ਫਿਰੋਜ਼ਪੁਰ: ਪੰਜਾਬ ’ਚ ਹੜ੍ਹ ਨੇ ਤਬਾਹੀ ਮਚਾਈ ਹੋਈ ਹੈ। ਫਿਰੋਜ਼ਪੁਰ ਜ਼ਿਲ੍ਹੇ ’ਚ ਭਾਰਤ-ਪਾਕਿਸਤਾਨ ਸਰਹੱਦ ’ਤੇ ਆਰਜੀ ਐਡਵਾਂਸ ਬੰਨ੍ਹ ਹੈ। ਇਸ ਨੂੰ ਬਚਾਉਣ ਲਈ ਪਿੰਡ ਵਾਸੀ ਜੰਗੀ ਪੱਧਰ ’ਤੇ ਕੰਮ ਕਰ ਰਹੇ ਹਨ। ਵੱਖ-ਵੱਖ ਜ਼ਿਲ੍ਹਿਆਂ ਦੇ ਨੌਜਵਾਨ ਬੰਨ੍ਹ ਨੂੰ ਮਜ਼ਬੂਤ ਕਰਨ ਲਈ ਮਿੱਟੀ ਦੀਆਂ ਟਰਾਲੀਆਂ ਅਤੇ ਬੋਰੀਆਂ ਭਰ ਰਹੇ ਹਨ।
ਸਤਲੁਜ ਅਤੇ ਰਾਵੀ ਦਾ ਉਫਾਨ
ਸਤਲੁਜ ਅਤੇ ਰਾਵੀ ਨਦੀਆਂ ਦੇ ਉਫਾਨ ਕਾਰਨ BSF ਦਾ ਵੱਡਾ ਸਰਹੱਦੀ ਹਿੱਸਾ ਹੜ੍ਹ ਦੇ ਪਾਣੀ ’ਚ ਰੁੜ ਗਿਆ ਹੈ। ਇਸ ਕਾਰਨ BSF ਜਵਾਨਾਂ ਨੂੰ ਕਈ ਦਰਜਨ ਚੌਕੀਆਂ ਖਾਲੀ ਕਰਨੀਆਂ ਪਈਆਂ ਹਨ। ਸਰਹੱਦ ਦੇ ਦੂਜੇ ਪਾਸੇ, ਪਾਕਿਸਤਾਨੀ ਚੌਕੀਆਂ ਵੀ ਨਦੀ ਦੇ ਪ੍ਰਕੋਪ ਦਾ ਸਾਹਮਣਾ ਕਰ ਰਹੀਆਂ ਹਨ।
ਬੰਨ੍ਹਾਂ ’ਚ 50 ਥਾਵਾਂ ’ਤੇ ਨੁਕਸਾਨ
ਹੁਣ ਤੱਕ ਦੀ ਜਾਣਕਾਰੀ ਅਨੁਸਾਰ, ਗੁਰਦਾਸਪੁਰ, ਅੰਮ੍ਰਿਤਸਰ ਅਤੇ ਪਠਾਨਕੋਟ ’ਚ ਬੰਨ੍ਹਾਂ ਦੇ 50 ਥਾਵਾਂ ’ਤੇ ਟੁੱਟਣ ਦੀਆਂ ਰਿਪੋਰਟਾਂ ਮਿਲੀਆਂ ਹਨ। ਗੁਰਦਾਸਪੁਰ ਡਰੇਨੇਜ ਵਿਭਾਗ ਨੇ ਪੁਸ਼ਟੀ ਕੀਤੀ ਹੈ ਕਿ ਜ਼ਿਲ੍ਹੇ ’ਚ ਰਾਵੀ ਨਦੀ ਦੇ ਬੰਨ੍ਹਾਂ ’ਚ 28 ਥਾਵਾਂ ’ਤੇ ਨੁਕਸਾਨ ਹੋਇਆ ਹੈ। ਅੰਮ੍ਰਿਤਸਰ ’ਚ 10-12 ਥਾਵਾਂ ਅਤੇ ਪਠਾਨਕੋਟ ’ਚ 2 ਕਿਲੋਮੀਟਰ ਲੰਬਾ ਬੰਨ੍ਹ ਪੂਰੀ ਤਰ੍ਹਾਂ ਰੁੜ ਗਿਆ ਹੈ।
BSF ਦੀਆਂ 30-40 ਚੌਕੀਆਂ ਡੁੱਬੀਆਂ
BSF ਪੰਜਾਬ ਫਰੰਟੀਅਰ ਦੇ ਡੀਆਈਜੀ ਨੇ ਦੱਸਿਆ ਕਿ ਗੁਰਦਾਸਪੁਰ ’ਚ 30-40 ਸਰਹੱਦੀ ਚੌਕੀਆਂ ਪਾਣੀ ’ਚ ਡੁੱਬ ਗਈਆਂ ਹਨ। ਸਾਰੇ ਜਵਾਨਾਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਗਿਆ ਹੈ ਅਤੇ ਕਿਸੇ ਜਾਨੀ ਨੁਕਸਾਨ ਦੀ ਖਬਰ ਨਹੀਂ ਹੈ।
ਬੰਨ੍ਹਾਂ ’ਚ ਪਈਆਂ ਤਰੇੜਾਂ ਦਾ ਫਾਇਦਾ ਨਸ਼ਾ ਤਸਕਰਾਂ ਨੇ ਵੀ ਉਠਾਉਣ ਦੀ ਕੋਸ਼ਿਸ਼ ਕੀਤੀ, ਪਰ BSF ਦੀ ਸੁਚੇਤਤਾ ਨਾਲ ਉਨ੍ਹਾਂ ਨੂੰ ਤੁਰੰਤ ਫੜ ਲਿਆ ਗਿਆ।
ਸਰਹੱਦ ਪਾਰ ਵੀ ਰਾਵੀ ਦਾ ਰੌਦਰ ਰੂਪ
ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਰਾਵੀ ਜ਼ੀਰੋ ਲਾਈਨ ਦੇ ਦੋਵੇਂ ਪਾਸੇ ਊਫਾਨ ‘ਤੇ ਹੈ। ਪਾਕਿਸਤਾਨੀ ਰੇਂਜਰਸ ਨੂੰ ਵੀ ਆਪਣੀਆਂ ਚੌਕੀਆਂ ਛੱਡਣੀਆਂ ਪਈਆਂ। ਅਧਿਕਾਰੀ ਨੇ ਕਿਹਾ ਕਿ BSF ਜਵਾਨ ਸਤਲੁਜ ਦੇ ਹੜ੍ਹ ਨਾਲ ਲੜਨ ਲਈ ਸਮਰੱਥ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਗੁਰਦਾਸਪੁਰ ਅਤੇ ਅਮ੍ਰਿਤਸਰ ’ਚ ਰਾਵੀ ਨਦੀ ਨੇ ਕਈ ਸਾਲਾਂ ਬਾਅਦ ਅਜਿਹਾ ਵਿਕਰਾਲ ਰੂਪ ਧਾਰਿਆ ਹੈ।
