ਨਵੀ ਦਿੱਲੀ : ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਕੇਂਦਰੀ ਮੰਤਰੀ ਮੰਡਲ ਨੇ 7 ਵੱਡੇ ਫੈਸਲਿਆਂ ਨੂੰ ਮਨਜ਼ੂਰੀ ਦਿੱਤੀ ਹੈ। ਇਨ੍ਹਾਂ ਵਿੱਚੋਂ ਭਾਰਤ ਦੇ ਟੈਕਨਾਲੋਜੀ, ਇਲੈਕਟ੍ਰਾਨਿਕਸ, ਰੇਲਵੇ, ਖਾਦ ਅਤੇ ਇੰਫਰਾਸਟਰਕਚਰ ਸੈਕਟਰ ਨੂੰ ਗੇਮਚੇਂਜਰ ਮੰਨਿਆ ਜਾ ਰਿਹਾ ਹੈ। ਇਨ੍ਹਾਂ ਪ੍ਰੋਜੈਕਟਾਂ ਅਤੇ ਯੋਜਨਾਵਾਂ ਦਾ ਕੁੱਲ ਬਜਟ ₹2.19 ਲੱਖ ਕਰੋੜ ਤੋਂ ਵੱਧ ਹੈ।
ਸਰਕਾਰ ਦਾ ਟੀਚਾ ਭਾਰਤ ਨੂੰ ਸੈਮੀਕੰਡਕਟਰ, ਇਲੈਕਟ੍ਰਾਨਿਕਸ ਅਤੇ ਹਾਈ-ਟੈਕ ਮੈਨੂਫੈਕਚਰਿੰਗ ਦਾ ਗਲੋਬਲ ਕੇਂਦਰ ਬਣਾਉਣਾ ਹੈ। ਇਹ ਪੈਕੇਜ ਸਿਰਫ਼ ਸਰਕਾਰੀ ਖ਼ਰਚਾ ਨਹੀਂ ਹੈ, ਬਲਕਿ ਆਉਣ ਵਾਲੇ ਦਹਾਕੇ ਲਈ ਭਾਰਤ ਦੀ ਇੰਡਸਟ੍ਰੀਅਲ ਅਤੇ ਟੈਕਨਾਲੋਜੀ ਰਣਨੀਤੀ ਦਾ ਰੋਡਮੈਪ ਹੈ।
ਦੱਸ ਦਈਏ ਕਿ ਕੈਬਨਿਟ ਨੇ ‘ਇੰਡੀਆ ਸੈਮੀਕੰਡਕਟਰ ਮਿਸ਼ਨ (ISM) 2.0’ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਕੈਬਨਿਟ ਨੇ ਸੈਮੀਕਾਨ 2.0 ਪ੍ਰੋਗਰਾਮ ਲਈ 1.27 ਲੱਖ ਕਰੋੜ ਰੁਪਏ ਦੀ ਮਨਜ਼ੂਰੀ ਦਿੱਤੀ। ਇਸ ਯੋਜਨਾ ਦਾ ਮਕਸਦ ਭਾਰਤ ਵਿੱਚ ਸੈਮੀਕੰਡਕਟਰ ਦੀ ਪੂਰੀ ਸਪਲਾਈ ਚੇਨਤਿਆਰ ਕਰਨਾ ਹੈ। ਇਸ ਦੇ ਤਹਿਤ ਮਿਜ਼ਾਈਲ, ਡਰੋਨ, ਟੈਂਕ, ਯੁੱਧਪੋਤ, ਮੋਬਾਈਲ, ਕੰਪਿਊਟਰ, ਕੈਮਰਾ ਅਤੇ ਐਕਸ-ਰੇ ਮਸ਼ੀਨਾਂ ਵਿੱਚ ਵਰਤੀਆਂ ਜਾਣ ਵਾਲੀਆਂ ਚਿੱਪਾਂ ਦੇਸ਼ ਵਿੱਚ ਹੀ ਬਣਾਈਆਂ ਜਾਣਗੀਆਂ।
