ਨਿਊਜ਼ ਡੈਸਕ: ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦੀ ਸਿਹਤ ਨੂੰ ਲੈ ਕੇ ਇੱਕ ਵੱਡਾ ਦਾਅਵਾ ਸਾਹਮਣੇ ਆਇਆ ਹੈ। ਚੀਨੀ ਡੈਮੋਕ੍ਰੇਸੀ ਪਾਰਟੀ (CDP) ਦੇ ਚੇਅਰਮੈਨ ਜੀ ਵਾਨਜੁਨ ਨੇ ਦਾਅਵਾ ਕੀਤਾ ਹੈ ਕਿ ਭਾਰਤ ਵਿੱਚ ਹੋਏ BRICS Summit ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਚੀਨ ਪਰਤੇ ਸ਼ੀ ਜਿਨਪਿੰਗ ਨੂੰ ਬੀਜਿੰਗ ਏਅਰਪੋਰਟ ਤੋਂ ਸਿੱਧਾ ਮਿਲਟਰੀ ਹੈਲੀਕਾਪਟਰ ਰਾਹੀਂ ਬੀਜਿੰਗ ਦੇ 301 ਹਸਪਤਾਲ ਲਿਜਾਇਆ ਗਿਆ। ਵਾਨਜੁਨ ਮੁਤਾਬਕ, ਉੱਥੇ ਜਿਨਪਿੰਗ ਨੂੰ ਐਮਰਜੈਂਸੀ ਇਲਾਜ ਦਿੱਤਾ ਗਿਆ।
ਬੀਜਿੰਗ ਏਅਰਪੋਰਟ ’ਤੇ ਨਹੀਂ ਹੋਇਆ ਆਮ ਸਵਾਗਤ
ਜੀ ਵਾਨਜੁਨ ਨੇ ਕਥਿਤ ਤੌਰ ’ਤੇ ਕੁਝ ਚਸ਼ਮਦੀਦਾਂ ਦੇ ਹਵਾਲੇ ਨਾਲ ਦਾਅਵਾ ਕੀਤਾ ਹੈ ਕਿ ਜਿਨਪਿੰਗ ਦੇ ਚੀਨ ਪਰਤਣ ਸਮੇਂ ਬੀਜਿੰਗ ਏਅਰਪੋਰਟ ’ਤੇ ਆਮ ਤੌਰ ’ਤੇ ਦਿਖਾਈ ਦੇਣ ਵਾਲਾ ਅਧਿਕਾਰਤ ਸਵਾਗਤ ਨਹੀਂ ਹੋਇਆ। ਉਨ੍ਹਾਂ ਮੁਤਾਬਕ, ਏਅਰਪੋਰਟ ’ਤੇ ਨਾ ਤਾਂ ਵੱਡੀ ਗਿਣਤੀ ਵਿੱਚ ਅਧਿਕਾਰੀ ਮੌਜੂਦ ਸਨ ਅਤੇ ਨਾ ਹੀ ਕੋਈ ਰਸਮੀ ਸਵਾਗਤ ਸਮਾਰੋਹ ਹੋਇਆ।
ਵਾਨਜੁਨ ਦਾ ਦਾਅਵਾ ਹੈ ਕਿ ਏਅਰਪੋਰਟ ਤੋਂ ਜਿਨਪਿੰਗ ਨੂੰ ਸਿੱਧਾ ਹਸਪਤਾਲ ਲਿਜਾਇਆ ਗਿਆ।
BRICS ਦੌਰਾਨ ਵੀ ਤਬੀਅਤ ਖ਼ਰਾਬ ਹੋਣ ਦਾ ਦਾਅਵਾ
ਜੀ ਵਾਨਜੁਨ ਨੇ ਇਹ ਵੀ ਦਾਅਵਾ ਕੀਤਾ ਹੈ ਕਿ ਨਵੀਂ ਦਿੱਲੀ ਵਿੱਚ BRICS Summit ਦੌਰਾਨ ਸ਼ੀ ਜਿਨਪਿੰਗ ਦੀ ਤਬੀਅਤ ਅਚਾਨਕ ਖ਼ਰਾਬ ਹੋ ਗਈ ਸੀ। ਉਨ੍ਹਾਂ ਮੁਤਾਬਕ, ਜਿਨਪਿੰਗ ਦੇ ਨਾਲ ਮੌਜੂਦ ਮੈਡੀਕਲ ਟੀਮ ਨੇ ਉਸ ਸਮੇਂ ਉਨ੍ਹਾਂ ਨੂੰ ਸੰਭਾਲਿਆ।
