ਵਾਸ਼ਿੰਗਟਨ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਭਾਸ਼ਣਾਂ ਵਿੱਚ ਪਹਿਲਾਂ ਕੀ ਕਿਹਾ ਜਾਣਾ ਹੈ, ਇਸ ਬਾਰੇ ਮਿਲੀ ਅੰਦਰੂਨੀ ਜਾਣਕਾਰੀ ਦੀ ਵਰਤੋਂ ਕਰਕੇ ਟ੍ਰੇਡਿੰਗ ਕਰਨ ਵਾਲੇ ਵ੍ਹਾਈਟ ਹਾਊਸ ਦੇ ਸਾਬਕਾ ਟੈਲੀਪ੍ਰੌਮਪਟਰ ਆਪਰੇਟਰ ਗੈਬਰਿਅਲ ਪੇਰੇਜ਼ ਖ਼ਿਲਾਫ਼ ਵੱਡੀ ਕਾਰਵਾਈ ਹੋਈ ਹੈ। ਅਮਰੀਕੀ ਕਮੋਡਿਟੀ ਫਿਊਚਰਜ਼ ਟ੍ਰੇਡਿੰਗ ਕਮਿਸ਼ਨ (CFTC) ਮੁਤਾਬਕ, ਪੇਰੇਜ਼ ਨੇ ਗੁਪਤ ਜਾਣਕਾਰੀ ਦੇ ਆਧਾਰ ’ਤੇ ਮੁਨਾਫਾ ਕਮਾਇਆ ਸੀ।
ਦਸੰਬਰ 2025 ਤੋਂ ਫਰਵਰੀ 2026 ਦਰਮਿਆਨ ਪੇਰੇਜ਼ ਨੇ ਟਰੰਪ ਦੇ ਭਾਸ਼ਣਾਂ ਨਾਲ ਜੁੜੀ ਜਾਣਕਾਰੀ ਦੇ ਆਧਾਰ ’ਤੇ ‘ਕਾਲਸ਼ੀ’ ਨਾਮ ਦੇ ਪ੍ਰਿਡਿਕਸ਼ਨ ਮਾਰਕੀਟ ਪਲੇਟਫਾਰਮ ’ਤੇ ਟ੍ਰੇਡਿੰਗ ਕੀਤੀ। CFTC ਨੇ ਹੁਕਮ ਦਿੱਤਾ ਹੈ ਕਿ ਉਨ੍ਹਾਂ ਨੂੰ ਕਮਾਇਆ ਗਿਆ 1,07,539.02 ਡਾਲਰ ਦਾ ਮੁਨਾਫਾ ਵਾਪਸ ਕਰਨਾ ਪਵੇਗਾ। ਇਸ ਤੋਂ ਇਲਾਵਾ 65,000 ਡਾਲਰ ਦਾ ਜੁਰਮਾਨਾ ਵੀ ਲਗਾਇਆ ਗਿਆ ਹੈ।
ਤਿੰਨ ਸਾਲ ਟ੍ਰੇਡਿੰਗ ’ਤੇ ਪਾਬੰਦੀ
ਨਿਯਮਕ ਸੰਸਥਾ ਨੇ ਕਿਹਾ ਕਿ ਪੇਰੇਜ਼ ਨੇ ਭਾਸ਼ਣਾਂ ਬਾਰੇ ਪਹਿਲਾਂ ਤੋਂ ਮਿਲੀ ਜਾਣਕਾਰੀ ਦੀ ਵਰਤੋਂ ਕਰਕੇ ਦਾਅ ਲਗਾਏ, ਜੋ ਉਨ੍ਹਾਂ ਦੀ ਗੁਪਤਤਾ ਅਤੇ ਭਰੋਸੇ ਨਾਲ ਜੁੜੀਆਂ ਜ਼ਿੰਮੇਵਾਰੀਆਂ ਦੀ ਉਲੰਘਣਾ ਸੀ।
ਹਾਲਾਂਕਿ ਜਾਂਚ ਦੌਰਾਨ ਪੇਰੇਜ਼ ਵੱਲੋਂ ਕੀਤੇ ਗਏ ਸਹਿਯੋਗ ਨੂੰ ਦੇਖਦਿਆਂ ਨਾਗਰਿਕ ਜੁਰਮਾਨੇ ਦੀ ਰਕਮ ਘਟਾਈ ਗਈ। CFTC ਨੇ ਉਨ੍ਹਾਂ ਦੇ ਸਹਿਯੋਗ ਨੂੰ ਸ਼ਾਨਦਾਰ ਦੱਸਿਆ। ਇਸ ਦੇ ਨਾਲ ਹੀ ਪੇਰੇਜ਼ ਨੂੰ ਤਿੰਨ ਸਾਲ ਤੱਕ ਟ੍ਰੇਡਿੰਗ ਕਰਨ ਤੋਂ ਵੀ ਰੋਕ ਦਿੱਤਾ ਗਿਆ ਹੈ।
