ਪੇਸ਼ਾਵਰ: ਪਾਕਿਸਤਾਨ ਦੇ ਕਈ ਇਲਾਕਿਆਂ ਵਿੱਚ ਮਾਨਸੂਨ ਤੋਂ ਪਹਿਲਾਂ ਦੀ ਭਾਰੀ ਬਾਰਿਸ਼ ਨੇ ਤਬਾਹੀ ਮਚਾ ਦਿੱਤੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਪਿਛਲੇ ਤਿੰਨ ਦਿਨਾਂ ਵਿੱਚ ਬਾਰਿਸ਼ ਨਾਲ ਸਬੰਧਿਤ ਵੱਖ-ਵੱਖ ਘਟਨਾਵਾਂ ਵਿੱਚ 16 ਬੱਚਿਆਂ ਸਮੇਤ ਘੱਟੋ-ਘੱਟ 34 ਲੋਕਾਂ ਦੀ ਮੌਤ ਜਦੋਂ ਕਿ 46 ਹੋਰ ਜ਼ਖਮੀ ਹੋ ਗਏ ਹਨ। ਖੈਬਰ ਪਖਤੂਨਖਵਾ ਸੂਬੇ ਵਿੱਚ ਪਿਛਲੇ 48 ਘੰਟਿਆਂ ਵਿੱਚ 19 ਲੋਕਾਂ ਦੀ ਮੌਤ ਅਤੇ 6 ਹੋਰ ਜ਼ਖਮੀ ਹੋ ਗਏ ਹਨ। ਸੂਬਾਈ ਆਫ਼ਤ ਪ੍ਰਬੰਧਨ ਅਥਾਰਟੀ (ਪੀਡੀਐਮਏ) ਦੇ ਅਨੁਸਾਰ, ਸਵਾਤ, ਐਬਟਾਬਾਦ, ਚਾਰਸੱਦਾ, ਮਲਕੰਦ, ਸ਼ਾਂਗਲਾ, ਲੋਅਰ ਦੀਰ ਅਤੇ ਤੋਰਘਰ ਜ਼ਿਲ੍ਹਿਆਂ ਵਿੱਚ ਇਸ ਆਫ਼ਤ ਦਾ ਸ਼ਿਕਾਰ 6 ਪੁਰਸ਼, 5 ਔਰਤਾਂ ਅਤੇ 8 ਬੱਚੇ ਹੋਏ ਹਨ। ਸਵਾਤ ਜ਼ਿਲ੍ਹਾ ਸਭ ਤੋਂ ਵੱਧ ਪ੍ਰਭਾਵਿਤ ਹੋਇਆ, ਜਿੱਥੇ 13 ਲੋਕ ਮਾਰੇ ਗਏ ਅਤੇ 6 ਜ਼ਖਮੀ ਹੋਏ ਹਨ।
ਸਿਆਲਕੋਟ ਦੇ ਇੱਕ ਪਰਿਵਾਰ ਦੇ 17 ਮੈਂਬਰ ਜੋ ਪਿਕਨਿਕ ਲਈ ਗਏ ਸਨ, ਸਵਾਤ ਨਦੀ ਵਿੱਚ ਪਾਣੀ ਦੇ ਪੱਧਰ ਵਿੱਚ ਅਚਾਨਕ ਵਾਧਾ ਹੋਣ ਕਾਰਨ ਵਹਿ ਗਏ। ਰਿਪੋਰਟਾਂ ਅਨੁਸਾਰ ਬਚਾਅ ਯਤਨਾਂ ਦੇ ਬਾਵਜੂਦ, ਬਹੁਤ ਸਾਰੇ ਲੋਕ ਤੇਜ਼ ਵਹਾਅ ਵਿੱਚ ਵਹਿ ਗਏ। ਇਸ ਤੋਂ ਇਲਾਵਾ, ਸੂਬੇ ਵਿੱਚ ਮੀਂਹ ਨਾਲ ਸਬੰਧਿਤ ਘਟਨਾਵਾਂ ਵਿੱਚ 56 ਘਰਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ। ਪੀਡੀਐਮਏ ਦੇ ਅਨੁਸਾਰ, ਪਿਛਲੇ 3 ਦਿਨਾਂ ਵਿੱਚ 8 ਬੱਚਿਆਂ ਸਮੇਤ 15 ਲੋਕ ਮਾਰੇ ਗਏ ਅਤੇ 40 ਹੋਰ ਜ਼ਖਮੀ ਹੋਏ। ਸਭ ਤੋਂ ਵੱਧ ਮੌਤਾਂ ਲਾਹੌਰ, ਓਕਾੜਾ, ਬਹਾਵਲਨਗਰ, ਜੇਹਲਮ, ਗੁਜਰਾਤ, ਫੈਸਲਾਬਾਦ, ਮੰਡੀ ਬਹਾਉਦੀਨ, ਸਾਹੀਵਾਲ, ਚਿਨਿਓਟ, ਮੁਲਤਾਨ, ਸ਼ੇਖੂਪੁਰਾ ਅਤੇ ਨਨਕਾਣਾ ਜ਼ਿਲ੍ਹਿਆਂ ਵਿੱਚ ਕੰਧ ਅਤੇ ਛੱਤ ਡਿੱਗਣ ਦੀਆਂ ਘਟਨਾਵਾਂ ਵਿੱਚ ਹੋਈਆਂ ਹਨ।
ਪੀਡੀਐਮਏ ਨੇ ਕਿਹਾ ਕਿ ਮਾਨਸੂਨ ਤੋਂ ਪਹਿਲਾਂ ਦੀ ਬਾਰਿਸ਼ ਦਾ ਪਹਿਲਾ ਦੌਰ 1 ਜੁਲਾਈ ਤੱਕ ਜਾਰੀ ਰਹੇਗਾ। ਇਸ ਸਮੇਂ ਦੌਰਾਨ ਤੇਜ਼ ਹਵਾਵਾਂ ਅਤੇ ਗਰਜ ਨਾਲ ਮੀਂਹ ਪੈਣ ਦੀ ਸੰਭਾਵਨਾ ਹੈ। ਅਥਾਰਟੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਖਰਾਬ ਮੌਸਮ ਵਿੱਚ ਗੈਰ-ਜ਼ਰੂਰੀ ਯਾਤਰਾ ਤੋਂ ਬਚਣ। ਇਸ ਤੋਂ ਇਲਾਵਾ, ਟੁੱਟੇ ਘਰਾਂ ਵਿੱਚ ਨਾ ਰਹੋ, ਬੱਚਿਆਂ ਨੂੰ ਨਾਲੀਆਂ, ਬਿਜਲੀ ਦੀਆਂ ਤਾਰਾਂ ਅਤੇ ਖੰਭਿਆਂ ਤੋਂ ਦੂਰ ਰੱਖੋ ਅਤੇ ਹੜ੍ਹ ਪ੍ਰਭਾਵਿਤ ਖੇਤਰਾਂ ਵਿੱਚ ਸਾਵਧਾਨ ਰਹੋ। ਪੀਡੀਐਮਏ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਪ੍ਰਭਾਵਿਤ ਪਰਿਵਾਰਾਂ ਨੂੰ ਤੁਰੰਤ ਰਾਹਤ ਪ੍ਰਦਾਨ ਕਰਨ ਅਤੇ ਜ਼ਖਮੀਆਂ ਨੂੰ ਸਹੀ ਡਾਕਟਰੀ ਸਹੂਲਤਾਂ ਪ੍ਰਦਾਨ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।
