ਸਟੌਕਹੋਮ: ਬ੍ਰਿਟਿਸ਼ ਰੈਪ ਕਲਾਕਾਰ ਸਟੈਫਨੀ ਐਲਨ, ਜਿਸ ਨੂੰ ਸਟੈਫਲੌਨ ਡੌਨ ਵਜੋਂ ਜਾਣਿਆ ਜਾਂਦਾ ਹੈ, ਨੇ ਸਵੀਡਨ ’ਚ ਆਪਣੇ ਲਾਈਵ ਕੌਂਸਰਟ ਦੌਰਾਨ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਨੂੰ ਸ਼ਰਧਾਂਜਲੀ ਦਿੱਤੀ। ਨਾਲ ਹੀ, ਉਨ੍ਹਾਂ ਨੇ ਮੂਸੇਵਾਲਾ ਨਾਲ ਆਪਣੇ ਸਬੰਧਾਂ ਅਤੇ ਸਾਂਝੇ ਕੰਮ ਬਾਰੇ ਵੀ ਦੱਸਿਆ।
16 ਅਗਸਤ ਨੂੰ ਸਵੀਡਨ ’ਚ ਹੋਏ ਲਾਈਵ ਕੌਂਸਰਟ ’ਚ ਸਟੈਫਲੌਨ ਡੌਨ ਨੇ ਮੂਸੇਵਾਲਾ ਨਾਲ ਸ਼ੂਟ ਕੀਤੇ ਮਸ਼ਹੂਰ ਗੀਤ ‘ਡਿਲੇਮਾ’ ਦੀ ਕਹਾਣੀ ਸਾਂਝੀ ਕੀਤੀ। ਕੌਂਸਰਟ ਦੌਰਾਨ ‘ਡਿਲੇਮਾ’ ਗੀਤ ਵਜਾਇਆ ਗਿਆ, ਜਿਸ ’ਚ ਸਟੈਫਲੌਨ ਨੇ ਖੁਦ ਮੂਸੇਵਾਲਾ ਦੀਆਂ ਲਾਈਨਾਂ ਗਾਈਆਂ।
ਉਨ੍ਹਾਂ ਨੇ ਕਿਹਾ ਕਿ ਮੂਸੇਵਾਲਾ ਨੇ ਉਨ੍ਹਾਂ ਨੂੰ ਭਾਰਤ ਬੁਲਾਇਆ ਸੀ, ਪਰ ਉਹ ਉਸ ਸਮੇਂ ਨਹੀਂ ਜਾ ਸਕੀ। ਜਦੋਂ ਉਹ ਗਈ ਤਾਂ ਮੂਸੇਵਾਲਾ ਦੁਨੀਆ ’ਚ ਨਹੀਂ ਸਨ। ਸਟੈਫਨੀ ਨੇ ਕਿਹਾ, “ਮੂਸੇਵਾਲਾ ਨਾਲ ਕੰਮ ਕਰਨਾ ਮੇਰੇ ਲਈ ਮਾਣ ਵਾਲੀ ਗੱਲ ਸੀ।”
ਕੌਂਸਰਟ ’ਚ ਸਟੈਫਲੌਨ ਡੌਨ ਨੇ ਜਿਵੇਂ ਹੀ ਸਟੇਜ ਤੋਂ ਸਿੱਧੂ ਮੂਸੇਵਾਲਾ ਦਾ ਨਾਂ ਲਿਆ, ਪੂਰਾ ਕੌਂਸਰਟ ਹਾਲ ਤਾੜੀਆਂ ਅਤੇ ਨਾਅਰਿਆਂ ਨਾਲ ਗੂੰਜ ਉੱਠਿਆ। ਉਨ੍ਹਾਂ ਨੇ ਭਾਵੁਕ ਹੁੰਦੇ ਹੋਏ ਕਿਹਾ, “ਮੈਂ ਮੂਸੇਵਾਲਾ ਨਾਲ ਗੀਤ ਕੀਤਾ ਸੀ। ਉਸ ਤੋਂ ਬਾਅਦ ਉਨ੍ਹਾਂ ਨੇ ਮੈਨੂੰ ਭਾਰਤ ਬੁਲਾਇਆ ਸੀ। ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਮੈਂ ਉਨ੍ਹਾਂ ਦੇ ਪਰਿਵਾਰ ਨੂੰ ਮਿਲੀ ਅਤੇ ਗੀਤ ਸ਼ੂਟ ਕੀਤਾ। ਇਹ ਬੜਾ ਦੁਖਦਾਈ ਹੈ ਕਿ ਅੱਜ ਉਹ ਸਾਡੇ ਵਿਚ ਨਹੀਂ ਹਨ।”
