ਸ਼ਿਮਲਾ: ਹਿਮਾਚਲ ਪ੍ਰਦੇਸ਼ ‘ਚ ਭਾਰੀ ਮੀਂਹ ਦਾ ਦੌਰ ਭਾਵੇਂ ਰੁਕ ਗਿਆ ਹੋਵੇ ਪਰ ਮੁਸੀਬਤਾਂ ਘੱਟ ਹੋਣ ਦਾ ਨਾਮ ਨਹੀਂ ਲੈ ਰਹੀਆਂ ਹਨ। ਹੜ੍ਹਾਂ ਵਿੱਚ ਸੜਕਾਂ ਰੁੜ੍ਹ ਗਈਆਂ ਹਨ, ਇਸ ਲਈ ਲੋਕਾਂ ਦੀਆਂ ਮੁਸ਼ਕਲਾਂ ਵੱਧ ਗਈਆਂ ਹਨ। ਜ਼ਮੀਨ ਖਿਸਕਣ ਅਤੇ ਘਰ ਢਹਿ ਜਾਣ ਦੀਆਂ ਕਈ ਘਟਨਾਵਾਂ ‘ਚ ਜਾਨ-ਮਾਲ ਦਾ ਨੁਕਸਾਨ ਹੋਇਆ ਹੈ। ਮਨਾਲੀ ਤੋਂ ਕੁੱਲੂ ਤੱਕ ਸੜਕ ਨੂੰ ਬੁੱਧਵਾਰ ਨੂੰ ਛੋਟੇ ਵਾਹਨਾਂ ਲਈ ਖੋਲ੍ਹ ਦਿੱਤਾ ਗਿਆ ਹੈ।
ਹੁਣ ਤੱਕ ਲਗਭਗ 1610 ਵਾਹਨਾਂ ਨੂੰ ਮਨਾਲੀ ਤੋਂ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ। ਮੁੱਖ ਮੰਤਰੀ ਦੇ ਦਖਲ ਤੋਂ ਬਾਅਦ ਕੁੱਲੂ ਹੈੱਡਕੁਆਰਟਰ ਸਣੇ ਕੁਝ ਇਲਾਕਿਆਂ ਵਿੱਚ ਬਿਜਲੀ ਸਪਲਾਈ ਬਹਾਲ ਕਰ ਦਿੱਤੀ ਗਈ ਹੈ। 56 ਘੰਟੇ ਬਾਅਦ ਮਲਾਣਾ ਤੋਂ ਬਿਜਲੀ ਦਾ ਬਦਲਵਾਂ ਪ੍ਰਬੰਧ ਕੀਤਾ ਗਿਆ ਹੈ। ਇਸ ਮਾਮਲੇ ‘ਚ ਬਿਜਲੀ ਕੰਪਨੀ ਵੱਲੋਂ ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਗੱਲ ਨਾਂ ਸੁਣਨ ’ਤੇ ਮੁੱਖ ਮੰਤਰੀ ਤੇ ਸੀਪੀਐਸ ਨੂੰ ਦਖ਼ਲ ਦੇਣਾ ਪਿਆ। ਮੰਗਲਵਾਰ ਰਾਤ 10:00 ਵਜੇ ਬਿਜਲੀ ਬਹਾਲ ਕੀਤੀ ਗਈ। ਇਸ ਦੇ ਨਾਲ ਹੀ ਕੁੱਲੂ ਵਿੱਚ ਪੀਣ ਵਾਲੇ ਪਾਣੀ ਲਈ ਸੰਘਰਸ਼ ਜਾਰੀ ਹੈ। ਸ਼ਹਿਰ ਵਿੱਚ ਟੈਂਕਰਾਂ ਰਾਹੀਂ ਪਾਣੀ ਦੀ ਸਪਲਾਈ ਕੀਤੀ ਜਾ ਰਹੀ ਹੈ। ਦੂਜੇ ਪਾਸੇ ਮਨਾਲੀ ਵਿੱਚ ਚਾਰ ਦਿਨਾਂ ਬਾਅਦ ਇੰਟਰਨੈੱਟ ਸੇਵਾ ਬਹਾਲ ਕਰ ਦਿੱਤੀ ਗਈ ਹੈ ਪਰ ਸਿਗਨਲ ਦੀ ਸਮੱਸਿਆ ਹਾਲੇ ਵੀ ਬਣੀ ਹੋਈ ਹੈ ਤੇ ਬਿਜਲੀ ਹਾਲੇ ਵੀ ਬੰਦ ਹੈ।
ਇਸ ਦੇ ਨਾਲ ਹੀ ਜ਼ਿੰਦਗੀ ਪਟੜੀ ‘ਤੇ ਪਰਤ ਰਹੀ ਹੈ,ਪਰ ਮੁਸੀਬਤਾਂ ਘੱਟ ਨਹੀਂ ਹੋਈਆਂ। ਪ੍ਰਸ਼ਾਸਨ ਨੇ ਕੁੱਲੂ ਤੋਂ ਮਨਾਲੀ ਤੱਕ ਸੜਕ ਨੂੰ ਖੋਲ੍ਹ ਦਿੱਤਾ ਹੈ। ਇੱਕ ਹੀ ਦਿਨ ਵਿੱਚ ਵੱਡੀ ਗਿਣਤੀ ਵਿੱਚ ਸੈਲਾਨੀ ਵਾਪਸ ਪਰਤਣ ਲਈ ਪਹੁੰਚ ਗਏ। ਇਸ ਕਾਰਨ ਵੱਡਾ ਜਾਮ ਵੀ ਲੱਗ ਗਿਆ। ਸੈਲਾਨੀ ਅਤੇ ਹੋਰ ਲੋਕ ਰਾਤ ਭਰ ਟ੍ਰੈਫਿਕ ਜਾਮ ਵਿੱਚ ਫਸੇ ਰਹੇ। ਦੁਪਹਿਰ 1 ਵਜੇ ਮਨਾਲੀ ਤੋਂ ਨਿਕਲਣ ਵਾਲੇ ਲੋਕ ਬੁੱਧਵਾਰ ਸਵੇਰੇ 4 ਵਜੇ ਕੁੱਲੂ ਪਹੁੰਚੇ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
