ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਮਹਾਨ ਬੱਲੇਬਾਜ਼ ਵਰਿੰਦਰ ਸਹਿਵਾਗ ਦੇ ਭਰਾ ਵਿਨੋਦ ਸਹਿਵਾਗ ਨੂੰ 7 ਕਰੋੜ ਰੁਪਏ ਦੇ ਚੈਕ ਬਾਊਂਸ ਮਾਮਲੇ ਵਿੱਚ ਮਨੀਮਾਜਰਾ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਦਾਲਤ ਵਿੱਚ ਪੇਸ਼ੀ ਤੋਂ ਬਾਅਦ, ਉਨ੍ਹਾਂ ਨੂੰ ਨਿਆਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਹੈ। ਇਹ ਮਾਮਲਾ “ਜਲਟਾ ਫੂਡ ਐਂਡ ਬੇਵਰੇਜ” ਕੰਪਨੀ ਨਾਲ ਜੁੜਿਆ ਹੋਇਆ ਹੈ, ਜਿਸ ਦੇ ਡਾਇਰੈਕਟਰ ਵਿਨੋਦ ਸਹਿਵਾਗ , ਵਿਸ਼ਣੂ ਮਿੱਤਲ ਅਤੇ ਸੁਧੀਰ ਮਲ੍ਹੋਤਰਾ ‘ਤੇ ਧਾਰਾ 138 ਹੇਠ ਕੇਸ ਦਰਜ ਕੀਤਾ ਗਿਆ ਸੀ।
ਕੀ ਹੈ ਪੂਰਾ ਮਾਮਲਾ?
ਹਿਮਾਚਲ ਪ੍ਰਦੇਸ਼ ਦੇ ਬੱਦੀ ਵਿਖੇ ਸਥਿਤ “ਸ਼੍ਰੀ ਨੈਣਾ ਪਲਾਸਟਿਕ ਫੈਕਟਰੀ” ਦੇ ਮਾਲਕ ਕ੍ਰਿਸ਼ਨ ਮੋਹਨ ਨੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਦਿੱਲੀ ਸਥਿਤ “ਜਲਟਾ ਫੂਡ ਐਂਡ ਬੇਵਰੇਜ” ਕੰਪਨੀ ਨੇ ਉਨ੍ਹਾਂ ਦੀ ਫੈਕਟਰੀ ਤੋਂ ਕੁਝ ਸਮਾਨ ਖਰੀਦਿਆ ਸੀ।
ਇਸ ਦੇ ਭੁਗਤਾਨ ਲਈ 7 ਕਰੋੜ ਰੁਪਏ ਦਾ ਚੈਕ ਜਾਰੀ ਕੀਤਾ, ਪਰ ਜਦ ਸ਼ਿਕਾਇਤਕਰਤਾ ਨੇ ਇਹ ਚੈਕ ਓਰੀਐਂਟਲ ਬੈਂਕ ਆਫ਼ ਕਾਮਰਸ, ਮਨੀਮਾਜਰਾ ਵਿੱਚ ਜਮ੍ਹਾ ਕਰਾਇਆ, ਤਾਂ ਖਾਤੇ ਵਿੱਚ ਓਨੀ ਰਕਮ ਨਾ ਹੋਣ ਕਾਰਨ ਚੈਕ ਬਾਊਂਸ ਹੋ ਗਿਆ।