ਇਹ ਗੀਤ ਸਾਡੀ ਦੋਸਤੀ ਦੀ ਨਿਸ਼ਾਨੀ
ਸਟੈਫਲੌਨ ਡੌਨ ਨੇ ਕਿਹਾ, “ਮੈਂ ਇਹ ਗੀਤ ਸਿੱਧੂ ਨੂੰ ਸਮਰਪਿਤ ਕੀਤਾ ਹੈ। ਇਹ ਸਿਰਫ਼ ਇੱਕ ਪ੍ਰੋਜੈਕਟ ਨਹੀਂ, ਸਗੋਂ ਸਾਡੀ ਦੋਸਤੀ ਅਤੇ ਇੱਕ ਸ਼ਾਨਦਾਰ ਯਾਦ ਦੀ ਨਿਸ਼ਾਨੀ ਹੈ।” ਉਸ ਤੋਂ ਬਾਅਦ ਸਟੇਜ ’ਤੇ ‘ਡਿਲੇਮਾ’ ਗੀਤ ਵਜਾਇਆ ਗਿਆ, ਜਿਸ ’ਚ ਸਟੈਫਲੌਨ ਨੇ ਮੂਸੇਵਾਲਾ ਦੇ ਬੋਲ ਖੁਦ ਗਾਏ, ਜਿਸ ’ਤੇ ਦਰਸ਼ਕ ਭਾਵੁਕ ਹੋ ਗਏ।
ਸਟੈਫਲੌਨ ਨੇ ਦੱਸਿਆ ਕਿ ਗੀਤ ਲਈ ਸਹਿਯੋਗ ਪੂਰੀ ਤਰ੍ਹਾਂ ਮੂਸੇਵਾਲਾ ਅਤੇ ਉਨ੍ਹਾਂ ਦੀ ਪਹਿਲ ’ਤੇ ਹੋਇਆ ਸੀ। ਉਨ੍ਹਾਂ ਕਿਹਾ, “ਮੂਸੇਵਾਲਾ ਨੇ ਨਾ ਸਿਰਫ਼ ਸੰਗੀਤ ’ਚ ਆਪਣੀ ਪਛਾਣ ਬਣਾਈ, ਸਗੋਂ ਹਰ ਕਲਾਕਾਰ ਨੂੰ ਜੋੜਨ ਅਤੇ ਸਨਮਾਨ ਦੇਣ ਦੀ ਖੂਬੀ ਵੀ ਰੱਖਦੇ ਸਨ। ਉਨ੍ਹਾਂ ਨਾਲ ਕੰਮ ਕਰਨਾ ਮੇਰੇ ਲਈ ਮਾਣ ਵਾਲੀ ਗੱਲ ਸੀ।”
ਫੈਨਜ਼ ਨੇ ਸਿੱਧੂ ਮੂਸੇਵਾਲਾ ਨੂੰ ਦਿੱਤੀ ਸ਼ਰਧਾਂਜਲੀ
ਸਟੈਫਲੌਨ ਡੌਨ ਅਤੇ ਸਿੱਧੂ ਮੂਸੇਵਾਲਾ ਦਾ ਗੀਤ ‘ਡਿਲੇਮਾ’ ਦੁਨੀਆ ਭਰ ਦੇ ਪੰਜਾਬੀ ਸੰਗੀਤ ਪ੍ਰੇਮੀਆਂ ’ਚ ਕਾਫੀ ਮਕਬੂਲ ਹੈ। ਸਵੀਡਨ ’ਚ ਹੋਏ ਇਸ ਕੌਂਸਰਟ ਦੀ ਚਰਚਾ ਇਸ ਲਈ ਵੀ ਹੈ ਕਿਉਂਕਿ ਮੂਸੇਵਾਲਾ ਦੇ ਫੈਨਜ਼ ਅਜੇ ਵੀ ਦੁਨੀਆ ਭਰ ’ਚ ਮੌਜੂਦ ਹਨ। ਜਦੋਂ ਸਟੈਫਲੌਨ ਡੌਨ ਨੇ ‘ਡਿਲੇਮਾ’ ਗੀਤ ਨੂੰ ਮੂਸੇਵਾਲਾ ਨੂੰ ਸਮਰਪਿਤ ਕੀਤਾ, ਤਾਂ ਮੌਜੂਦ ਫੈਨਜ਼ ਨੇ ਖੜ੍ਹੇ ਹੋ ਕੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦਿੱਤੀ।
