ਵਾਸ਼ਿੰਗਟਨ: ਅਮਰੀਕਾ ਦੀ 250ਵੀਂ ਵਰ੍ਹੇਗੰਢ ਨੂੰ ਯਾਦਗਾਰ ਬਣਾਉਣ ਲਈ ਤਿਆਰ ਕੀਤਾ ਗਿਆ ਖਾਸ 1 ਡਾਲਰ ਦਾ ਸਿੱਕਾ ਹੁਣ ਵਿਕਰੀ ਲਈ ਉਪਲਬਧ ਹੋ ਗਿਆ ਹੈ। ਇਸ ਸਿੱਕੇ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ’ਤੇ ਬਣੀ ਰਾਸ਼ਟਰਪਤੀ ਡੋਨਲਡ ਟਰੰਪ ਦੀ ਤਸਵੀਰ ਹੈ। ਸਿੱਕੇ ਨੂੰ ਗੋਲਡ ਫਿਨਿਸ਼ ਦਿੱਤੀ ਗਈ ਹੈ ਅਤੇ ਇਸਨੂੰ ਅਮਰੀਕੀ ਟਕਸਾਲ ‘ਯੂਐਸ ਮਿੰਟ’ ਵੱਲੋਂ ਜਾਰੀ ਕੀਤਾ ਗਿਆ ਹੈ। ਹਾਲਾਂਕਿ, ਕਿਸੇ ਜੀਵਤ ਰਾਸ਼ਟਰਪਤੀ ਦੀ ਤਸਵੀਰ ਸਿੱਕੇ ’ਤੇ ਹੋਣ ਕਾਰਨ ਇਸ ਨੂੰ ਲੈ ਕੇ ਸਿਆਸੀ ਅਤੇ ਕਾਨੂੰਨੀ ਚਰਚਾ ਵੀ ਸ਼ੁਰੂ ਹੋ ਗਈ ਹੈ।
ਇੱਕ ਪਾਸੇ ਟਰੰਪ, ਦੂਜੇ ਪਾਸੇ ਅਮਰੀਕਾ ਦੀ ਮੁਹਰ
ਸਿੱਕੇ ਦੇ ਇੱਕ ਪਾਸੇ ਡੋਨਲਡ ਟਰੰਪ ਦਾ ਚਿਹਰਾ ਬਣਾਇਆ ਗਿਆ ਹੈ, ਜਿਸਨੂੰ ‘ਹੈੱਡਸ’ ਕਿਹਾ ਜਾਂਦਾ ਹੈ। ਦੂਜੇ ਪਾਸੇ ਅਮਰੀਕਾ ਦੀ ਅਧਿਕਾਰਤ ਕੌਮੀ ਮੁਹਰ ‘ਗ੍ਰੇਟ ਸੀਲ’ ਹੈ, ਜਿਸਨੂੰ ‘ਟੇਲਜ਼’ ਵਾਲੇ ਪਾਸੇ ਰੱਖਿਆ ਗਿਆ ਹੈ।
ਇਸ ਡਿਜ਼ਾਈਨ ਨੂੰ ਇਸੇ ਸਾਲ ਯੂਐਸ ਕਮਿਸ਼ਨ ਆਫ ਫਾਈਨ ਆਰਟਸ ਵੱਲੋਂ ਮਨਜ਼ੂਰੀ ਦਿੱਤੀ ਗਈ ਸੀ। ਇਸ ਕਮਿਸ਼ਨ ਦੇ ਮੈਂਬਰਾਂ ਦੀ ਨਿਯੁਕਤੀ ਟਰੰਪ ਵੱਲੋਂ ਕੀਤੀ ਗਈ ਸੀ। ਟਰੰਪ ਪਹਿਲਾਂ ਕਹਿ ਚੁੱਕੇ ਹਨ ਕਿ ਸਿੱਕੇ ’ਤੇ ਆਪਣਾ ਚਿਹਰਾ ਹੋਣਾ ਇੱਕ ‘ਬਹੁਤ ਅਸਾਧਾਰਨ’ ਵਿਚਾਰ ਹੈ, ਪਰ ਉਨ੍ਹਾਂ ਨੇ ਇਸ ਨੂੰ ਆਪਣੇ ਲਈ ਸਨਮਾਨ ਵਾਲੀ ਗੱਲ ਵੀ ਦੱਸਿਆ ਸੀ।
ਟਰੰਪ ਦੀ ਤਸਵੀਰ ਨੂੰ ਲੈ ਕੇ ਕਿਉਂ ਉੱਠੇ ਸਵਾਲ?
