ਚੰਡੀਗੜ੍ਹ: ਚੰਡੀਗੜ੍ਹ ਪੁਲਿਸ ਦੀ ਮਹਿਲਾ ਕਾਂਸਟੇਬਲ ਸਪਨਾ ਦਾ ਕਤਲ ਕਰਕੇ ਉਸ ਦੀ ਲਾਸ਼ ਪੰਚਕੂਲਾ ਲਜਾਈ ਗਈ। ਪੁਲਿਸ ਦੀ ਜਾਂਚ ਦੌਰਾਨ ਖੁਲਾਸਾ ਹੋਇਆ ਕਿ ਸਪਨਾ ਦਾ ਕਤਲ ਸੋਮਵਾਰ ਰਾਤ 10 ਵਜੇ ਤੋਂ ਮੰਗਲਵਾਰ ਸਵੇਰੇ 6 ਵਜੇ ਦੇ ਵਿਚਕਾਰ ਹੋਇਆ।
ਪੁਲਿਸ ਨੇ ਦੱਸਿਆ ਕਿ ਸੋਮਵਾਰ ਰਾਤ 10 ਵਜੇ ਤੱਕ, ਮਹਿਲਾ ਕਾਂਸਟੇਬਲ ਸਪਨਾ ਵਾਟਸਐਪ ‘ਤੇ ਡਿਊਟੀ ਸਬੰਧੀ ਗੱਲਬਾਤ ਕਰ ਰਹੀ ਸੀ। ਮੰਗਲਵਾਰ ਦੀ ਸਵੇਰ, ਉਸਦੀ ਲਾਸ਼ ਪੰਚਕੂਲਾ ਦੇ ਮਨਸਾ ਦੇਵੀ ਕੰਪਲੈਕਸ (MCD) ‘ਚ ਖੜੀ ਕਾਰ ‘ਚ ਮਿਲੀ। ਇਸ ਤੋਂ ਇਹ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਉਸਦੀ ਹੱਤਿਆ ਹੋਣ ਤੋਂ ਬਾਅਦ ਉਸਦੀ ਲਾਸ਼ ਪੰਚਕੂਲਾ ਲਜਾਈ ਗਈ।
ਪੋਸਟਮਾਰਟਮ ‘ਚ ਮਿਲੇ ਹਿੰਸਾ ਦੇ ਨਿਸ਼ਾਨ
ਪੋਸਟਮਾਰਟਮ ਦੌਰਾਨ ਸਪਨਾ ਦੇ ਸਿਰ ਅਤੇ ਅੱਖ ‘ਤੇ ਗਹਿਰੀਆਂ ਸੱਟਾਂ ਮਿਲੀਆਂ ਹਨ, ਜਿਸ ਤੋਂ ਇਹ ਸਾਫ਼ ਹੋ ਗਿਆ ਕਿ ਮੌਤ ਤੋਂ ਪਹਿਲਾਂ ਉਸਦੀ ਕਿਸੇ ਨਾਲ ਹੱਥਾਪਾਈ ਹੋਈ ਹੋ ਸਕਦੀ ਹੈ। ਪੁਲਿਸ ਨੇ ਸਪਨਾ ਦੇ ਪਤੀ ਪਰਵਿੰਦਰ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ, ਕਿਉਂਕਿ ਉਸਨੇ ਪੁਲਿਸ ਨੂੰ ਗਲਤ ਲੋਕੇਸ਼ਨ ਦੱਸ ਕੇ ਗੁੰਮਰਾਹ ਕਰਨ ਦੀ ਕੋਸ਼ਿਸ਼ ਕੀਤੀ। ਜਦ ਪੁਲਿਸ ਨੇ ਪਰਵਿੰਦਰ ਨੂੰ ਸਪਨਾ ਦੀ ਗੁੰਮਸ਼ੁਦੀ ਬਾਰੇ ਪੁੱਛਿਆ, ਉਸਨੇ ਕਿਹਾ ਕਿ ਉਹ ਮੋਹਾਲੀ ਦੇ ਨਵੇਂ ਪਿੰਡ ‘ਚ ਆਪਣੇ ਘਰ ਹੈ। ਪਰ ਪੁਲਿਸ ਨੇ ਜਦ ਉਸਦੀ ਮੌਜੂਦਾ ਲੋਕੇਸ਼ਨ ਟਰੇਸ ਕੀਤੀ, ਤਾਂ ਉਹ ਪੰਚਕੂਲਾ ‘ਚ ਮਿਲੀ, ਜਿੱਥੇ ਕਾਰ ‘ਚ ਸਪਨਾ ਦੀ ਲਾਸ਼ ਮਿਲੀ ਸੀ।