ਵਾਨਜੁਨ ਨੇ ਇਹ ਵੀ ਦਾਅਵਾ ਕੀਤਾ ਕਿ ਇਸੇ ਕਾਰਨ ਜਿਨਪਿੰਗ ਨੇ ਆਪਣੀ ਭਾਰਤ ਯਾਤਰਾ ਕਥਿਤ ਤੌਰ ’ਤੇ ਤੈਅ ਪ੍ਰੋਗਰਾਮ ਤੋਂ ਪਹਿਲਾਂ ਹੀ ਖ਼ਤਮ ਕਰ ਦਿੱਤੀ ਸੀ।
ਦਾਅਵਿਆਂ ਦੀ ਨਹੀਂ ਹੋਈ ਸੁਤੰਤਰ ਪੁਸ਼ਟੀ
ਹਾਲਾਂਕਿ, ਇਨ੍ਹਾਂ ਦਾਅਵਿਆਂ ਦੀ ਅਜੇ ਤੱਕ ਕੋਈ ਸੁਤੰਤਰ ਪੁਸ਼ਟੀ ਨਹੀਂ ਹੋਈ ਹੈ। ਸ਼ੀ ਜਿਨਪਿੰਗ ਦੇ 301 ਹਸਪਤਾਲ ਵਿੱਚ ਦਾਖ਼ਲ ਹੋਣ, ਉਨ੍ਹਾਂ ਨੂੰ ਐਮਰਜੈਂਸੀ ਇਲਾਜ ਮਿਲਣ ਜਾਂ ਮਿਲਟਰੀ ਹੈਲੀਕਾਪਟਰ ਰਾਹੀਂ ਹਸਪਤਾਲ ਲਿਜਾਏ ਜਾਣ ਦੀ ਪੁਸ਼ਟੀ ਚੀਨੀ ਸਰਕਾਰ, 301 ਹਸਪਤਾਲ ਜਾਂ ਕਿਸੇ ਭਰੋਸੇਯੋਗ ਸੁਤੰਤਰ ਸਰੋਤ ਵੱਲੋਂ ਨਹੀਂ ਕੀਤੀ ਗਈ।
ਇਸ ਲਈ ਫਿਲਹਾਲ ਇਹ ਜਾਣਕਾਰੀ ਸਿਰਫ਼ ਜੀ ਵਾਨਜੁਨ ਵੱਲੋਂ ਕੀਤੇ ਗਏ ਦਾਅਵੇ ਵਜੋਂ ਹੀ ਸਾਹਮਣੇ ਆ ਰਹੀ ਹੈ।
PM ਮੋਦੀ ਦੇ ਗਾਲਾ ਡਿਨਰ ਵਿੱਚ ਸ਼ਾਮਲ ਨਹੀਂ ਹੋਏ ਸਨ ਜਿਨਪਿੰਗ
BRICS Summit ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਸ਼ੀ ਜਿਨਪਿੰਗ ਵਿਚਾਲੇ ਦੁਵੱਲੀ ਮੁਲਾਕਾਤ ਵੀ ਹੋਈ ਸੀ। ਹਾਲਾਂਕਿ, ਪ੍ਰਧਾਨ ਮੰਤਰੀ ਮੋਦੀ ਵੱਲੋਂ ਕਰਵਾਏ ਗਏ ਗਾਲਾ ਡਿਨਰ ਵਿੱਚ ਜਿਨਪਿੰਗ ਸ਼ਾਮਲ ਨਹੀਂ ਹੋਏ ਸਨ। ਉਨ੍ਹਾਂ ਦੀ ਡਿਨਰ ਵਿੱਚ ਗੈਰਹਾਜ਼ਰੀ ਦਾ ਅਧਿਕਾਰਤ ਕਾਰਨ ਜਨਤਕ ਨਹੀਂ ਕੀਤਾ ਗਿਆ ਸੀ।
ਸ਼ੀ ਜਿਨਪਿੰਗ ਕਰੀਬ 7 ਸਾਲ ਬਾਅਦ BRICS Summit ਵਿੱਚ ਸ਼ਾਮਲ ਹੋਣ ਲਈ ਭਾਰਤ ਆਏ ਸਨ। ਇਸ ਤੋਂ ਪਹਿਲਾਂ ਉਹ ਅਕਤੂਬਰ 2019 ਵਿੱਚ ਤਾਮਿਲਨਾਡੂ ਦੇ ਮਹਾਬਲੀਪੁਰਮ ਵਿੱਚ ਹੋਏ ਗੈਰ-ਰਸਮੀ ਸ਼ਿਖਰ ਸੰਮੇਲਨ ਲਈ ਭਾਰਤ ਆਏ ਸਨ।