ਭੁਗਤਾਨ ਨਾ ਹੋਣ ‘ਤੇ, ਉਨ੍ਹਾਂ ਨੇ ਧਾਰਾ 138 ਹੇਠ ਅਦਾਲਤ ਵਿੱਚ ਕੇਸ ਦਾਇਰ ਕਰ ਦਿੱਤਾ। ਪਰ ਉਹ ਅਦਾਲਤ ਵਿੱਚ ਪੇਸ਼ ਨਾ ਹੋਏ, ਜਿਸ ਕਾਰਨ 2022 ਵਿੱਚ ਅਦਾਲਤ ਨੇ ਉਨ੍ਹਾਂ ਨੂੰ ਭਗੌੜਾ ਐਲਾਨ ਕਰ ਕੇ ਪੁਲਿਸ ਨੂੰ ਉਨ੍ਹਾਂ ਖਿਲਾਫ਼ ਕਾਰਵਾਈ ਦੇ ਹੁਕਮ ਜਾਰੀ ਕਰ ਦਿੱਤੇ।
ਅਦਾਲਤ ਦੇ ਹੁਕਮਾਂ ਤੋਂ ਬਾਅਦ, 25 ਸਤੰਬਰ 2023 ਨੂੰ ਮਨੀਮਾਜਰਾ ਪੁਲਿਸ ਨੇ ਤਿੰਨਾਂ ਖਿਲਾਫ਼ ਧਾਰਾ 174 ਤਹਿਤ ਕੇਸ ਦਰਜ ਕੀਤਾ।
ਗ੍ਰਿਫ਼ਤਾਰੀ ਤੋਂ ਬਾਅਦ, ਵਿਨੋਦ ਸਹਿਵਾਗ ਨੇ ਆਪਣੇ ਖਿਲਾਫ਼ ਦਰਜ 174 ਮਾਮਲਿਆਂ ਵਿੱਚ ਜ਼ਮਾਨਤ ਲਈ ਅਰਜ਼ੀ ਦਿੱਤੀ, ਜਿਸ ‘ਤੇ ਅਦਾਲਤ ਨੇ 10 ਮਾਰਚ 2025 ਤੱਕ ਮਨੀਮਾਜਰਾ ਪੁਲਿਸ ਨੂੰ ਜਵਾਬ ਦਾਇਰ ਕਰਨ ਦੇ ਹੁਕਮ ਦਿੱਤੇ।
ਚੈਕ ਬਾਊਂਸ ਮਾਮਲੇ ‘ਚ ਅਗਲੀ ਸੁਣਵਾਈ
ਚੈਕ ਬਾਊਂਸ ਨਾਲ ਜੁੜੇ ਧਾਰਾ 138 ਦੇ ਮਾਮਲਿਆਂ ਦੀ ਸੁਣਵਾਈ ਹੁਣ ਅਦਾਲਤ ‘ਚ ਹੋਵੇਗੀ, ਜਿੱਥੇ ਬਾਕੀ ਮੁਲਜ਼ਮਾਂ ‘ਤੇ ਹੋਣ ਵਾਲੀ ਅਗਲੀ ਕਾਨੂੰਨੀ ਕਾਰਵਾਈ ਬਾਰੇ ਫੈਸਲਾ ਲਿਆ ਜਾਵੇਗਾ।
ਪਹਿਲਾਂ ਵੀ ਵਿਵਾਦਾਂ ‘ਚ ਰਹਿ ਚੁੱਕੇ ਹਨ ਵਿਨੋਦ ਸਹਿਵਾਗ
ਗੌਰਤਲਬ ਹੈ ਕਿ ਵਰਿੰਦਰ ਸਹਿਵਾਗ ਦੇ ਭਰਾ ਵਿਨੋਦ ਸਹਿਵਾਗ ਦਾ ਨਾਮ ਪਹਿਲਾਂ ਵੀ ਵਿੱਤ ਮਾਮਲਿਆਂ ਅਤੇ ਧੋਖਾਧੜੀ ਨਾਲ ਜੁੜੇ ਕੇਸਾਂ ਵਿੱਚ ਆ ਚੁੱਕਾ ਹੈ।
ਪਰ ਇਸ ਵਾਰ ਗ੍ਰਿਫ਼ਤਾਰੀ ਤੋਂ ਬਾਅਦ ਮਾਮਲਾ ਹੋਰ ਗੰਭੀਰ ਹੋ ਗਿਆ ਹੈ, ਅਤੇ ਸਭ ਦੀਆਂ ਨਜ਼ਰਾਂ ਹੁਣ ਅਦਾਲਤ ਦੇ ਫੈਸਲੇ ‘ਤੇ ਟਿਕੀਆਂ ਹੋਈਆਂ ਹਨ।