CCTV ‘ਚ ਨਜ਼ਰ ਆਈ ਕਾਰ
ਪੁਲਿਸ ਨੇ ਨਵੇਂ ਪਿੰਡ ਤੋਂ ਚੰਡੀਗੜ੍ਹ-ਪੰਚਕੂਲਾ ਜਾਣ ਵਾਲੇ ਰਸਤੇ ‘ਤੇ ਲੱਗੇ CCTV ਕੈਮਰਿਆਂ ਦੀ ਜਾਂਚ ਕੀਤੀ। ਇਕ ਕੈਮਰੇ ‘ਚ ਉਹ ਕਾਰ ਦਿਖੀ, ਜਿਸ ‘ਚ ਸਪਨਾ ਦੀ ਲਾਸ਼ ਮਿਲੀ, ਪਰ ਇਹ ਸਾਫ਼ ਨਹੀਂ ਹੋ ਸਕਿਆ ਕਿ ਗੱਡੀ ਨੂੰ ਕੌਣ ਚਲਾ ਰਿਹਾ ਸੀ।
ਸਪਨਾ ਦੇ ਪਰਿਵਾਰ ਨੇ ਪਤੀ ‘ਤੇ ਲਗਾਏ ਗੰਭੀਰ ਦੋਸ਼
ਮਹਿਲਾ ਕਾਂਸਟੇਬਲ ਸਪਨਾ ਚੰਡੀਗੜ੍ਹ ਪੁਲਿਸ ਦੇ CID ਵਿਭਾਗ ‘ਚ ਤਾਇਨਾਤ ਸੀ ਅਤੇ ਮੋਹਾਲੀ ਦੇ ਨਵੇਂ ਪਿੰਡ ‘ਚ ਆਪਣੀ ਛੇ ਸਾਲ ਦੀ ਬੇਟੀ ਨਾਲ ਰਹਿੰਦੀ ਸੀ। ਉਸਦਾ ਪਤੀ ਪਰਵਿੰਦਰ ਸਿੰਘ ਭਾਰਤੀ ਫੌਜ ‘ਚ ਸਿਪਾਹੀ ਹੈ। ਸਪਨਾ ਦੇ ਭਰਾ ਗੌਰਵ ਨੇ ਦੋਸ਼ ਲਗਾਇਆ ਕਿ ਪਰਵਿੰਦਰ ਉਸ ‘ਤੇ ਜ਼ੁਲਮ ਕਰਦਾ ਸੀ ਅਤੇ ਉਸਨੂੰ ਪੈਸਿਆਂ ਲਈ ਤੰਗ ਕਰਦਾ ਸੀ।
ਪੁਲਿਸ ਨੇ ਸਪਨਾ ਦੇ ਭਰਾ ਗੌਰਵ ਦੀ ਸ਼ਿਕਾਇਤ ‘ਤੇ ਪਰਵਿੰਦਰ ‘ਤੇ ਕਤਲ ਦਾ ਕੇਸ ਦਰਜ ਕਰ ਲਿਆ ਹੈ। ਪਰ ਅਜੇ ਤੱਕ ਇਹ ਸਾਫ਼ ਨਹੀਂ ਹੋਇਆ ਕਿ ਸਪਨਾ ਦੀ ਮੌਤ ਕਿਸ ਕਾਰਨ ਹੋਈ। ਸਪਨਾ ਦੇ ਭਰਾ ਨੇ ਦਾਅਵਾ ਕੀਤਾ ਕਿ ਪਰਵਿੰਦਰ ਨਸ਼ਿਆਂ ਦਾ ਆਦੀ ਸੀ ਅਤੇ ਉਹ ਪੈਸਿਆਂ ਲਈ ਸਪਨਾ ਨੂੰ ਹਮੇਸ਼ਾ ਤੰਗ ਕਰਦਾ ਸੀ। ਉਹ ਜੂਨ 2024 ‘ਚ ਖੁਦਕੁਸ਼ੀ ਦੀ ਕੋਸ਼ਿਸ਼ ਵੀ ਕਰ ਚੁੱਕਾ ਸੀ। ਪਰਿਵਾਰ ਨੇ ਪੁਲਿਸ ‘ਤੇ ਨਿਆਂ ਦੀ ਮੰਗ ਕੀਤੀ ਹੈ। ਪੁਲਿਸ ਅਜੇ ਵੀ ਹੋਰ ਸਬੂਤ ਇਕੱਠੇ ਕਰ ਰਹੀ ਹੈ, ਤਾਂ ਜੋ ਸਪਨਾ ਦੀ ਮੌਤ ਦੇ ਅਸਲ ਕਾਰਨ ਪਤਾ ਲਗ ਸਕਣ।