ਟਰੰਪ ਦੇ ਦੂਜੇ ਕਾਰਜਕਾਲ ਦੌਰਾਨ ਵੱਖ-ਵੱਖ ਥਾਵਾਂ ’ਤੇ ਉਨ੍ਹਾਂ ਦੇ ਨਾਮ ਅਤੇ ਪਛਾਣ ਨੂੰ ਪ੍ਰਮੁੱਖਤਾ ਦੇਣ ਦੀਆਂ ਕੋਸ਼ਿਸ਼ਾਂ ਹੋਈਆਂ ਹਨ। ਇਨ੍ਹਾਂ ਵਿੱਚੋਂ ਕੁਝ ਮਾਮਲੇ ਕਾਨੂੰਨੀ ਵਿਵਾਦਾਂ ਅਤੇ ਮੁਕੱਦਮਿਆਂ ਤੱਕ ਵੀ ਪਹੁੰਚੇ ਹਨ। ਕੇਨੇਡੀ ਸੈਂਟਰ ਅਤੇ ਯੂਐਸ ਇੰਸਟੀਚਿਊਟ ਆਫ ਪੀਸ ’ਤੇ ਟਰੰਪ ਦਾ ਨਾਮ ਲਗਾਉਣ ਦੀਆਂ ਕੋਸ਼ਿਸ਼ਾਂ ਵੀ ਇਸ ਵਿੱਚ ਸ਼ਾਮਲ ਹਨ।
ਜੀਵਤ ਰਾਸ਼ਟਰਪਤੀ ਦੀ ਤਸਵੀਰ ਵਾਲੇ ਸਿੱਕੇ ’ਤੇ ਕਾਨੂੰਨ ਕੀ ਕਹਿੰਦਾ?
ਇਸ ਸਿੱਕੇ ਨੂੰ ਲੈ ਕੇ ਇਤਰਾਜ਼ ਕਰਨ ਵਾਲਿਆਂ ਦੀ ਮੁੱਖ ਦਲੀਲ ਅਮਰੀਕੀ ਸੰਘੀ ਕਾਨੂੰਨ ਨਾਲ ਜੁੜੀ ਹੈ। ਆਮ ਤੌਰ ’ਤੇ ਅਮਰੀਕੀ ਮੁਦਰਾ ’ਤੇ ਕਿਸੇ ਜੀਵਤ ਰਾਸ਼ਟਰਪਤੀ ਦੀ ਤਸਵੀਰ ਲਗਾਉਣ ’ਤੇ ਪਾਬੰਦੀ ਹੈ। ਹਾਲਾਂਕਿ, ਕੁਝ ਖਾਸ ਹਾਲਾਤਾਂ ਵਿੱਚ ਅਮਰੀਕੀ ਟ੍ਰੇਜ਼ਰੀ ਸੈਕਰੇਟਰੀ ਨੂੰ ਵਿਸ਼ੇਸ਼ ਸਿੱਕੇ ਜਾਰੀ ਕਰਨ ਅਤੇ ਉਨ੍ਹਾਂ ਦੀ ਢਲਾਈ ਦੀ ਮਨਜ਼ੂਰੀ ਦੇਣ ਦਾ ਅਧਿਕਾਰ ਹੁੰਦਾ ਹੈ। ਇਸੇ ਕਾਰਨ ਕਾਨੂੰਨੀ ਸਵਾਲਾਂ ਦੇ ਬਾਵਜੂਦ ਇਹ ਸਿੱਕਾ ਸਮਾਰਕ ਸਿੱਕੇ ਵਜੋਂ ਜਾਰੀ ਕੀਤਾ ਗਿਆ ਹੈ।
ਸਿੱਕੇ ’ਤੇ ਕੀ ਲਿਖਿਆ ਹੈ?
