ਨਵੀਂ ਦਿੱਲੀ: ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਅਤੇ ਕਾਂਗਰਸ ਦੇ ਰਾਸ਼ਟਰੀ ਪ੍ਰਧਾਨ ਮੱਲਿਕਾਰਜੁਨ ਖੜਗੇ ਸੁਤੰਤਰਤਾ ਦਿਵਸ ਸਮਾਗਮ ’ਚ ਸ਼ਾਮਲ ਨਹੀਂ ਹੋਏ। ਦੋਵਾਂ ਨੇਤਾਵਾਂ ਦੀ ਗੈਰ-ਹਾਜ਼ਰੀ ਨੂੰ ਲੈ ਕੇ ਭਾਜਪਾ ਨੇ ਕਾਂਗਰਸ ’ਤੇ ਤਿੱਖਾ ਹਮਲਾ ਬੋਲਿਆ। ਭਾਜਪਾ ਨੇ ਕਿਹਾ ਕਿ ਮੁੱਖ ਵਿਰੋਧੀ ਪਾਰਟੀ ਨੇ ਇਸ ਸਮਾਗਮ ਦਾ ਬਾਈਕਾਟ ਕਰਕੇ ਦੇਸ਼ ਦਾ ਅਪਮਾਨ ਕਰਨ ਦਾ ਨਵਾਂ ਨੀਵਾਂ ਪੱਧਰ ਛੂਹ ਲਿਆ। ਭਾਜਪਾ ਦੇ ਇਲਜ਼ਾਮਾਂ ਦੇ ਜਵਾਬ ’ਚ ਕਾਂਗਰਸ ਨੇਤਾਵਾਂ ਨੇ ਵੀ ਪਲਟਵਾਰ ਕੀਤਾ ਅਤੇ ਦੱਸਿਆ ਕਿ ਰਾਹੁਲ ਅਤੇ ਖੜਗੇ ਸੁਤੰਤਰਤਾ ਦਿਵਸ ਸਮਾਗਮ ’ਚ ਕਿਉਂ ਨਹੀਂ ਸ਼ਾਮਲ ਹੋਏ।
ਭਾਜਪਾ ਦੇ ਇਲਜ਼ਾਮਾਂ ’ਤੇ ਕਾਂਗਰਸ ਦਾ ਪਲਟਵਾਰ
ਕਾਂਗਰਸ ਨੇਤਾ ਗੁਰਦੀਪ ਸਿੰਘ ਸੱਪਲ ਨੇ ਭਾਜਪਾ ਦੇ ਇਲਜ਼ਾਮਾਂ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਭਾਜਪਾ ਨੂੰ ਇਹ ਸਮਝਣਾ ਚਾਹੀਦਾ ਹੈ ਕਿ ਪ੍ਰਧਾਨ ਮੰਤਰੀ ਮੋਦੀ ਦਾ 11 ਸਾਲ ਦਾ ਇਤਿਹਾਸ ਇਹ ਹੈ ਕਿ ਉਹ ਲਾਲ ਕਿਲੇ ਤੋਂ ਏਕਤਾ ਦੀ ਗੱਲ ਕਰਨ ਦੀ ਬਜਾਏ ਵਿਰੋਧੀ ਧਿਰ ’ਤੇ ਹਮਲੇ ਕਰਨ ਲਈ ਇਸ ਮੌਕੇ ਦੀ ਵਰਤੋਂ ਕਰਦੇ ਹਨ। ਉਹ ਭਾਰਤ ਦੀ ਸਿਆਸਤ ’ਚ ਲਗਾਤਾਰ ਵੰਡ ਪੈਦਾ ਕਰਨ ਵਾਲੀਆਂ ਗੱਲਾਂ ਕਰਦੇ ਹਨ।
ਸੱਪਲ ਨੇ ਅੱਗੇ ਕਿਹਾ ਕਿ ਪ੍ਰਧਾਨ ਮੰਤਰੀ ਮੋਦੀ ਲਗਾਤਾਰ ਅਜਿਹੀ ਭਾਸ਼ਾ ਬੋਲਦੇ ਹਨ, ਜਿਸ ਨਾਲ ਲੱਗਦਾ ਹੈ ਕਿ ਦੇਸ਼ 2014 ’ਚ ਹੀ ਜਾਗਿਆ। ਉਨ੍ਹਾਂ ਨੇ ਸੁਤੰਤਰਤਾ ਦਿਵਸ ’ਤੇ ਕਿਹਾ ਕਿ ਭਾਰਤ ਚੌਲ, ਮਸਾਲਿਆਂ ਅਤੇ ਫਲਾਂ ’ਚ ਨੰਬਰ ਵਨ ਹੈ, ਪਰ ਉਹ ਇਹ ਦੱਸਣ ’ਚ ਹਿਚਕਿਚਾਏ ਕਿ ਇਹ ਸਫਲਤਾ ਇੰਦਰਾ ਗਾਂਧੀ ਦੀ ਹਰਿਤ ਕ੍ਰਾਂਤੀ, ਰਾਜੀਵ ਗਾਂਧੀ ਦੇ ਆਇਲ ਸੀਡ ਮਿਸ਼ਨ ਜਾਂ ਨਰਸਿਮਹਾ ਰਾਓ ਦੇ ਸ਼ਵੇਤ ਕ੍ਰਾਂਤੀ ਵਾਲੇ ਸਮੇਂ ਦੀ ਦੇਣ ਹੈ।
ਸੱਪਲ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਮੋਦੀ ਸੰਸਦ ’ਚ ਹੋਵੇ ਜਾਂ ਲਾਲ ਕਿਲੇ ’ਤੇ, ਸਿਰਫ਼ ਵਿਰੋਧੀ ਧਿਰ ਨੂੰ ਨਿਸ਼ਾਨਾ ਬਣਾਉਂਦੇ ਹਨ। ਇਸ ਲਈ ਭਾਜਪਾ ਦਾ ਇਹ ਕਹਿਣਾ ਗਲਤ ਹੈ ਕਿ ਪੀਐਮ ਸੰਵਿਧਾਨ ਦੀ ਗੱਲ ਕਰਦੇ ਹਨ। ਸੰਵਿਧਾਨ ਨੇ ਪ੍ਰਧਾਨ ਮੰਤਰੀ ਨੂੰ ਦੇਸ਼ ਦੀ ਏਕਤਾ ਬਣਾਈ ਰੱਖਣ ਦੀ ਜ਼ਿੰਮੇਵਾਰੀ ਦਿੱਤੀ ਹੈ, ਪਰ ਉਹ ਸੁਤੰਤਰਤਾ ਦਿਵਸ ਵਰਗੇ ਮੌਕੇ ਵੀ ਵੰਡ ਪੈਦਾ ਕਰਨ ਵਾਲੀਆਂ ਗੱਲਾਂ ਕਰਦੇ ਹਨ। ਪਿਛਲੇ 11 ਸਾਲਾਂ ਦਾ ਅਨੁਭਵ ਇਹੀ ਦੱਸਦਾ ਹੈ।
ਭਾਜਪਾ ਦਾ ਦੋਸ਼: ‘ਇਹ ਰਾਸ਼ਟਰੀ ਪਰਵ ਸੀ, ਕੋਈ ਜਨਮਦਿਨ ਨਹੀਂ’
ਭਾਜਪਾ ਦੇ ਰਾਸ਼ਟਰੀ ਬੁਲਾਰੇ ਸ਼ਹਿਜ਼ਾਦ ਪੂਨਾਵਾਲਾ ਨੇ ਦੋਸ਼ ਲਗਾਇਆ ਕਿ ਰਾਹੁਲ ਗਾਂਧੀ ਅਤੇ ਮੱਲਿਕਾਰਜੁਨ ਖੜਗੇ ਦੀ ਸੁਤੰਤਰਤਾ ਦਿਵਸ ਸਮਾਗਮ ’ਚ ਗੈਰ-ਹਾਜ਼ਰੀ ਨਾਲ ਕਾਂਗਰਸ ਨੇ ਸਾਬਤ ਕਰ ਦਿੱਤਾ ਕਿ ਉਸ ਨੂੰ ਰਾਸ਼ਟਰੀ ਮੌਕਿਆਂ ਨਾਲ ਕੋਈ ਲੈਣਾ-ਦੇਣਾ ਨਹੀਂ। ਉਨ੍ਹਾਂ ਨੇ ਕਿਹਾ, “ਲੋਕ ਸਭਾ ’ਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਲਾਲ ਕਿਲੇ ’ਤੇ ਹੋਏ ਰਾਸ਼ਟਰੀ ਸਮਾਗਮ ਦਾ ਬਾਈਕਾਟ ਕੀਤਾ। ਇਹ ਰਾਸ਼ਟਰੀ ਪਰਵ ਸੀ, ਕਿਸੇ ਦਾ ਜਨਮਦਿਨ ਸਮਾਗਮ ਜਾਂ ਪਾਰਟੀ ਦਾ ਪ੍ਰੋਗਰਾਮ ਨਹੀਂ ਸੀ।”
