ਨਿਊਜ਼ ਡੈਸਕ: ਬੌਲੀਵੁੱਡ ਅਦਾਕਾਰਾ ਕ੍ਰਿਤੀ ਸੈਨਨ ਦੇ ਇੱਕ ਨਵੇਂ ਰੱਖੜੀ ਵਿਸ਼ੇਸ਼ ਜਿਊਲਰੀ ਇਸ਼ਤਿਹਾਰ ‘ਤੇ ਖੜ੍ਹੇ ਹੋਏ ਵਿਵਾਦ ਤੋਂ ਬਾਅਦ ਮੇਕਰਸ ਨੇ ਇਸ ਨੂੰ ਸਾਰੇ ਸੋਸ਼ਲ ਮੀਡੀਆ ਅਤੇ ਮੀਡੀਆ ਪਲੇਟਫਾਰਮਾਂ ਤੋਂ ਹਟਾ ਲਿਆ ਹੈ। ਇਸ ਇਸ਼ਤਿਹਾਰ ਵਿੱਚ ਕ੍ਰਿਤੀ ਸੈਨਨ ਕੇਪ ਅਤੇ ਡ੍ਰੇਪਡ ਸਕਰਟ ਦੇ ਨਾਲ ਬਰਾਲੇਟ-ਸਟਾਈਲ ਵਾਲੇ ਬਲਾਊਜ਼ ਵਿੱਚ ਰੱਖੜੀ ਦਾ ਤਿਉਹਾਰ ਮਨਾਉਂਦੀ ਹੋਈ ਨਜ਼ਰ ਆ ਰਹੀ ਸੀ। ਸੋਸ਼ਲ ਮੀਡੀਆ ਉਪਭੋਗਤਾਵਾਂ ਦੇ ਇੱਕ ਵਰਗ ਵੱਲੋਂ ਉਨ੍ਹਾਂ ਦੇ ਪਹਿਰਾਵੇ ਨੂੰ ਲੈ ਕੇ ਤਿੱਖੀ ਆਲੋਚਨਾ ਕੀਤੀ ਗਈ ਅਤੇ ਉਨ੍ਹਾਂ ਨੂੰ ਕਾਫ਼ੀ ਟ੍ਰੋਲ ਕੀਤਾ ਗਿਆ।
ਬ੍ਰਾਂਡ ਵੱਲੋਂ ਸਪੱਸ਼ਟੀਕਰਨ ਅਤੇ ਮੁਆਫ਼ੀਨੁਮਾ ਬਿਆਨ
ਵਧਦੇ ਵਿਵਾਦ ਨੂੰ ਦੇਖਦੇ ਹੋਏ ਜਿਊਲਰੀ ਬ੍ਰਾਂਡ ਨੇ ਬੁੱਧਵਾਰ ਨੂੰ ਆਪਣਾ ਇਸ਼ਤਿਹਾਰ ਵਾਪਸ ਲੈਂਦਿਆਂ ਅਧਿਕਾਰਤ ਬਿਆਨ ਜਾਰੀ ਕੀਤਾ। ਬ੍ਰਾਂਡ ਨੇ ਸਪੱਸ਼ਟ ਕੀਤਾ ਕਿ ਉਹ ਭਾਰਤੀ ਸੱਭਿਆਚਾਰ, ਪਰੰਪਰਾਵਾਂ ਅਤੇ ਤਿਉਹਾਰਾਂ ਦਾ ਪੂਰਾ ਸਤਿਕਾਰ ਕਰਦੇ ਹਨ। ਉਨ੍ਹਾਂ ਦਾ ਉਦੇਸ਼ ਪੂਰੇ ਪਰਿਵਾਰ ਅਤੇ ਪਾਲਤੂ ਜਾਨਵਰਾਂ ਨਾਲ ਮਿਲ ਕੇ ਖ਼ੁਸ਼ੀਆਂ ਸਾਂਝੀਆਂ ਕਰਨਾ ਸੀ। ਜੇਕਰ ਅਣਜਾਣੇ ਵਿੱਚ ਕਿਸੇ ਵਰਗ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚੀ ਹੈ ਤਾਂ ਅਜਿਹਾ ਉਨ੍ਹਾਂ ਦਾ ਕੋਈ ਮਕਸਦ ਨਹੀਂ ਸੀ, ਅਤੇ ਸਨਮਾਨ ਦੇ ਤੌਰ ‘ਤੇ ਉਨ੍ਹਾਂ ਨੇ ਇਹ ਇਸ਼ਤਿਹਾਰ ਸਾਰੇ ਪਲੇਟਫਾਰਮਾਂ ਤੋਂ ਹਟਾ ਦਿੱਤਾ ਹੈ।
ਕੰਗਨਾ ਰਣੌਤ ਨੇ ਕੱਪੜਿਆਂ ‘ਤੇ ਕੱਸਿਆ ਤੰਜ
ਇਸ ਵਿਵਾਦ ਦਰਮਿਆਨ ਅਦਾਕਾਰਾ ਅਤੇ ਭਾਜਪਾ ਸੰਸਦ ਮੈਂਬਰ ਕੰਗਨਾ ਰਣੌਤ ਨੇ ਕ੍ਰਿਤੀ ਸੈਨਨ ‘ਤੇ ਤਿੱਖਾ ਤਨਜ਼ ਕੱਸਿਆ। ਉਨ੍ਹਾਂ ਇੰਸਟਾਗ੍ਰਾਮ ਸਟੋਰੀ ਸਾਂਝੀ ਕਰਦਿਆਂ ਲਿਖਿਆ ਕਿ ਅੱਜ ਔਰਤਾਂ ਕੋਲ ਲਹਿੰਗਾ-ਚੋਲੀ, ਸਾੜ੍ਹੀ, ਜੀਂਸ ਅਤੇ ਸਲਵਾਰ-ਕਮੀਜ਼ ਵਰਗੇ ਕਈ ਵਿਕਲਪ ਮੌਜੂਦ ਹਨ। ਇੰਨੇ ਵਿਕਲਪ ਹੋਣ ਦੇ ਬਾਵਜੂਦ ਕੋਈ ਅੰਡਰਗਾਰਮੈਂਟਸ ਜਾਂ ਬਿਕਨੀ ਵਰਗੇ ਕੱਪੜੇ ਪਾ ਕੇ ਆਪਣੇ ਭਰਾ ਨੂੰ ਰੱਖੜੀ ਕਿਉਂ ਬੰਨ੍ਹੇਗਾ? ਉਨ੍ਹਾਂ ਆਖਿਆ ਕਿ ਸਟਾਈਲਿੰਗ ਦੇ ਵਿਕਲਪ ਕਿੱਥੇ ਗੁਆਚ ਗਏ ਹਨ।
ਰਾਹੁਲ ਗਾਂਧੀ ਅਤੇ ਯੂਜ਼ਰਸ ਵੱਲੋਂ ਕ੍ਰਿਤੀ ਦਾ ਸਮਰਥਨ
ਦੂਜੇ ਪਾਸੇ, ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਕ੍ਰਿਤੀ ਸੈਨਨ ਦੇ ਹੱਕ ਵਿੱਚ ਸਾਹਮਣੇ ਆਏ। ਉਨ੍ਹਾਂ ਨੇ ਇੰਸਟਾਗ੍ਰਾਮ ‘ਤੇ ਸਟੋਰੀ ਸਾਂਝੀ ਕਰਦਿਆਂ ਕਿਹਾ ਕਿ ਇੱਕ ਔਰਤ ਕੀ ਪਹਿਨਦੀ ਹੈ, ਕੀ ਕਰਦੀ ਹੈ ਅਤੇ ਕਿੱਥੇ ਜਾਂਦੀ ਹੈ, ਇਹ ਉਸਦੀ ਆਪਣੀ ਮਰਜ਼ੀ ਹੈ। ਉਨ੍ਹਾਂ ਔਰਤਾਂ ਨੂੰ ਉਨ੍ਹਾਂ ਦੀ ਆਜ਼ਾਦੀ ਲਈ ਟ੍ਰੋਲ ਕਰਨਾ ਬੰਦ ਕਰਨ ਦੀ ਅਪੀਲ ਕੀਤੀ ਅਤੇ ਹੈਸ਼ਟੈਗ ਰਾਹੀਂ ਪਿਤਰਸੱਤਾ ਨੂੰ ਖ਼ਤਮ ਕਰਨ ਦੀ ਗੱਲ ਕਹੀ। ਕਈ ਆਮ ਯੂਜ਼ਰਸ ਨੇ ਵੀ ਕ੍ਰਿਤੀ ਦਾ ਸਮਰਥਨ ਕਰਦਿਆਂ ਕਿਹਾ ਕਿ ਕਿਸੇ ਇਸ਼ਤਿਹਾਰ ਨੂੰ ਲੈ ਕੇ ਕੱਪੜਿਆਂ ਦੀ ਨੈਤਿਕ ਪੁਲਿਸਿੰਗ ਬੰਦ ਹੋਣੀ ਚਾਹੀਦੀ ਹੈ।
ਕ੍ਰਿਤੀ ਸੈਨਨ ਨੇ ਤੋੜੀ ਚੁੱਪ
ਦੋ ਦਿਨ ਚੱਲੇ ਵਿਵਾਦ ਤੋਂ ਬਾਅਦ ਕ੍ਰਿਤੀ ਸੈਨਨ ਨੇ ਆਪਣਾ ਪੱਖ ਰੱਖਦਿਆਂ ਕਿਹਾ ਕਿ ਤਿਉਹਾਰਾਂ ਦੀ ਅਸਲ ਭਾਵਨਾ ਕੱਪੜਿਆਂ ਵਿੱਚ ਨਹੀਂ, ਸਗੋਂ ਦਿਲ ਵਿੱਚ ਵਸਦੀਆਂ ਭਾਵਨਾਵਾਂ ਵਿੱਚ ਹੁੰਦੀ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਅਤੇ ਉਨ੍ਹਾਂ ਦੀ ਭੈਣ ਇੱਕ-ਦੂਜੇ ਨੂੰ ਰੱਖੜੀ ਬੰਨ੍ਹਦੇ ਹਨ ਅਤੇ ਇਹ ਪਿਆਰ ਉਨ੍ਹਾਂ ਦੇ ਪਾਲਤੂ ਕੁੱਤਿਆਂ ਤੱਕ ਵੀ ਜਾਂਦਾ ਹੈ। ਕ੍ਰਿਤੀ ਨੇ ਸਵਾਲ ਉਠਾਇਆ ਕਿ ਔਰਤਾਂ ਨੂੰ ਕੀ ਪਹਿਨਣਾ ਚਾਹੀਦਾ ਹੈ, ਇਹ ਦੱਸਣਾ ਕਦੋਂ ਬੰਦ ਹੋਵੇਗਾ ਅਤੇ ਕਿਸੇ ਔਰਤ ਦੇ ਸੱਭਿਆਚਾਰਕ ਸਤਿਕਾਰ ਨੂੰ ਸਿਰਫ਼ ਉਸਦੇ ਕੱਪੜਿਆਂ ਨਾਲ ਕਿਉਂ ਮਾਪਿਆ ਜਾਂਦਾ ਹੈ, ਜਦਕਿ ਸੱਭਿਆਚਾਰ ਨੇਕਲਾਈਨ ਵਿੱਚ ਨਹੀਂ ਸਗੋਂ ਦਿਲ ਵਿੱਚ ਹੁੰਦਾ ਹੈ।
