ਸਿਓਲ: ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਨੇ ਦੱਖਣੀ ਕੋਰੀਆ ਅਤੇ ਅਮਰੀਕਾ ਵਿਚਕਾਰ ਜਾਰੀ ਫੌਜੀ ਅਭਿਆਸ ’ਤੇ ਵੱਡਾ ਬਿਆਨ ਦਿੱਤਾ ਹੈ। ਉੱਤਰੀ ਕੋਰੀਆਈ ਨੇਤਾ ਨੇ ਦੁਸ਼ਮਣਾਂ ਦਾ ਮੁਕਾਬਲਾ ਕਰਨ ਲਈ ਦੇਸ਼ ਦੀ ਪਰਮਾਣੂ ਤਾਕਤ ਨੂੰ ਤੇਜ਼ੀ ਨਾਲ ਵਧਾਉਣ ਦਾ ਸੰਕਲਪ ਵੀ ਲਿਆ ਹੈ। ਸਰਕਾਰੀ ਮੀਡੀਆ ਨੇ ਮੰਗਲਵਾਰ ਨੂੰ ਇਸ ਬਾਰੇ ਜਾਣਕਾਰੀ ਦਿੱਤੀ। ਕਿਮ ਨੇ ਇਹ ਗੱਲ ਪਰਮਾਣੂ-ਸਮਰੱਥ ਪ੍ਰਣਾਲੀਆਂ ਨਾਲ ਲੈਸ ਸਭ ਤੋਂ ਉੱਨਤ ਜੰਗੀ ਜਹਾਜ਼ ਦਾ ਨਿਰੀਖਣ ਕਰਦੇ ਸਮੇਂ ਕਹੀ।
‘ਉੱਤਰੀ ਕੋਰੀਆ ਨੂੰ ਚੁੱਕਣੇ ਪੈਣਗੇ ਕਦਮ’
ਉੱਤਰੀ ਕੋਰੀਆ ਦੀ ਸਮਾਚਾਰ ਏਜੰਸੀ ‘ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ’ (KCNA) ਦੀ ਰਿਪੋਰਟ ਮੁਤਾਬਕ, ਅਪ੍ਰੈਲ ’ਚ ਪਹਿਲੀ ਵਾਰ ਪ੍ਰਦਰਸ਼ਿਤ ਕੀਤੇ ਗਏ 5,000 ਟਨ ਸਮਰੱਥਾ ਵਾਲੇ ਜੰਗੀ ਜਹਾਜ਼ ‘ਚੋਏ ਹਯੋਨ’ ਦਾ ਨਿਰੀਖਣ ਕਰਦੇ ਸਮੇਂ ਕਿਮ ਜੋਂਗ ਉਨ ਨੇ ਕਿਹਾ ਕਿ ਅਮਰੀਕਾ ਅਤੇ ਦੱਖਣੀ ਕੋਰੀਆ ਦਾ ਸਾਂਝਾ ਸੈਨਿਕ ਅਭਿਆਸ ਦੁਸ਼ਮਣੀ ਅਤੇ ਜੰਗ ਭੜਕਾਉਣ ਦੀ ਉਨ੍ਹਾਂ ਦੀ ਇੱਛਾ ਨੂੰ ਦਰਸਾਉਂਦਾ ਹੈ। ਉੱਤਰੀ ਕੋਰੀਆਈ ਨੇਤਾ ਨੇ ਦਾਅਵਾ ਕੀਤਾ ਕਿ ਇਨ੍ਹਾਂ ਸੈਨਿਕ ਅਭਿਆਸਾਂ ’ਚ ਪਰਮਾਣੂ ਹਥਿਆਰ ਸ਼ਾਮਲ ਕੀਤੇ ਜਾਣ ਨਾਲ ਇਹ ਪਹਿਲਾਂ ਨਾਲੋਂ ਵਧੇਰੇ ਉਕਸਾਉਣ ਵਾਲੀਆਂ ਗਤੀਵਿਧੀਆਂ ਬਣ ਗਈਆਂ ਹਨ। ਇਸ ਦਾ ਜਵਾਬ ਦੇਣ ਲਈ ਉੱਤਰੀ ਕੋਰੀਆ ਨੂੰ ਹੁਣ ਸਰਗਰਮ ਅਤੇ ਵਿਆਪਕ ਕਦਮ ਚੁੱਕਣ ਦੀ ਲੋੜ ਹੈ।
‘ਸੁਰੱਖਿਆ ਸਥਿਤੀ ਹੋ ਰਹੀ ਗੰਭੀਰ’
KCNA ਨੇ ਆਪਣੀ ਰਿਪੋਰਟ ’ਚ ਕਿਮ ਜੋਂਗ ਉਨ ਦੇ ਹਵਾਲੇ ਨਾਲ ਕਿਹਾ, “DPRK (ਡੈਮੋਕ੍ਰੇਟਿਕ ਪੀਪਲਜ਼ ਰਿਪਬਲਿਕ ਆਫ ਕੋਰੀਆ) ਦੇ ਆਲੇ-ਦੁਆਲੇ ਸੁਰੱਖਿਆ ਦੀ ਸਥਿਤੀ ਦਿਨ-ਬ-ਦਿਨ ਗੰਭੀਰ ਹੋ ਰਹੀ ਹੈ। ਅਜਿਹੇ ਹਾਲਾਤ ’ਚ ਸਾਨੂੰ ਆਪਣੀ ਮੌਜੂਦਾ ਸੈਨਿਕ ਨੀਤੀ ਅਤੇ ਅਭਿਆਸ ’ਚ ਵੱਡਾ ਬਦਲਾਅ ਕਰਨ ਅਤੇ ਪਰਮਾਣੂ ਸ਼ਕਤੀ ਦਾ ਤੇਜ਼ੀ ਨਾਲ ਵਿਸਤਾਰ ਕਰਨ ਦੀ ਜ਼ਰੂਰਤ ਹੈ।”
ਦੱਖਣੀ ਕੋਰੀਆ ਅਤੇ ਅਮਰੀਕਾ ਦਾ ਜਵਾਬ
ਕਿਮ ਜੋਂਗ ਉਨ ਨੇ ਉਸ ਸਮੇਂ ਪੱਛਮੀ ਬੰਦਰਗਾਹ ਨਾਮਪੋ ਦਾ ਦੌਰਾ ਕੀਤਾ ਜਦੋਂ ਦੱਖਣੀ ਕੋਰੀਆ ਅਤੇ ਅਮਰੀਕਾ ਨੇ ਆਪਣਾ ਸਾਲਾਨਾ ਸਾਂਝਾ ਸੈਨਿਕ ਅਭਿਆਸ ‘ਉਲਚੀ ਫ੍ਰੀਡਮ ਸ਼ੀਲਡ’ ਸ਼ੁਰੂ ਕੀਤਾ ਸੀ। ਇਹ ਅਭਿਆਸ ਪਰਮਾਣੂ ਹਥਿਆਰਾਂ ਨਾਲ ਲੈਸ ਉੱਤਰੀ ਕੋਰੀਆ ਤੋਂ ਪੈਦਾ ਹੋਣ ਵਾਲੇ ਖਤਰਿਆਂ ਦਾ ਬਿਹਤਰ ਢੰਗ ਨਾਲ ਮੁਕਾਬਲਾ ਕਰਨ ਦੀ ਤਿਆਰੀ ਦਾ ਹਿੱਸਾ ਹੈ। ਇਸ ’ਚ 21,000 ਸੈਨਿਕ ਸ਼ਾਮਲ ਹਨ, ਜਿਨ੍ਹਾਂ ’ਚ 18,000 ਦੱਖਣੀ ਕੋਰੀਆਈ ਹਨ। ਦੱਖਣੀ ਕੋਰੀਆ ਅਤੇ ਅਮਰੀਕਾ ਦਾ ਕਹਿਣਾ ਹੈ ਕਿ ਇਹ ਅਭਿਆਸ ਪੂਰੀ ਤਰ੍ਹਾਂ ਰੱਖਿਆਤਮਕ ਹੈ, ਪਰ ਉੱਤਰੀ ਕੋਰੀਆ ਇਸ ਨੂੰ ਲੰਬੇ ਸਮੇਂ ਤੋਂ ਹਮਲੇ ਦੀ ਤਿਆਰੀ ਦੱਸਦਾ ਆ ਰਿਹਾ ਹੈ।
