ ਰਹੇ ਹਨ। ਮੌਜੂਦਾ ਵਰ੍ਹੇ ਦੌਰਾਨ ਇਮੀਗ੍ਰੇਸ਼ਨ ਵਿਭਾਗ ਐਕਸਪ੍ਰੈਸ ਐਂਟਰੀ ਤਹਿਤ 28 ਹਜ਼ਾਰ ਉਮੀਦਵਾਰਾਂ ਨੂੰ ਪੀ.ਆਰ. ਦੇ ਸੱਦੇ ਭੇਜ ਚੁੱਕਾ ਹੈ ਅਤੇ 4 ਲੱਖ 32 ਹਜ਼ਾਰ ਪਰਵਾਸੀਆਂ ਨੂੰ ਸੱਦਣ ਦਾ ਟੀਚਾ ਆਸਾਨੀ ਨਾਲ ਪੂਰਾ ਹੁੰਦਾ ਨਜ਼ਰ ਆ ਰਿਹਾ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