ਮਾਮਲਾ ਉਸ ਵੇਲੇ ਸਾਹਮਣੇ ਆਇਆ ਜਦੋਂ ਕਾਲਸ਼ੀ ਦੇ ਵਿਸ਼ਲੇਸ਼ਕਾਂ ਨੇ ‘ਮੈਂਸ਼ਨ ਮਾਰਕੀਟਸ’ ਵਿੱਚ ਅਸਧਾਰਨ ਗਤੀਵਿਧੀ ਦੇਖੀ। ਇਨ੍ਹਾਂ ਮਾਰਕੀਟਾਂ ਵਿੱਚ ਲੋਕ ਇਹ ਅਨੁਮਾਨ ਲਗਾਉਂਦੇ ਹਨ ਕਿ ਕੋਈ ਆਗੂ ਆਪਣੇ ਭਾਸ਼ਣ ਵਿੱਚ ਕਿਸੇ ਖਾਸ ਸ਼ਬਦ, ਦੇਸ਼ ਦਾ ਨਾਮ ਜਾਂ ਚੋਣੀ ਨਾਅਰਾ ਬੋਲੇਗਾ ਜਾਂ ਨਹੀਂ।
ਕੰਪਨੀ ਨੇ ਅਕਾਊਂਟ ਨਾਲ ਜੁੜੇ ਡੇਟਾ ਦੀ ਮਦਦ ਨਾਲ ਸਬੰਧਤ ਵਿਅਕਤੀ ਦੀ ਪਛਾਣ ਕੀਤੀ। ਕਾਲਸ਼ੀ ਮੁਤਾਬਕ ਉਹ ਵਿਅਕਤੀ ਫੈਡਰਲ ਸਰਕਾਰ ਦਾ ਕਰਮਚਾਰੀ ਅਤੇ ਵ੍ਹਾਈਟ ਹਾਊਸ ਵਿੱਚ ਟੈਲੀਪ੍ਰੌਮਪਟਰ ਚਲਾਉਣ ਦੀ ਜ਼ਿੰਮੇਵਾਰੀ ਨਿਭਾਉਂਦਾ ਸੀ। ਇਸ ਤੋਂ ਬਾਅਦ ਕੰਪਨੀ ਨੇ ਮਾਮਲੇ ਦੀ ਜਾਣਕਾਰੀ CFTC ਨੂੰ ਦਿੱਤੀ।
ਕਰਮਚਾਰੀਆਂ ਨੂੰ ਵੀ ਦਿੱਤੀ ਗਈ ਸੀ ਚੇਤਾਵਨੀ
ਵ੍ਹਾਈਟ ਹਾਊਸ ਵੱਲੋਂ ਇਸ ਸਮਝੌਤੇ ’ਤੇ ਹਾਲੇ ਕੋਈ ਟਿੱਪਣੀ ਨਹੀਂ ਕੀਤੀ ਗਈ। ਇਸ ਤੋਂ ਪਹਿਲਾਂ ਜੁਲਾਈ ਵਿੱਚ ਤਤਕਾਲੀ ਪ੍ਰੈੱਸ ਸਕੱਤਰ ਕੈਰੋਲਿਨ ਲੇਵਿਟ ਨੇ ਕਿਹਾ ਸੀ ਕਿ ਪੇਰੇਜ਼ ਨੂੰ ਬਿਨਾਂ ਤਨਖਾਹ ਛੁੱਟੀ ’ਤੇ ਭੇਜਿਆ ਗਿਆ ਹੈ ਅਤੇ ਉਹ ਆਪਣੀ ਪੁਰਾਣੀ ਜ਼ਿੰਮੇਵਾਰੀ ’ਤੇ ਵਾਪਸ ਨਹੀਂ ਆਉਣਗੇ।
ਇਸ ਦੌਰਾਨ ਵ੍ਹਾਈਟ ਹਾਊਸ ਮੈਨੇਜਮੈਂਟ ਦਫ਼ਤਰ ਨੇ ਜੁਲਾਈ ਵਿੱਚ ਕਰਮਚਾਰੀਆਂ ਅਤੇ ਸਹਿਯੋਗੀਆਂ ਨੂੰ ਪੱਤਰ ਭੇਜ ਕੇ ਪ੍ਰਿਡਿਕਸ਼ਨ ਮਾਰਕੀਟਸ ’ਤੇ ਕਿਸੇ ਵੀ ਤਰ੍ਹਾਂ ਦੇ ਦਾਅ ਲਗਾਉਣ ਤੋਂ ਬਚਣ ਦੀ ਹਦਾਇਤ ਵੀ ਕੀਤੀ ਸੀ।