ਇਸ ਦੇ ਨਾਲ ਹੀ ਚਿੱਪ ਨਿਰਮਾਣ ਵਿੱਚ ਵਰਤੀਆਂ ਜਾਣ ਵਾਲੀਆਂ ਮਸ਼ੀਨਾਂ, ਕੈਮੀਕਲ ਅਤੇ 50 ਤੋਂ ਵੱਧ ਗੈਸਾਂ ਦਾ ਵੀ ਘਰੇਲੂ ਪੱਧਰ ‘ਤੇ ਉਤਪਾਦਨ ਕੀਤਾ ਜਾਵੇਗਾ। ਕੈਬਨਿਟ ਨੇ 62,500 ਕਰੋੜ ਰੁਪਏ ਦੀ ਨਵੀਂ ਮੋਬਾਈਲ PLI ਯੋਜਨਾ ਨੂੰ ਵੀ ਮਨਜ਼ੂਰੀ ਦਿੱਤੀ ਹੈ। ਇਹ ਯੋਜਨਾ 2030-31 ਤੱਕ ਲਾਗੂ ਰਹੇਗੀ।
ਇਸ ਤੋਂ ਇਲਾਵਾ ਰਾਸ਼ਟਰੀ ਨਿਵੇਸ਼ ਨੀਤੀ-2026 ਦੇ ਤਹਿਤ 9 ਨਵੇਂ ਗੈਸ ਆਧਾਰਿਤ ਯੂਰੀਆ ਪਲਾਂਟ ਲਗਾਏ ਜਾਣਗੇ, ਜਿਸ ਨਾਲ ਸਾਲਾਨਾ 1 ਕਰੋੜ ਟਨ ਵਾਧੂ ਉਤਪਾਦਨ ਸਮਰੱਥਾ ਵਧੇਗੀ। ਵਾਰਾਣਸੀ ਵਿੱਚ 10,998 ਕਰੋੜ ਰੁਪਏ ਦੀ ਲਾਗਤ ਨਾਲ 43.2 ਕਿਲੋਮੀਟਰ ਲੰਬਾ ਵਰੁਣਾ ਕਾਰੀਡੋਰ ਅਤੇ 14,447 ਕਰੋੜ ਰੁਪਏ ਦੀ ਲਾਗਤ ਨਾਲ 46 ਕਿਲੋਮੀਟਰ ਲੰਬਾ 6-ਲੇਨ ਗੰਗਾ ਕਾਰੀਡੋਰ ਬਣਾਇਆ ਜਾਵੇਗਾ।
ਇਨ੍ਹਾਂ ਦੋਵਾਂ ਪ੍ਰੋਜੈਕਟਾਂ ਨਾਲ ਸ਼ਹਿਰ ਵਿੱਚ ਯਾਤਰਾ ਦਾ ਸਮਾਂ ਕਾਫ਼ੀ ਘੱਟ ਜਾਵੇਗਾ ਅਤੇ ਏਅਰਪੋਰਟ, ਬੀ.ਐੱਚ.ਯੂ. (BHU) ਤੇ ਕਾਸ਼ੀ ਵਿਸ਼ਵਨਾਥ ਮੰਦਰ ਤੱਕ ਪਹੁੰਚ ਆਸਾਨ ਹੋਵੇਗੀ। ਓਡੀਸ਼ਾ ਦੇ ਪਾਰਾਦੀਪ-ਹਰੀਦਾਸਪੁਰ ਰੇਲਖੰਡ ਦਾ ਦੋਹਰੀਕਰਨ ਅਤੇ ਝਾਰਖੰਡ-ਓਡੀਸ਼ਾ ਦੇ ਰਾਜਖਰਸਾਵਾਂ-ਡਾਂਗੋਆਪੋਸੀ ਰੇਲਖੰਡ ‘ਤੇ ਚੌਥੀ ਲਾਈਨ ਬਣਾਈ ਜਾਵੇਗੀ। ਇਨ੍ਹਾਂ ਦੋਵਾਂ ਪ੍ਰੋਜੈਕਟਾਂ ‘ਤੇ ਕੁੱਲ 3,907 ਕਰੋੜ ਰੁਪਏ ਖ਼ਰਚ ਕੀਤੇ ਜਾਣਗੇ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ਅਤੇ ਇੰਸਟਾਗ੍ਰਾਮ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