ਯੂਐਸ ਮਿੰਟ ਮੁਤਾਬਕ ਇਹ ਸਿੱਕਾ ਅਮਰੀਕਾ ਦੀ 250 ਸਾਲ ਪੁਰਾਣੀ ਵਿਰਾਸਤ ਨੂੰ ਸਨਮਾਨ ਦੇਣ ਲਈ ਤਿਆਰ ਕੀਤਾ ਗਿਆ ਹੈ। ਟਰੰਪ ਦੇ ਚਿਹਰੇ ਦੇ ਉੱਪਰ ਗੋਲਾਈ ਵਿੱਚ ‘LIBERTY’ ਲਿਖਿਆ ਹੈ, ਜਦਕਿ ਹੇਠਾਂ ‘1776–2026’ ਦਰਜ ਹੈ।
ਦੂਜੇ ਪਾਸੇ ਅਮਰੀਕਾ ਦੀ ‘ਗ੍ਰੇਟ ਸੀਲ’ ਹੈ, ਜਿਸ ਵਿੱਚ ਇੱਕ ਬਾਲਡ ਈਗਲ ਬਣਿਆ ਹੈ। ਬਾਜ਼ ਦੇ ਇੱਕ ਪੰਜੇ ਵਿੱਚ ਤੀਰ ਅਤੇ ਦੂਜੇ ਵਿੱਚ ਜੈਤੂਨ ਦੀ ਟਾਹਣੀ ਹੈ। ਉਸਦੀ ਚੁੰਝ ਵਿੱਚ ਰਿਬਨ ਹੈ, ਜਿਸ ’ਤੇ ਲਾਤੀਨੀ ਸ਼ਬਦ ‘E PLURIBUS UNUM’ ਲਿਖੇ ਹਨ, ਜਿਸਦਾ ਅਰਥ ਹੈ ‘ਅਨੇਕਾਂ ਵਿੱਚੋਂ ਇੱਕ’।
25 ਸਿੱਕਿਆਂ ਦਾ ਰੋਲ 61 ਡਾਲਰ
ਯੂਐਸ ਮਿੰਟ ਮੁਤਾਬਕ 25 ਸਿੱਕਿਆਂ ਦੇ ਇੱਕ ਰੋਲ ਦੀ ਕੀਮਤ 61 ਡਾਲਰ ਰੱਖੀ ਗਈ ਹੈ। ਉੱਥੇ ਹੀ 100 ਸਿੱਕਿਆਂ ਵਾਲੇ ਬੈਗ ਦੀ ਕੀਮਤ 154.50 ਡਾਲਰ ਹੈ।
ਖਾਸ ਗੱਲ ਇਹ ਹੈ ਕਿ ਕੁਝ ਵਿਸ਼ੇਸ਼ ਸਿੱਕੇ ਇਨ੍ਹਾਂ ਰੋਲ ਅਤੇ ਬੈਗ ਵਿੱਚ ਬੇਤਰਤੀਬ ਤਰੀਕੇ ਨਾਲ ਰੱਖੇ ਗਏ ਹਨ। ਇਨ੍ਹਾਂ ’ਤੇ ‘ਜੁਲਾਈ 4’ ਲਿਖਿਆ ਹੋਵੇਗਾ। ਇਹ ਸਿੱਕੇ 4 ਜੁਲਾਈ ਨੂੰ ਢਾਲੇ ਗਏ ਸਨ, ਜੋ ਅਮਰੀਕਾ ਦੀ ਆਜ਼ਾਦੀ ਦੀ ਘੋਸ਼ਣਾ ਦੀ ਵਰ੍ਹੇਗੰਢ ਹੈ। ਇਹ ਸਿੱਕੇ ਕਾਨੂੰਨੀ ਮੁਦਰਾ ਹਨ ਅਤੇ ਭੁਗਤਾਨ ਲਈ ਵੀ ਵਰਤੇ ਜਾ ਸਕਦੇ ਹਨ।
